Э Догъисту оморе тозе гъэдер вакцине эз суьвруьже, гендуьмгуне ве паротите.
Э песини вэхд иму бежит гуш веноре э товун ведибиреи хэтолуье нечогъи, оммо, гьемме не варасире эри чендгъэдери угьо зарали сохде жунсогъи эн имуре, жейле беден гIэили. Кимигьо вирусгьо гьер сал дегиш бире ве четин хос сохдеи, бежид овурде э гурунисохи. Унегуьре герек нисди денишире, тейте инфекцие сохде зереи, гереки зуте гъобул сохде кори сохи.
Э вилеет э песой песини орине гъэдер нечогъибирегор грипповоз ве ОРВИ зофру биреи э 16,4%, чуьки шогьоди доре э товун гъэгъигъэти и корисохи, э суьфдеи нубот, гьелбетте, вакцинацие. Гьемме сенигIэткоргьо веди сохде 677 гьозор зэгIифире вегуьрдеи.
Э 45 регионгьо веди бире зевер сохдеи миглееуруссиети бирмунуши. Экуьнди 16% нечогъи межбур бирени э Москов, Московски область ве Санкт-Петербург, угьонигейге 84% – э еккейггьо субъектгьой вилеет.
Бинелуье э гъэд вирусгьо эн грипп мунде А(Н3№2) гъэрезки уже пенж орине веди бире зевербиреи вирусгьо гриппе В, мэгIлуьм сохде э Роспотребнадзоре.
Э гофгьой эн духдиргьо гьейсэгIэт мэгIлуьми эки 200 вирусгьо, огол зере ОРВИ. Бежинт гье у риновирусгьо, аденовирусгьо, энтеровирусгьо ве респераторно-синцитиальни вирусгьо. Гьемме угьо божерен берде эзи ло э уло эвирлу-капельни рэхь ве лап гирошдеи зэгIифи эз нечогъ эки екиге. Оммо минкини ве кори сохдеи дуь э екиревоз гировунде: эз десдореи, возилегьой гIэили. Гьеммише э ёр овурде, чуьки чешме эн инфекцие гьисди нечоге одоми.
Омборте овхьол грипп ве ОРВИ ведибире э жирей ю гъувотсуьзи, зевер бире герми, гIов эз вини, нечогъ бире бугъоз, сердерди ве гушд жендеки дорд дореи. Э сер ижире веди биреи нечогъи гереки рафде эки духдир, эзу товун ки нечогъи овурде гурунисохигьо. Э кор венгесде антибиотикгьо э сер ОРВИ духдирсуьз гIэмел нисе оморе. Эзуш бэгъэй, э дегьимуьн орине гирошденигьо сал э РФ веди бире зиёдте 23 гьозор овхьолгьо нечогъи СОVID-19, чуьки э 11,6% кемте, эз пушотеине хьофд рузгьо. Э Роспотребнадзор гуфдире, чуьки омборте гьисди геновариант «омикрон».
— Коронавирус гьисди войней нечогъигьо, комики хосиетноме «муьвэхьлуье думоневоз»,- ихдилот сохде ТАСС духдир-иммунолог Владимир Болибок. – Гье у гурунде гьово, кейки э одоми зобу кор сохде варасиреи. Одомигьо вир сохде кимигьо хутеигьо, меселен, серлэгIэе хьисоб. Веди бире думонее варасиреи, одоми сер гуьрде евош фикир сохде. Бирмунде, чуьки э и корево бесде зевер биреи э песини чор сал хуьрде гъонунепузмиши ве хэребеи э уруссиетие рэхьгьо.
Э Догъисту мунде гурунде гъозие э ловсохдеи суьвруьже. Э гъэд нечогъгьо гьисди гIэилгьо, комики деде-бебе негIсохде эз угьоре вакцинации сохде, гъэрезки прививке гьисди бегьеми гъэдер веди бире э гьемме софхонее идорегьо эн республике.
Э ёр овурде, чуьки суьвруьже-гье у вирусни нечогъи э интоксикацие бесхун дореи зеверие нефескеширеие рэхьгьо ве экзантеме. Гировундегор эну гьисди нечогъ, комики ведешендение вирусе э песини гьердуь шеви-рузи икубациони вэхд, у дануьсде гирошдеи зэгIифи эз нечогъ эки екиге гье евэхди эз 8 те 10 одоми, комики дебире э е хуне. Эгенер гъэлхэндие системе эн беден одоми буши, гурунисохи мибу.
Вакцинацие, комики гировунде э норе гуьнжолуьи, э гуьнжо овурде иммунитете, чуьтам одоми нечогъ бире суьвруьже. Гуьре бирмунуши, 95% одомигьо бэгъдовой прививке э гуьнжо овурде согъ гIуьмуьрлугъи иммунитет. Сейреки бире овхьол, кейки одоми бире гирошдеи зэгIифи эз нечогъ эки екиге, оммо гировундеи нечогъире асанте ве гурунисохисуьз, ихдилот сохде жигегир рэхьбер эпидемиологически э зеверсер Рэхьберие Роспотребнадзоре э РД Мурад Рамазанов.
Э и орине Минздрав РД мэгIлуьм сохде, чуьки э Догъисту оморе 7390 вакцине эз суьвруьже, гендуьмгуне ве паротите. Эз хиниклуье бине Республикански бине инфекционни нечогъигьо дерму э жейлее термоконтейнерах овурде расунде э поликлинике шегьергьо ве районгьо.
Иммунизацие гировунде гIэилгоре э гIуьмуьрлугъи 1 ве 6-муьн сал, э эпидемически бирмундеи ве э келетгьо гIуьмуьрлугъи. Вакцине бегьеми хуби. Эри вегуьрдеи уре гереки рафде эки духдир э жиге зигьисдеи.
