21-муьн сентябрь сервор Догъисту Сергей Меликов э корисохие рафдеиревоз сер кешире Табасарански район, комики бирмунде 95-муьн сали эн хуьшдере.
Инжо, э дигь Ханаг э бэхшвегири рэхьбергьой республике вокурде омори сенгъ ёровурди Игиде Уруссиете Исрафилу Магомедову.
У бири пенжимуьн догъистуни, верзуьшлуье буйругъевоз Серворе РФ буьлуьнде хьуькуьмлуье бэхш вилеет э песой мердьети, игидьети ве хуьшдере гъимиш не сохдеи, нушу дорение э сер веровундеи гъовхоие везифегьой э жиге СВО.
Сенгъ ёровурди вокурде э жиге миглее жэгlмисоводлуье школе э гъовумлуье кент Игиде.
Сергей Меликов, бирмунде э межлуьс, гlуьзет сохде игидьети зигьисдегоргьой муниципалитете: «Омборе гъэдер зигьисдегоргьой Табасарански район дори зиндегуни эн хуьшдере э песой хилоси Ватан эн имуре, э песой мозол асантие одомигьо. Э у гъэдер Исрафил – игидлуье кук табасарани хэлгъе, сервор десде э гъэршуйтанкови рэхьберие ракетгьо. Гlэилгьо дануьсде, чуьтам бире сервор э гъэршуйтанкови десдей. Гье у ки гьеммише гьисди э пушоие гъирогъ ве суьфде винире терсдии гужлуье гъовхо дуьшмене».
Э кент Хучни эки меселелуье Гъэле хьофд бироргьо ве ек хэгьер гирошде межлуьслуье бедел юбилейни корисохигьо.
Сервор Догъисту омборекбу сохде зигьисдегоргьой ве гъуногъой Табасарански район э 95-муьн салиевоз.
Сергей Меликов нум доре муниципалитете еки эз лап раче жиге Догъисту, комики гуьнжуьнде гlошире культуре ве тебиетие рачи: дуьруьжде догъгьо, темизе нуькерегьо ве гlовгьо, гъэдимие гъэлегьо ве куьрпигьо, комики вокурде омори мих суьз, гъэдимие хуней дин-догlоти мусурмуи, мугъорелуье комплекс Дюрки, лап раче гуьлгьо э холинчегьо, жирелуье э гурундие табасарани зугьун.
Табасарани хори, бирмунде сервор регионе, гьисди жирелуье жиге э зиндегуни гьеммей республике, эзу товун ки инжо нуьвуьсде вожиблуье верэгъ торих догъилуье улке.
Табасарани хори гьемчуьн дошде ведировунде омборе мэгlрифетлуье гlилмлуьгьоре, политикегьоре, духдиргьоре, тербиедорегоргьоре, корсохгьой мэгlрифете, культуре ве спорте, комики гlуьзетлуь сохде гъовумлуье Догъистуре э гьемме вилеетгьо.
Э гъэд эн угьо — шогьир-лешгери Мирза Калукский, мэгlлуьмлуье гlилмчи-энциклопедист Гаджи-Магомед Зирдагский, кавказебердегор Магомед Раджабович Гасанов, мэгlни нуьвуьсдегор Касум Магомедов ве еккейгегьо.
Бегьем сохде межлуьсе, сервор регионе дори сеч бирегоргьоре дуь эз еки э жире-бе-жирее рэхь корисохи зигьисдегоргьой муниципалитете хьуькуьмлуье бэхшгьо, хосде эри гьемме жунсогъи ве хушхьоли, келе барасигьо э келе ве чуькле коргьо, тозе барасигьо ве гуьлишонигьо.
Э Табасарански район гирошде Республикански бирмундеи хэлгъие гуьнжуьнде оморе чи «Гьовой Рубасе» э гъэд корсохгьой эки 95-муьн сали э гуьнжо овурдеи Табасарански районе.
Зигьисдегоргьо ве гуъногъгьо дигьбоне дануьсде гешде э ярмарке жиге усдогьо ве божеренлуье корсохгьо, гьемчуьн винире бирмундеи, э комики гъобул сохде бэхшвегири хэлгъие десдегьо эз дигьбонгьо Дорумие Догъисту ве мэгlлуьмлуье возирегоргьой республике.
