Имбуруз, 29-муьн ноябрь, э мейдун РГВК «Дагестан» гировунде миев чоримуьн дузе риз э сервор регионевоз Сергей Меликовевоз.
Дузе риз бирмунде миев э: РГВК «Дагестан», ГТРК «Дагестан», ННТ, э телеграм-каналгьо эн Сервор РД ве РГВК «Дагестан», гьемчуьн э радиостанциегьо: «Страна гор», «Радио России» э Махачкале, «Прибой», «Ватан» ве «Столица».
Иму дениширейм кейки миданим доре гереклуье пуьрсуьшгьоре э рэхьбергьой регион ве вегуьрде жугьобгьоре.
Биейт э ер биорим, чуьтам гировунде оморебу пушотеине дузе ризгьо. Пушотеине салгьо бирмунди, чуьки э дузе риз доре оморебу экуьнди 4500 пуьрсуьшгьо, эз комигьоки эри се сэгlэт эн дузе риз рэхьбер республике жугьоб дори э сер 40 пуьрсуьреи оморебугьо пуьрсуьшгьо. Руйбиреигьо фуьрсоре оморебу э нум сервор регион э жире-бе-жирее каналгьой ологъи. Экуьнди 60% эз угьо э хьисоб веноре оморебу э социальни сетьгьо.
Гировунде оморигьо фегьмсохи эн гирошдигьо салгьо бирмунди: экуьнди пенж гьозор пуьрсуьшгьо, у вэгlэдо диреморебугьо эз одомигьо, расиребу э энергетике ве оводу сохдеи мескенгьоре, гъонунлуьи, ЖКХ, э рэхьгьо, соводи ве дошдеи жунсогьире. Эри омборе пуьрсуьшгьо гъэрорноме офде оморебу. Гьер руйбиреире фегьм сохдебу органгьой веровунденигьо хьуькуьм ве муниципальни соводигьо.
Эз гьемме омборте руйбиреигьоре фуьрсоребируьт одомигьой Махачкале, песде – одомигьой Каспийск, эн Дербенд ве эн Дербентски район.
Э гlэрей бинелуье гъосуьтгьо гьемчуьн гьово гуьрде оморебу гъосуьтгьо, ологълуь гьисдигьо э оводу сохдеи мескенгьоре ве ЖКХ.
Сергей Меликов жугьоб доребу э сер пуьрсуьшгьо э товун э кор венгесдеи э регион программей догазификациере, э товун четинигьо э электрорасундеи ве гlоврасундеиревоз, жирелуье кумеки сохдеи э шуькесде одомигьо, э и хьисоб зиед сохдеи проект социальни таксире, гирошде э нэгъдесуьзе пулдореи эри гъуллугъгьо ве молгьо, меселен э сферей сафари, хуб гъуллугъ сохдеи омборетебэгъэе хунегьоре ве овхьолет э куьнди хунегьо деригьо мескенгьоре, коргьой эн рэхьбергьой компаниегьоре ве ТСЖ, жейле э тозе вокурде оморигьо хунегьо.
Гьемчуьн одомигьо гуфдиребируьт фикиргьой хуьшдере. Гьечуь, э видеопуьрсуьш хуьшде жэгlмиетлуье корсох Кайрав Кагерманов хосди тозеден сохде буьруьнже духдере «Духдер э гуьлгьоревоз». И скульптурере сохдебу архитектор Анатолий Ягудаев ве норе оморебу э ен школе №1 э Махачкале, ве е ченд салгьо пушоте у дуздире оморебу.
«Эри эни чуькле сенгъ пул офде миев ве у тозеден э жиге норе миев»,- жугьоб дори Сергей Меликов. (торих эни сенгъ еровурди э хьэшдимуьн верэгъи.)
Гьемчуьн бу ижире пуьрсуьшгьо, комигьоки гье бирден гъэрор сохде оморембу э студие.
Гьемме пуьрсуьшгьо фуьрсоре оморигьо э «дузе риз» тигъэтсуьз мунде ниев, э и хьисоб диреморенигьо э эфир. «Дузе риз варасде нисе оморе э жугьоб дореи э сер фуьрсоре оморигьо пуьрсуьшгьо. Иму гьемме руйбиреигьо фегьм мисохим. Э и куьнде вэгlэдо, чуьтам сохде оморебу пор, э товун вэгlэдой гъэрорномей эни пуьрсуьшгьоре э гьемме одомигьо мэгlлуьм сохде миев»,- гуфди сервор республике бэгъдовой гирошдигьо дузе риз.
Боворинлуь биренуьм, чуьки имбуруз одомигьой Догъисту гье гене мидануьт вегуьрде вожиблуье жугьобгьоре э сер доре оморигьо пуьрсуьшгьо, имидлуь биренки э хэрлуье гоф сохдеи э сервор республикеревоз. Дениширейм жугьобгьо э сер вожиблуье пуьрсуьшгьо!
