Руз орине шев 22-муьн марта ловсохи жэгIмиети варасиреи уруссиетгьо, вегьемме гъэдерлуье одомигьо эн вилеет инсофсуьзеи бедкорлуье акте, комики сохде омори бирэхьми куьшдегоргьо э Красногорски ТЦ «Крокус Сити Холл». Нуботлуье хуниекор эн зобуне одомигьо бирмунде э вилеет философией эн хуьшдере.
Вилеет эн иму эз дерд-дулесди гирошде омборе зулум кори эвелине. Буланмиши кешире эз угьо республике эн иму. Э ёр гьисди ноябрь 1996-муьн сал, кейки э Каспийск бедхэтокоргьо сохдегоргьо лов сохди зиндегуние хунере. Телеф бире 68 одоми 21 эзугьо гIэилгьо. Иму э ёр овурде ловбиреи э Буйнакск 4-муьн сентября 1999-муьн сал, бире вечаруьнде дуь подъезд эн хуне, телефбире 64 одоми, 146 бире ералуь. Бичоре фурмуш сохде 9-муьн мая 2002-муьн сале, кейки э мейду. Каспийске э вэхд мигIид Бесгъуни Руз, э е гъэдер одоми лов сохде туп гIэжелире. Телефбире 43 одоми э гъэд эн угьо 12 гIэилгьо. Бире ве еккейгьо бедкоргьо, комики берде омборе зиндегуни ве ералуь бире омборе одомигьо. Унегуьре дулгьо эн иму гъуьж диреморе эз дулесди кешире эки гъурбуни песини бедкор, э «Крокус Сити Холле», эже 140 одоми телефбире, 182 бире ералуь.
Ижире омборе куьшдеи имид, чуьки огол зере э уруссиетгьо терс э пушой бедкор, фуьрсоре гъэгьрегуни ве хьуьрш одомигьо э хьуькуьм. Оммо беди еклуьг биреи одомире. Омборе миллетлуье хэлгъ Уруссиет бирмунде боворини э Ватан эн хуьшде.
Э песой бэдхэтокори сохдегоргьо гьеммише поисде пулдорогоргьо, комики э ижире коревоз гъэрор норе политически пуьрсуьшгьо. Уруссиетие одомигьо варасире, чуьки гьеммише гьисди одомигьо хьозуьрлуь рафде э гъерки гъонуне пузмиши эри пулгьо. Суьфдеи силис поюндегоргьо бирмунд еченд гъэдер эри энугьо имид доре ве ченд гъэдер дореи муьзде эри ижире гъонунепузмиши. Куьшдегоргьо воисде вирихде э лой Украине гуфдиреи э товун пулдорегор и коре. Бедкорсохдегоргьо биё бу э серхьэд э Брянски область вохурде э украински диверсионно-разведывательни десде. Гье белки эри куьшде.
Э руйбиреи эн хуьшде эки хэлгъ Уруссиет Сервор Владимир Путин гуфдире, чуьки гьемме чор веревундегоргьо теракте, ки куьшде одомигьоре офде оморе ве поюнде. Угьо воисде пэхьни бире ве рафде э лой Украине, эже Украине хьозуьр сохде гирошдеи хьуькуьмлуье серхэде. Гьемме э гуьнжо овурдегор ве хогьишидорегор и гъонуне пузмиши миберу вихьтеи. «Иму миофим ве вихдеи доре гьерки, ки поисде э песой кемер бедкорсохдегор, ки хьозуьр сохде и беде коре э сер Уруссиет э хэлгъ эн иму»,- гуфдире сервор хьуькуьм. Кимигьо эз серхьэд э улое «эксперты» и коре воисде э корвенгесде эри зиёд сохде миллетлуье бэхшеи. Омбороварасире, чуьки э гуьнжо овурдегор фурмунде зигьисдегоргьо Таджикистана, эри берде гъэйгъу эз гьэгъигъэт э гуьнжо овурдегор и теракте. Э дуьруьжде вокурдеи эле сухде гIэтош, гьемме телефбирегоргьо эз вечаруьндеи не ведешенде, оммо э МэгIэров гуфдире, чуьки украинцы не сохде и коре, гьеммере сохде ИГИЛ (ГI’эмел нис оморе э Уруссиет). Гье у бедкорлуье идоре э гуьнжо овурде э Америке, умогьой жугьобдорлуьи берде угьо. Э товун эн у гуфдире Хиллари Клинтон, Дональд Трамп ве еккейгегьо чиновникгьо.
И теракт доре гене четини. Гуш дошде гофгьо э товун, чуьки э мескен Уруссиет оморе омборе гъэдер мигрантгьо. Екиш нисе дануьсде ки оморе, эри комини везифе, эже корсохде. Одомигьо бире жире-бе-жире, гьисди ки оморе эри корсохде дошде кифлете хубсохде коре, умогьой кордорегор гереки доре хубе зиндегуни. Гереки э угьо денишире.
Одомигьо, ки фикир сохде ижире гъонунепузмиши биё дану, чуьки э угьо денишире вихьтеи. Сервор думской фракции «ЕклуьеУруссиет» Владимир Васильев комики догъистунигьо хьисоб сохде уре гьемватани, гуфдире, чуьки эри ижире гъонунепузмиши гереки дофус зере гъонун эз герден зере. Кимигьо европейски серворгьо хьэйфберисохде. Оммо угьо рази нисебире, чуьки и коре сохде Украине. Э киевский бар «Офензива» бэгъдовой теракт овурде жирей хурек э нумево «Сет Крокус сити». Гье у жирей хурек э гъэдер «Тозеве мэгIлуьмлуье» гъимет эн у гьисди 249 гривень ве веноре сирот сухдеире э «Крокус Сити Холле. Гье у гьисди беди эри гьемме омборемиллетлуье хэлгь эн Уруссиет. Ижире бедекоргьо нисди дузгунлуьи.
