Келе гуьрдлеме эн гIэрейведомственни комиссие э товун э гъэршуй кори сохдеи э гъонунсуьзе корсохдеи гировунде оморебу и пушогьо э зир рэхьбеьети эн вице-премьер Догъисту Абдурахман Махмудов.

Э гуьрдлеме нушу доребируьт серворгьой эн Министерствой жофо РД Магомедзагид Кихасуров, рэхьбер эн Идорей ФНС э Республикей Догъисту Айдар Байрамов, сервор эн Министерсвой экономически параменди эн Догъисту Гаджи Султанов.

Имисал э республике дануьсдейм ведиревонду «эз сое» 25 917 одомире: 48% э гуьнжо овурдет сэхьибкори, 30% бирет кор сохденуьтгьо эри хуьшде, 20% бесдет жофолуье игъролгьо, 124 одоми гъул кеширет игъролгьо эн граждански-ихдиерие хосиет, ве 108 бирет хоригъуллугъсохгьо. План э товун зофру сохдеи гъонунсуье кор сохдеире эри 9 мегьгьо веровунде омори э 86,5%. Э и гуьре э 33 районгьо ве э шегьергьой регион план веровунде омори, оммо э 8 зиед сохде омори. Хубтее барасигьоре бирмунди Кизилюрт – 122,8%, Хасавюрт – 108,9%, Дербенд — 106,2%, Махачкале – 103,2% ве Сулейман Стальски район – 116,9%. Гьееки э уревоз э 18 районгьо э планови бирмунушигьо не расирет.

А.Махмудов гъуллугъ дори э жейлее муниципалитетгьо э гуьнжо овурде фегьмсохи кор эн гIэрейведомственни корлуье десдере.

Э нуботлуье гуьрдлеме гуш дошде миев рэхьбергьой эн министерствогьо э товун гъобул сохде оморенигьо чорегьо, ве гьемчуьн мэгIлуьм сохде миев барасигьой эн гье гене тогIин сохде оморигьо фегьмсохигьо.