Э 2023-мьун сал бири 100 сал эз руз офуреи хэлгъи шогьир Догъисту Расул Гамзатов. Руз ве сал исроили бинелуье мескен Sholumi ведешенди китоб «Ватан ме Догъисту» – тержуьмей дестон мэгlлуьмлуье аварец э зугьун жугьури, веровунде оморе Роза Мардахаева-Данилова. Дофусзереи вэри бигlиой эн шекуьлкеш Манашир Худатов.
И нисти эвели китоб эн Роза Мардахаева-Данилова, хьозуьрлугъи виниригьо Бинелуье мескен дошдеи не параменд сохде миллетлуье дин-гlэдот, бигlэдотлуье зугьун, культурный не торихлуье мироси жугьуро Sholumi э кумеки Гlэрейхэлгъие мисводореи фонд СТМЭГИ не рэхьзо сохдеи Гlэрейхэлгъие ассоциациэй Исроил-Азербайджан «АзИз». Те умогьой дофус зере омори: «Гъэтлемеле-гуьнделе» (2020), «Дорле-мисвочиле» (2020), «Эз чешмей хэлгъ» (2021), «Духдер дуь Ватан» (2022).
«Зугьун жугьуриму мизиву!» – гьечи сернуми доре омори шолум гуфдиреи эри хундегорой Сернуьш Фонд СТМЭГИ Герман Захарьяева. «Тержуьме дестон эн Расул Гамзатов веровунди шогьир не филолог, бэхшвегир Союз нуьвуьсдегорой Исроил Роза Мардахаева-Данилова. Омборгьо шинохденуьт уре чуьтам сечсохдение тербиедерегор зугьун жугьури, оммо гьелем бинелуье хундегор дестон литературей жугьури»,- гуфди у. Расдеки, э аудиораздел эн электронни библиотекей сайте кура сохде омори сад доне аудиокитоб шогьирой не нуьвуьсдегорой жугьури, худенгьо Роза Эдуардовна.
Сернуьш Ассоциациэ «АзИз», жигегир сервор шегьер Кирьят-Ям Амилов э гоф хушдерово эде гуфдире: «Жэг1мет жугьуройму гьемише бу гlошир эз зиреклуье корсох мэгlрифет не литературе. Не дениширеки э у чуьтам имбуруз омборгьо зигьисдени э серхьэд Кавказ, гьеммере ек сохдени ологьогъэ не муьгъбет эки чуькле ватан».
Ини чуь гуфдиренике эз товун ведешендеи китоб сергуьрдегор проект, рэхьбер Бинелуье мескен Sholumi Шауль Симан-Тов: «Э дес ишму дери неки гуьрд дестонгьо – и очугъсохде муьгьбете эки ватан хуьшде сечсохдение совети шогьире Расуле Гамзатова. Чуьтам параменд сохди культурей омборемиллетлуье республикей хуьшдере, гьеле гlуьзетлуь сохди зугуьн дедеире, у шексуьз незники эз жугьуро эри дошде зугьун жугьурире. У тержуьме сохди э аварский классический не имогьоине литературере, оммо уре тержуьме сохдет э дегьигьо зугьуной гlуьлом. Расул Гамзатов бу келеи неки эн литературе, оммо гьеле э зиндегуни жэг1мет эн гlэзизлуье Догъисту. Э хуьшде домунденки эри дофус зереи и китоб, э кумеки эри тержуьмесохи дестонгьой шогьир руйбиреи э ен сечсохдение литератор Роза Мардахаева-Данилова. Екимуьнжи, у гьемватани Расул Гамзатови, эри эну у биё хою хотур эн догъи улкере. Дуьборейминжи, у куьгьне хьовир Бинелуье мескен Sholumi. Э Бинелуье мескен Sholumi иму эдейм дошде неки зугьуне. Э и гиро дофусзереи воисдембру э ер дешенуьм э хундегоро эз товун жофой шекуьлкеш Манашир Худатов – белкин киреиге тониш сохде. Суьфдеи себеб, комики мере гъэрор норем эри веноре э и дофусзереи корой эн М.Худатове гьисдики гьемме сиротой дестон вегуьрде омори эз китобой эн Расул Гамзатов «Дестонгьо» нэ «Поэмгьо» ведироморигьо э 1979 не 1983-муьн салгьо э дофусхоне «Совети Уруссиет», гъэгъигъэт у венори сироторе э гьердуь гуьрд. Вединики гьечи гъисмет бири: гьердуь гlуьлом зиёд сохдет дуь екире.
Гьемме сиротгьо дузетмиш сохде омори э Даниил Кукулиеви, кук эн мэгlлуьмлуье гlилмчи жугьури фольклор Амалдан Кукуллу».
