Гьерсалине республикани акцие «Вахте Ёргири», гъосут комики гьисди гуьрде хьуьрметлуь вегирлуье ве номус лешгерчигьо, телеф биригьо э салгьо Келе довгIой Ватани, тербие дореи ватанхогьи ве инсониети э жовонгьо гIуьзетсохи жовонгьоре эки торихлуье ве культури миросии Вилеет эн иму, гирошди ди э Махачкале.
Акцие сергуьрди э бинелуье мескен мейдон шогьнишон, эже кучмиш бири желдлуье жогьилие жэгIметие гезиши, хундегоргьо данани идорегьо, кадетгьо серворгьо хьуькуьм республике ве хьуькуьм эн серкори Махачкале. Динлуье э акцие гъобул сохди бэхшвегири ТОКСовигьо, комигьоки кура бире э и руз эз жире-бе-жирее районгьо Догъисту. Гъэдер бэхшвегиргьо акцие бири экуьнди гьозор одоми.
Колонне э рэхьсохдеи лешгерии оркестревоз рэхь рафди э бохче нум Ленинскогьо комсомоле эки сенгъ ёровурди Лешгерчи-азадсох. Жуьмуьсдеи э колонне, хундегоргьо школе-желдлуь «Гезиши суьфдегьигьо» гировунди сиротгьо догъистонигьоре – бэхшвегире Келе довгIой Ватани, эз муьрде мунде комигьоки э рэхь корисохи дуьруьжде гешдеигьо кор офде омори э бирорие гъовре битехьэим сохде. Э рэхь десде рафдеи поисди э ён сенгъ ёровурди мэгIлуьмлуье зиргIовие Игиде Союз Совети Магомеду Гаджиеву, э пойней коминики бири венореи гуьлгьо.
Межлуьслуье митинг, гIуьзетсохдеи 79-муьн салине Бесгъуни э Келе довгIой Ватани, гировунде омори эки сенгъ ёровурди Гъовхобер-хилоссохдегоре. У сергуьрди эз у чуь кучмиш бире гъуногъо ве рэхьбергьо республике вегирлуьи бири ёргири телеф бирие е минут гофсуьзиревоз.
Сернуьш Хьуькуьм Догъисту Абдулмуслим Абдулмуслимов э рэхь хуьшдени бирмунуши э рамке вокурдеи ватанхогьи жире кор «Вахте Ёргири» риз кешири вожиби тербие дореи инсони ве ватанхогьи хуьшденгъонмиши э жовонгьо: «Дошдеи эн иму торихлуье ёргири, тербие дореи инсони ве ватанхогьи хуьшденгъонмиши э жовонгьо, дивэгI жун жугьобдорлуьи э товун хуьшде, хуьшдени вилеет, э товун имбурузине ве себэхьине руз – гье у гьейсэгIэт гьисди еки эз вожиблуье везифе. Иму нисе фурмуш сохде, чуьки гъэгъигъэт ватанхогьи ве муьхькемлуье хьозуьрлугъи эки гъэлхэнди Вилеет эн иму гьисди лап муьхькемлуье бине-бору вилеет, зомин эн у боворинлуье биёвгьо вэхд. У бешгъэ вожиби эн иму рузгьо, кейки гирошдени жирелуье довгIои операцие ве Уруссиет боржбери э гьеммишеине хьэрекети гьечи енебуге небуге тозеден нуьвуьсдеи торихе, дузгунлуь ведировунде хунлуье куьшдегоргьо вэгIэдо Келе довгIой Ватани, э герден веноре гIуьломлуье жэмигIэт етарафлуье гIуьлом»,- гуфдири у.
Сернуьш Совети ветерангьо РД, полковник ВДВ Магарам Алиджанов э бирмунуши хуьшде гIуьзет сохди вожиби дошдеи торихлуье ёргири: «Гье у руз – гьисди ёргири э уревоз, ки гъэлхэнд поисди Вилеет эн имуре, кейки гьозор догъистонигьо гъэд сохди сергьо хуьшдере эри хилоси ве михьтожсуьзи эн Вилеет иму. Э республике иму гьозор мэгIлуьмсуьз нисд биригьо догъистонигьо у гьисде кор эри гешдеигьогоргьо, э войгей хуьшде кумеки сохдегоргьо Бараси, жовонгъушунгьо ве гьемме жогьилигьо идорегьо. Имбуруз ветерангьо имидлуь бире, чуьки ишму диеш дуразкеши кор хуьшден бебегьо келе-бебегьо ве гъэлхэнд поисде Вилеет эн имуре, чуьтам э гъэлхэнди поисде эри эну гьозор догъистонигьо э жирелуье довгIои операцие».
Бэхшвегир СВО Маир Рустамов согъбоши гуфдиреи догъистонигьо э кумекии доре ве кумекии эз руй гьемме бэхшвегиргьо жирелуье довгIои операцие.
«Согъбоши ишмуре эз кумекии сохде, иму уре гьис сохденим. Гьемме, чуь кор сохде ишму инжо, гьелбетте, куьнд оморени бараси имуре, кумеки доре э доруни. Ве гIэтош довгIои шэгIмгьо, сохде оморигьо десгьой хундегоргьоревоз, ве э зир лигъоб пэхьни сохи тургьо комигьоки эри иму вечире э войгей хуьшде корсох, ве герме дес зерее когъоз, комики эри иму фуьрсорени гIэилгьо эз гьемме Догъисту, ве сад тонн гуманитари кумекии, гьеммишеи оморе расиреи э жейлее чапарлуье мескен СВО. Гье у гьемме герекие эри эн иму бараси!» — гуфдири лешгергъуллугъсох.
Бэхшвегиргьо «Вахте Ёргири» венори гуьлгьо эки сиротгьо догъистонигьо э Богъче Игидгьо э Махачкале. Э ёр овурде, чуьки инжо поюнди э жиге ю сиротгьо догъистонигьо – Игид Союз Совети ве Игид Уруссиет.
Гьееки э премьер-министром Абдулмуслимом Абдулмуслимове ёргири игид вегирлуьи бири гьемиге прокурор республике Виктор Эпп, вице-премьергьо Рамазан Джафаров ве Муслим Телякавов, мэр Махачкале Юсуп Умавов, секретарь Совети секонеисуьзи РД Магомед Баачилов, лешгери комиссар Республике Догъисту Дайтбег Мустафаев ве диеш.
Эзуновлейге норе гуьлгьо бэхшвегиргьо сер кешири бирмундеи сиротгьо игид довгIои, эн кини нум бири тозеден вокурде э торих э хотур гешдеигьо кор ве бил зере векенде бирорие гъовре. Сиротшишебенд бири э гуьнжо овурде э ён Музей нум Макаровой.
