Вице-премьер Абдурахман Махмудов гировунди гуьрдлеме Рэхьберисохие несиете эсер веровундеи э Республике Догъисту хьуькуьмлуье кифлетлуье политике.
Бинелуье пуьрсуьшгьоревоз везифегьо бири мэгIэнолуь: бири дошдеи жунсогъи дедегьоре ве гIэилгьоре, дореи хунегьоре жовоне кифлетгьоре, гьемчуьн гъэдуьр психологически гъуллугъисохи э жэгIмисоводлуье идорегьо э пуьрсуьшгьо гъэлхэнди гъоиэмгъувотлуье хуьшдере бирмундеи э гъэд нисе э гъеждегьсалаи расирегоргьо.
Вице-премьер бирмунди гереклуьи гировундеи гьемметарафлуье коре эри дореи зевербиреи гъэдуьре зиндегуни догъистуние кифетгьоре э хотур чуьки угьоре кумекии дореи э четиние зиндегуние гъозигьо.
Министр жофо ве социальни параменди Магомедзагид Кихасуров ихдилот сохди э товун гировунде оморе коре эсер зевербиреи гъэдуьре зиндегуни кифлетгьоре э республике, мэгIэнолуь биреи кимигьо барасигьоре э лой социальн гъэлхэнди ве соцгъуллугъсохигьо.
Жигегир министре вокурдеи, архитектуре ве ЖКХ Салам Гасайниев ихдилот сохди э товун веровундеи корисохигьоре эсер хубте биреи хунеие иловле жейлее десдей одомигьо, э у гъэдер жовоние кифлетгьо.
Эсер арти гуьрдлемере Абдурахман Махмудов дори жергей гъэдэгъэгьо, э у гъэдер Минздраве РД дореи медицинеи фегьмсохи зенгьоре зендение гIуьмуьрлугъи, Минкультуре э гуьнжо овурди культурни корисохигьоре ве бэхьсгиригьоре э оголзереиревоз омборегIэилие кифлетгьоревоз.
