Маргарите Гиригорьевне Симахове еки эз эгъуьлменде ве лап соводлуье зенгьо, э комиревоз ме дануьсдем меслэхьэт сохде. Уре лап хубе еровурдини ве хьэрекети сохдени доре дананигьой хуьшдере э еккейгеьо. И бигIэдотлуье зен дануьсдени хосде ве бире гIэзиз.
«Гьемме э дес имуни, — гуфдирени Маргарите Григорьевне, — ве эзу товун угьоре фушенде гIэмел нисе оморе». Ве у угьоре гьич нисе фушендембу – гьеле э лап четине дэгъдэгъэгьой эн зиндегуни хуьшде. У дануьсдембу, ки гереки гIэилгьой хуьшдере, невегьоре, хьовиргьоре, куьнде одомигьоре ве гъовумгьоре.
Маргарите хьэсуьл омори 20-муьн сентябрь 1951-муьн сал э Нальчик э кифлет эн Григорий Камуилович Гилядов ве Тани Баазовне лап чуьклеи эз пенж гIэилгьо. Угьониге гIэилгьо хьэсуьл оморет э жигегьой гъуллугъсохи ве эн кор бебе. Григорий Камуилович бэхшвегир довгIо, расири те Берлин. Дедей Маргарите бу рэхьмедуьле одоми. Э келе дуьл эну жиге вес сохдембу неки эри гIэилгьой хуьшде, оммо эри хьовиргьой энугьош. У бежид кура сохдембу э хуней хуьшде етимгьоре, эри хурек доре, герм сохде ве гоф сохде э угьоревоз, доре несиет дедеети. Омбаргьо эз и етимгьо хьисоб сохдембируьт уре нум доре оморигьо деде.
Хундебу Маргарите э 10-муьн школе эн Нальчик, деригьо э Жугьурие Колонке. Песде дарафди э жигенлуье зеверие соводие идоре, эже вегуьрди сенигIэт тербиедорегор зугьун урусире ве эдебиете. Песде гъэрор сохди вегуьрде диеш е зеверие соводи ве бири тербиедоргор эн немецки зугьун.
35 сал Маргарите Григорьевне кор сохдембу тербиедорегор э школе. Песини 10 салгьо, эз 2000-муьн салевоз, тербие дорембу зугьун жугьурире ве гIэдотгьоре. Э школе №10 хундембируьт неки жугьургьой догъи, оммо ве нушудорегоргьой эн де хэлгъгьо: кабардинцгьо, балкарцгьо, корейцгьо, урусгьо ве диеш. Угьо э софоревоз хунде дануьсдембируьт зугьун эн жугьургьой догъире, гоф сохдембируьт э и зугьун ве гьеле хундембируьт дестонгьо. Ве гьейсэгIэт, кейки гьевел биригьо хундегоргьо сер кеширенуьт уре енебуге зенг зеренуьт, ве сер гуьрденуьт гоф сохде э жугьури. Маргарите Григорьевне тербие дорембу зугьун жугьурире ве э жугьурие меркез «Товуши» эн Нальчик. Э нишоне эн келебебе Камуил Исакович Гилядов гуьре, у бири гьэгъигъэтлуье несигIэтдорегор, деберденигьо гьемме мерэгълуь биренуьтгьоре э мерэгълуье зиндегуни эн базургенди эн жугьргьой догъи.
Гьер нубой хуьшдере Маргарите, гьэгъигъэтие тербиедорегор-сергуьрдегор, сохдембу мерэгълуь, чуьнки хундегоргьой энуре хьэз биев эдебиет уруси, уре хуно.
Маргарите Григорьевне эзвер дануьсдембу гьеммей Пушкине. Уре лап хьэз оморе эз «Евгений Онегин» ве у хундени уре эзвер. Гьемчуьн эз урусие нуьвуьсдегоргьо уре хьэз оморени Сергей Есенин, ве омбаре произведениегьой энуре дануьсдени эзвер ве Михаил Юрьевич Лермотов еки эз хьэз оморенигьо шогьиргьой энуни.
Э гъуногъ рафденки эки гIэилгьой хуьшде э Исроил, у гировундени эдебиетлуье шевгьо. Омбаргьо битоби гузет сохденуьт омореи энуре, эри гоф сохде э зигьимлуье тербиедорегоревоз. Маргарите Григорьевне э барасиревоз нушу доребу э ижире шегьергьо, чуьн Хайфа, Нетания, Ашдод, Ашкелон, Сдерот ве Реховот. Э еки эз эдебиетлуье шевгьой эну оморебу профессор, комики хосди гоф. У эз дорун дуьл хэйрон бири э Маргарите Григорьевнеревоз, гуфдиренки, ки гофсохдегоргьо э ижире жирей гуфдиреиревоз, э ижире хубе еровурдиревоз у гьеле не вохурди. Гьемчуьн эки эну бежид руй биренуьт эри кумеки сохдеи э тержуьмесохи эз зугьун уруси э жугьури енебуге эшкуново. Ве у э екиш нэгI нисе сохде.
