Э шегьер Дербенд гирошди суьфдеи межлуье фуьрсореи оголзерегоргьоре э гъэд поизие оголзереие кампани 2025-муьн сале. Тозеоголзерегоргьо, комикигьо вихде омори лешгерие комиссариатевоз шегьергьо Дербенд, Дагестански Огни ве Дербендски улке, рафди эри гирошде зурие лешгерие гъуллугъсохи.

Лешгерие комиссар Фарид Мусаев мэгIлуьм сохди, чуьки 19 жовонгьо э куьнде вэхд пур мисоху жергей сухопутни лешгер Уруссиете. У гьемчуьн риз кешири, чуьки оголзерегоргьо нисе мибу фуьрсоре э жейлее чапарлуье мескен гировундеи жейлее лешгерие операци.

Межлуьс рэхьсохдеи гирошди э бэхшвегириревоз жэгIметие идорегьо ве нушудорегоргьой районни, шегьерие хьуькуьме. Жигегир серворе Дербендски районе Садир Эмиргамзаев войге сохди оголзерегоргьоре э номусевоз берде гъуллуъсохире.

Сернуьш Несиете имамгьоре районе Адиль -хаджи Кеибов руй бири эки тозе оголзерегоргьо э хосдеиревоз, бирмундеи тигъэте э вожиблуьи дошдеи беинлуье гъиметлуьигьо ве хубе жейлее фикиргьо э вэхд гъуллугъсохи. У войге сохди жовоне одомигьоре сэхде жунсогъи, барасигьо э шинох биреи лешгерие гIилме ве шолумие асму э сер ишу.

Сернуьш Союзе келетегьо Дербендски районе Гусен Ягшибаев ихдилот сохди э оголзерегоргьо ёровурдигьо э товун гъуллугъсохи эн хуьшде ве дори бугьолуье несиетгьо, комики бинеден э хуьшдение синогъи. У огол зери жовонгьоре эки гуьнжолуьи, хьуьрметлуьи эки келетегьо ве дуь э еки кумеки сохдеи э четиние гъозигьо.

Бэгъдовой бегьемини межлуьслуье беделе оголзерегоргьо согъбоши гуфдиреи э гъовумлуьгьо ве куьндегьо, вегуьрди песини несиетгьоре э пушой рафдеи эки жигей гъуллугъсохи.