Сернуьш Хьуькуьм эн Республике Догъисту Абдулмуслим Абдулмуслимов, сешоббот, 10-муьн сентябрь, гировунди гуьрдлемей Гlэрейведомственни комиссиере э товун дореи ихдиерире эри э кор венгесдеи нишоне «Бренд «Догъисту» эн Республике Догъисту.

Гереки э ер овурде, ки э республике тогlин сохде оморебу нишон «Бренд «Догъисту» ве гъобул сохде оморебу тегьер э кор венгесдеи эну.

Абдулмуслим Абдулмуслимов гуфди, ки жирелуьи эн нишон «Бренд «Догъисту» – э жигей ведешендеи мол, хэел сохде оморени, ки мескен эже ведешенде оморени мол, кори сохдени э сер э гуьнжо овурдеи жейлее тегьергьой энуре.

«Везифегьой дореи ихдиери э кор венгесдеи нишоне ве э гуьнжо овурдеи хубе нум Республике Догъистуре, зевер сохдеи инвестиционни мерэгълуьи энуре, гъувот дореи хьэвесгьоре ве молведешендегоргьоре доре себеб эри хубте сохде качествой ведешенде оморенигьо молгьоре э мерэгъгьой одомигьо гуьре. Гьемчуьн хубе молгьоре, ведешенде оморенигьо э мескен регион ведеберде э региональни ве рынокгьой Уруссиет.

Иму хуте бирейм сохде хубе молгьо. Энжэгъ гереки хэйрлуь бирмунде и молгьоре э де регионгьойге, гьемчуьн э де вилеетгьойгеш. Бренд моле дорени жирелуьи, чуь э нубот хуьшде зевер сохдени пуьрсиреи энуре», — гуфди премьер-министр.

Чуьтам гуфди Абдулмуслим Абдулмуслимов, и суьфдеи эрзодорегори э республике э товун вегуьрде ихдиери эри э кор венгесдеи нишоне «Бренд «Догъисту» эри мол хуьшде.

Премьер Догъисту министерствой корхонегьоре ве алверире гьемчуьн министерствой дигьлуье хозяйстворе дори гъуллугъ желдлуь сохде коре, фуьрсоре оморенигьо эри фирегьлуь мэгlлуьм сохде бренде ве мерэгълуь сохде молведешендегоргьой Догъистуре эки э кор венгесде и молгьоре.

Э гlэрей гуьрдлеме эн Гlэрейведомственни комиссие бэхшвегиргьо фегьм сохдебируьт руйбиреигьой жэгlмиете ООО «Алвиса» эри доре угьоре ихдиери э кор венгесде нишоне «Бренд «Догъисту».

Э товун кор сохдеи компание ихдилот сохди сервор эн филиал ООО «Алвиса» Мурад Гасанов. У андуьрмиш сохди, чуьки компание еки эз пушебергьой ватанлуье рынок ве эн молгьой ичкуини, филиал норе омори э дигь Чинар эн Дербенди район. Э план гуьре денишире оморени, чуьки э 2024-муьн сал вечире ве тозеден э кор венгесде миев экуьнди 40 гьозор тонн онгур.

«Иму ведешенденим жире-бе-жирее жирегьой шоробгьо, э и хьисоб имисал иму сер гуьрдейм ведешенде игристи шоробгьо. Гьемчуьн э биевгьо вэхд имуре воисдени корхонере параменд сохде ве ведешенде коньячни молгьо. Молгьой иму бирмунде оморени э е жерге федеральни дуьруьжде тукунгьой Уруссиет: «Перекресток», «Ашан», «Красное и белое», «Дикси» ве э унигегьош. Молгьой иму лап мэгlлумлуьни, э и товун гуьре иму руй бирейм вегуьрде ихдиери эри э кор венгесде э молгьой иму бренд «Догъисту». Имуре воисдени, чуьнки э товун гьемме коргьо, комигьореки иму сохденим ведешенденки моле, гьеммейки дануьт ве чуьнки бренд мэгlлуьмлуь бу неки э мескен республике, оммо гьемчуьн э гъирогъгьой энуш. Везифей вегуьрдеи ихдиерире эри э кор венгесдеи и нишоне – фирегь мэгlьмлуь сохде молгьоре ведешенде оморенигьо э Догъисту»,- ихдилот сохди Мурад Гасанов.

Нишон «Бернд «Догъисту» веноре миев э ведешенде оморенигьо молгьо, э упаковкегьо, этикеткегьо; э тэгlрифлуье верзуьшдореи молгьоре, э и хьисоб бирмунденки молгьоре э бирмунушигьо, ярмаркегьо, ве э де фикиргьош фурухденки молгьоре; э гуьнжо овурденки жигегьой фурухдеи молгьоре ве жигегьоре эже бирмунде миев молгьо. Э бренд нуьвуьсде миев «Догъисту». Чуьтам гуфди министр корхонегьо ве алвери эн Республике Догъисту Низам Халилов, гьемме фуьрсоре оморигьо молгьо э эрзоревоз эз нуминей компаниегьо доре омори разименди эз региональни министерствой экономике, министерствой сафари, министерствой дигьлуье хозяйство, гьемчуьн эз Агенство э товун сэхьибкори ве инвестициегьо эн Республике Догъисту.

Фикиргьой хуьшдере э товун дореи ихдиерире эри э кор венгесдеи нишон компаниере «ООО «Алвиса» гуфдирет министр дигьлуье хозяйство ве хуреки эн Республике Догъисту Мухтарбий Аджеков, министр сафари ве эн хэлгъие шекуьллуье мэгlрифетгьо эн Республике Догъисту Эмин Мерданов, жигегир эн

рэхьбер Агенство мэгlлуьмети ве дофуси эн Республике Догъисту Аслудин Магомедов, жигегир эн рэхьбер Комитет э товун онгурчигьи ве молгьой ичкуи эн Республике Догъисту Ахмед Ахмедов, сернуьш эн Жэгlмиетлуье палате Догъисту Азизбек Черкесов.

Бэгъдовой пуьруьшсохи гъобул сохде оморебу комиссионни гъэрорноме э товун дореи ихдиерире эри э кор венгесде нишоне «Бренд «Догъисту» эн Республике Догъисту ООО «Алвиса». Министрествой корхонегьо ве алвери эн Республике Догъисту компаниере миду руьхсет э товун дореи ихдиерире эри э кор венгесдеи нишоне э тогlин сохде оморигьо тегьеревоз.