Абдулмуслим Абдулмуслимов сер кешири лешгерие-ватанхогьие бинелуье мескене «Авангард» э бине ДГУНХ. Сернуьш Хьуькуьме Догъисту Абдулмуслим Абдулмуслимов гъиметдии коре лешгерие-ватанхогьие бинелуье мескене «Авангард», комики гьисди э бине Догъистуние хьуькуьмлуье университете хэлгъие сэхьиблугъире э Махачкале.

Бинелуье мескен дерсо хьозур сохдеи дананидореи школеигьоре ве студентгьоре бинегьоре серсуьфдеие лешгерие хьозуьрлугъи, гировунденуьт лешгерие-спортивни корисохигьо ве э гуьнжо овурденуьт вохурдеи жовонгьоре э келетегьоревоз СВО.

Гьекки э вице-премьеревоз Муслиме Телякавовоз ве серворевоз ДГУНХ Ахмеде Бучаевоз премьер фегьм сохди хундение аудитории бинелуье мескене ве гьеймогьоинее гьемхуней зигьисдеи е ченд одомигьо эри студентгьо. Премьер риз кешири вожиблуьи коре бинелуье мескене, комики веровунде везифегьоре эсер лешгерие-ватанхогьие несигIэтдори.

«Иму биё э гуьнжо биёрим гьемме герекие минкинигьоре эри несигIэтдореи ватанхогьире э веромореие эрхэгьо. Бинелуье мескен «Авангард» — гье у вожиблуье жигеи, эже жовонгьо вегуьрде дананигьоре, хутеигьоре ве минкинигьо вегуьрде синогъи келетегьоре. Ижире войгегьо муьхткем сохдеи бесдеи эрхэгьоре ве э гуьнжо овурде э жовонгьо гьисе жугьобдорлуьире э песой вилеет эн хуьшде»,- риз кешири Абдулмуслимов.