Э дофусзереи дарафди ихдилот эн Марта Курт, журналисткей интернет-дофусзереи Sputnik.Az, «Расул Гамзатов: шогьирие десхэти эри Азербайджан», эже эде бирмунде оморе элогъой эн шогьир э Азербайджанево не жирелуье элогъ э Гейдар Алиево. Э ихдилот эн краевед, эхдеруьшчи зугьун жугьури Ирина Михайлова «Дестонгьо Расул Гамзатов тозеден шинире омори э зугьун жугьури» гуфдире оморики: суьфде бо э зугьун жугьури дестонгьой Расул Гамзатов шинире омори э 1968-муьн сал. Тержуьмере сохди мэгlлуьмлуье шогьир жугьури не драматург Сергей Изгияев. Умогьой э Догъистуи китоблуье дофусхоне ведромори гуьрд «Буьлунде астарегьо» («Высокие звезды»). 55-нж бэгъдовой сал э жофой Р.Гамзатов фикир дори шогьир, тержуьмесох, белед зугьун жугьури Роза Мардахаева-Данилова. Неденишире э у ки зигьисдени э серхьэд Уруссиет эз 30-муьн сал зиед, эрию незники гlэзизлуье улки, у эде гьой доре э бире кор Догъисту. Эри тержуьме сохде дестонгьой Гамзатова э жугьури гереки шогьирие мэгlрифет не параменде данани зугьун. Гьемме и верзуьши исти хуьшдени нуьвуьсдегор гуьрд, комики ишму михуьнид»,- нуьвуьсди Ирина Михайлова. Песде у эде гуфдире литературей жугьури гlошир бири э жофогьорово, комики руьхсет миду биёвгьо эрхэ лугъондте хунде дануьсде зугьун жугьурире.
Шогьир-тержуьмесох Роза Мардахаева-Данилова эз дедей бири э Дербенд. Салгьой хундеи э филологический факультет хундеи Догъисту кор сохди рэхьбер эн гофсохдеи тати э республиканский радио. Хундеи варасде бэгъдэ кор сохди э школе тербиедорегор зугьун урусси не литературе э гlэзизлуье шегьер не гье евэхди дофус зере омори э гозит «Ватан» (э зугьун тати).
Вогошди э Исроил 1994-муьн сал э шуьверово не се гlэилгьорево. Эде кор сохде э жирелуье школе э шуькесде гlэилгьорево. У нубо доре эри студентгьо, комики воисдени кор сохде э ужире гlэилгьорево. Шогьир, тержуьмесох, тербиедорегор зугьун дедеи Роза Мардахаева-Данилова эде дировунде омонети эри дошдеи не параменди зугьун жугьурире.
Чуьтам пушоки гуфдире омори, э китоб вери омборо сиротой шекуьлкеш Манашир Худатов (1945-2004). Э 1964-1969-муьн салгьо хунди э факультет графикей шекуьлхундеи нум. Едигори 1905 сал. Оммо э 1970-1975-муьн – э факультет живопись московский шекуьлхундеи нум. В.И. Суриков. Эз 1978-муьн сал Манашир Худатов – бэхшвегир Союз шекуьлкешгьо СССР. Э нуьвуьсдеи гъозиегьой жофогьой хуьшдерево эде тониш сохде хундегороре шекуьлкеш Шалум Шалумов. «Э омборгьо ухшешсуьз э угьониге, келе дананменд не сараф, у гьемише жофо кешири. Шекуьлхундеире вараде бэгъде Манашир омбор кор сохди эри э жиге овурде фикиргьой хуьшдере, эде кор сохде э сер китоблуье графике, хьэрмэхь бири э омборе дофусхоней Москове: «Уруссиет Совети», «Шогьир Совети», «Гlилм», «Гlэил». Э 1983-муьн сал у офуьри мэгlлуьмлуье шекуьл эн Расул Гамзатов, комики э стилистический сейёгъ хуьшдерово бирмунди философский не шогьирие овгъот аварец. Гуж эмоциональный корисохи творчествой Манашир Худатове эри дениширегор гуьрде омори э гъэд шекуьлкешгьой жугьури жирелуье жиге, комики мирасу биёвгьо жугьуре искусствоведгьо»,- нуьвуьсди Шалум Шалумов.
Софо вегуьрде эз учмиш биреи фикиргоьй шогьир не слогьой тержуьмесоху (э гъэд гуьрд дарафди 80-дот дестонгьо), хьэз вегуьрде эз дениширеи экуьнди 40-доне сирот мэгlлуьмлуье шекуьлкеш, ишму миданит э китоб «Ватан ме Догъисту» гиро, вери э электронный библиотека гlэрейхэлгъие фонд СТМЭГИ.
