Сервор Догъисту Сергей Меликов гировунди вохурдеи э рэхьберевоз Федеральни идоре дерьёгьие ве нуькереие транспорте Андреевоз Тарасенко. У омори э регионт эри бэхшвегири э вохурдеи уруссиетие ве ирански сенигIэткоргьоре э иловле дерьёгьие транспорте.

Сергей Меликов шолуми гуфдиреи Андрее Тарасенко э Догъисту, бирмунде хубе синогъи гьемкоркиире э идорегьоревоз. Жирелуье тигъэте у бирмундеи э гъосуьт хьозуьрлугъи корсохгьоре э иловле гIовие транспорте.

«Вохурдеи эн иму бири берекетлуье, иму э пушо норейм дуь эекиревоз корисохигьо. Эсер кими рэхьгьо коргьо уже гировунде оморе. Ишмуре согъ бошит э песой дуь эекиревоз коре. Эхи гьисди порте, жигей вадарафдеи эки дерьёгь ве нисе гьисди минкини доре гIэилгьоре герекие э республике соводи, мибу бидузи»,- бирмунди сервор регионе.

Махачкалински дерёгьие фурухдение порт – теклуье нисе бее зереие дерёгьие порт Уруссиете э Каспие. Эри параменди эну гереки сенигIэткорлуье корсохгьо э Догъисту. Унегуьре э гьевелие сал бири гъобул сохде гъэрорноме э товун гуьжолуьи дерёгьгешдеие хундение жиге э республике дуь эекиревоз э Росморречфлотевоз.

Э Догъисту э бине Колледже мошиневокурдеи ве гъуллугъи э нум Орджоникидзе веди бири тозе рэхь хьозуьрлугьи сенигIэткоргьоре симов зереие гъэдере эри гIовие транспорте: судобердегогьоре, электрикгьо ве судомехаников. Уже вегуьрде омори гьеммей герекие гьишдеие когъозгьо. Эки хундеи уже сер гуьрди 75 хундегоргьо.

Эзуш бэгъэй, э вохурдеи С.Меликов ве А.Тарасенко э пушо нори бинелуье рэхьгьоре параменди Махачкалински дерёгьие фурухдение порте. Э песини мегьгьо корхоне бирмунде хубе бирмунушигьо э сер дегиши дуьруьжде шелегьоре, жейле семенде. Гьемчуьн рафди расири лап дуьруьжде э песини 10 сал доруние гъэдер дегиши тэхуьле. Э 2024-муьн сал темизе гъэзенж порте зевер бири э 2,8 гиле, э кор венгесди эн угьо зевер бири э 45 %.