Магомед Рамазанов тогIин сохде омори э жигей Сернуьш Хьуькуьм эн Догъисту. Суьфде Федор Щукин норебу уре веровундегор гъэрхундигьой эн премьер-министре, имбуруз шинох сохди уре э депутатгьой эн республикански парламентевоз.

М.Рамазанов нушу дори э сессие. Вожиблуьгьо эз гуфдирегьой эну:

Эриме и келе жугьобдорлуьини э пушой эн одомигьой республике ве э пушой гьемме, ки имид бирени э хубе ве хэйрлуье кор эн хьуькуьм.

Э кор хуьшде иму миденишим э у, чуь сохде омори: э синогъи ве э минкингьой Догъисту.

Гьемме гъувотгьоре мивеним, чуьнки Хьуькуьм хэйрлуь, очугълуь ве гъэрор соху гьеррузине четинигьой эн одомигьой республикере.

— Имбуруз еки эз бинелуье тарафгьо мундени кор эри нисдсохдеи эзуновлейге бире гъозиегьой эн зобуне овхьолетгьоре. И кор гировунде оморени шев ве руз э комики бэхш вегуьрдени федеральни ве региональни гъуллугъигьо.

Вожиблуьни, чуьнки гьер зараливегуьрдегоре одоми э хуьшде кешу кумеки дореире, варасуь, ки четинигьой эну тигъэтсуьз мунде ниев.

— Экуьнди 160 рэхьгьо пуч бири. Э имбурузине руз мунди 17 рэхьгьо, комигьоки гъуьч сохде оморени ве гъуьч сохде миев э куьнде вэгIэдо. У куьрпигьо, э комигьоки зарали зере омори омбаре вэхд гъуьч сохде миев, эзу товун ки хуьрд бирет ве угьош э вэхди ю гъуьч сохде миев. Гье белки э сер эн оморенигьо сал коргьо бегьем сохде миев.

— Социальни гъувотдореи мибу вожиблуьи э кор эн Хьуькуьм Догъисту. Жейле тигъэт доре оморени э кифлетгьой эн бэхшвегиргьой эн жирелуье гъовхолуье операцие, э келете одомигьо, э шуькестгьо, гьемчуьн э угьо, ки офдори э зобуне зиндегуние овхьолет.

Иму лап хуб варасиреним четинигьоре, комигьоки имбуруз гьисди э социальни-экономически параменди эн Догъисту. Ве лап вожиблуьни, э суьфдеи нубот, гъэрор сохде егъинлуье пуьрсуьшгьоре э товун комигьоки фикир сохденуьт одомигьо.

Везифей иму расире э егъинлуье дегишигьо, комигьореки догъистонигьо мивинуьт э гьеррузине зиндегуни хуьшде.

Суьфденуботлуье кор иму – чуьнки бу социальни зевербиреи, чуьнки одомигьо хунде варасденки зеверие соводие идорере дануьт дарафде э кор.

Ме гьеммише вокурдеюм, гьеммише эри кор сохдеи дуь э екиревоз, оммо тижлуьнуьм э кор. Эриме, э суьфдеи нубот, бирмунуши – сенигIэткорлуьи, жугьобдорлуьи ве гIэсуьлменди.