Е гиле э Пурим у берди хундегоргьой хуьшдере эн жире-бе-жирее миллетгьо э нумаз, чуьнки угьо э чум хуьшдеревоз винуьт, чуьтам гировунде оморениге и мигIид э жэгIмиет дин-догIоти ве гуш доруьт рабире. ГIэилгьо гIэжоиблуь биребируьт ве угьо вегуьрдет фурмуш нисе виренигьо нушудореигьо. Оммо, эри эни уре туьхмет доре омореб. Дин ве боворини – гереклуье бэхш эн зиндегуни Маргарите Григорьевнеи. «Боворини – и ве гьисди ме, — бежид гуфдирени у, — боворини – и зиндегуни мени». Гьемме мигIдгьой жугьури гировунде оморени э хуней эну. Гьеле гьечуь бу кейки хьусуьр зинде бу, дошде оморени гьемме гъонунгьой хэлоли.
Э шуьвер Маргарите вадарафди э бирор эн хэгьергили хуьшде, э Валерий Симахов, келеи кук эн Елене Натановне ве Александр Язгилевич Валекай – гьечуь уре гуфдирембируьт э хуне ве э жэгIмиет дин-догIоти эн жугьургьо. У эз екиш нэгI нисе гуфдирембу, мидануьст хилос сохде кукгьой жугьурире эз Афганистан, дешенде гIэил кинигере э хундение идоре енебуге э хубе кор. Уре бу дуь зеверие соводие идоре, бу лап барасилуье ве мэгIлуьмлуье сэхьибкор, чуь коре у сер нигуьрдге – гьеммере у даеуьсдембу сохде. Валерий Александрович бу сервор эн завуд шороби, гьемчуьн бу сэхьиб фабрике. Э и фабрике кор сохдембируьт эз ниме омбарте жигенлуье могьлугъ. Э сэхьиблуье ресторан хуьшде ветерангьоре хурек дорембу. Те имбурузине рузиш одомигьо оморенуьт э сер гъоврей эну, фурмуш нисе сохденуьт никире, комиреки эри энугьо сохди Валекай Симахов. Офирегор фурсори эри эну минкин кумеки сохде э косибгьо, неки э жугьургьо. Ве бэгъдовой эз зиндегуни рафдеи эну гирошдигеш 20 сал, э товун эну гуфдиренуьт, э товун зиндере хуно, э гьемме межлуьсгьо эн жугьургьой Нальчик неки э Уруссиет, оммо ве э Америке, Исроил, Канаде, Германие. Бэгъдовой эз гIэрей зиндегуни рафдеи шуьвер Маргарите зигьисдембу э е хуне э хуьсуьревоз ве гъуллугъ сохдембу уре те эз гIэрей зиндегуни рафдеи.
Маргаритере ве Валекае раче кифлети: шеш гIэили – пенж духдер ве е кук. Угьо дошде веровундет гIэсуьлменде, соводлуье ве верзуьшлуье гIэилгьо. Ве угьоре 14 невеи, комигьоки э гIэилгьо хисирембируьт э восунегьой ве дестонгьой эн Маргарите Григорьевнеревоз.
Имбуруз невегьой эну – эрклуьи эн хэлгъ жугьурини. Гьемме кукгьо хунде варасдет московски школей жугьурире «Месивта», песде – МГУ. Киниге вихди дин, киниге э гъуькуьметлуье гъуллугъсохини. Невегьой Маргарите гьемчуьн барасилуьнуьт э жигей хуьшде чуьтам э Исроил, гьечуь ве э Уруссиет. Киниге офди хуьшдере э медицине, киниге э хай-тек, ве э финансгьо.
Имбуруз дестонгьой эн Маргарите Григорьевнере хунденуьт нишрегьой эну.
Эри жовоне эрхэгьо Маргарите Григорьевне хосдени шолуме асму э зеверсер, довоми, чуьнки угьо э гуьнжо биоруьт мозоллуье кифлетгьой жугьури ве бируьт барасилуь э гьемме.
Нас было шестеро, и каждого любила,
Краснеть за нас не приходилось ей.
Всю доброту сердечно, что в ней было
Она вложила в собственных детей.
Хосденуьм эри Маргарите Григорьевне Симахове жунсогъие очугъэ офирение зиндегунире 120!
Нуьвуьсди Стелла Давыдова
Тержуьме сохди Ильягуева А.
