Имбурузине игид эн ме 11 салагьи. Владимир Мигиров зигьисдени э Москов, у хундегор 4-муьн класс ДШИ (гIэили школе мэгIрифети) нум Леониде Ковлере ве 5-муьн класс жэгIмисоводлуье школе.
Эз зуине гIэили кук зигьисди э гъулебенди музыкантгьо, гьелбетте эхи у гьисди кук сенигIэткорлуье тербиедорегор вокали Марине Мигировой, комики тербие дори э омборе мэгIрифетлуье жогьиле мэгIнихунгьо э у хьисоб ве дуьдуь эн хуьшдени кукгьо. Э товун Павел, бебе Владимире, иму и пушогьо нуьвуьсдейм.
И пушо вэхд, э сереботи бежиде бэхшвегири э фестивальгьо ве боржбери мэгIнихундегоргьо, гьемиге хэвлетсуьзие э театр, Владимир гирошди э хунеи хундеи жире.
Дуьлхоши гIуьзет сохде, чуьки жогьиле мэгIнихун ве возирегор дарафди э нуботноме лап раче гIэилгьо Уруссиет э фикир журнале «Мибу герми». Ини чуьтам Владимир шинох сохде омори э и дофусзереи: «Жофохосдегор, мэгIрифетлуь, мигьровуне, сарафменд, тербиевегирдегор э музыкальни школе э класс фортепьяне, бердегор гIэрейхэлгъие боржбери э вокали, возирегор десде ДМТЮА (гIэили музыкеи театр жогьиле возирегор), тербиевегирдегор спорте (симовзереи), мэхьшево сохде эри бире мэгIлуьмлуье мэгIнихундегор, возирегор ве архитектори рэхь гьовуни».
Владимир гъобул сохди бэхшвегири ве вегуьрди дипломгьо гIэрейхэлгъие боржбери жогьиле музыкантгьо «Суьхьурлуье лира», гIэрейхэлгъие фестивале-боржбери мэгIнихундеи мэгIрифети «Астараофдореи мэгIрифетгьо», гьемиге «Дуьи гIэили фестивале мэгIрифетгьо-2024». Чуьтам гIуьзет сохди э бирмунуши хуьшде сервор ДШИ нум Л.Ковлере Анастасие Кладинове, тербиевегирдегор музыкеи школе эну вегуьрди обортее гъэдер бэхшгьо э фестиваль. Э гъэд угьо ёъини сервори жиге ве сэхьиб гран-при бисдо Владимир Мигиров – текебури музыкеи школе угьоре.
«Эри ме гье у бэхш бири лап бейхэберлуь. Ме поисдем э песой перде, э гъэд екигегьо бэхшвегиргьо фестивале. Ве инжо гье бирден мэгIлуьмети доре нум эн ме ве фамилере ве хосди ведарафде э сегьне чуь бердегоре ве сэхьиб гран-при. Ме бирем эгъуьлсуьз шор э у товун»,- э ёр овурде жогьиле бердегор.
Э гьонине вэхд Владимир Мигиров хэвлетсуьзи э сегьнегьо Театре нум Пушкине, Театре эстради ве Московии хуне музыкии. Э томоше «Пеппи Дуразе журуб» у веровунди роль жогьиле туземце, гьемиге гъобул сохди бэхшвегири э возиреи «Республике Шкид». Еки эз ведилуье эн у возиреи – Мише Щербенин э томоше «Низом эвир», эже сервори роль веровундени мэгIлуьмети возирегор Викторие Исакове. Суьфдеи гиле томоше «Низом эвир» э бирмунуши Игоре Теплове гирошди 12-муьн ноябрь 2023-муьн сал.
Э и зуригьо Владимир Мигиров э рэхь офдоре гьеммееки э десде театр э бирмунуши томоше э Екатеринбург. Иму войге сохде жогьиле возирегоре бэхдевери хьэвес!
