2-муьн сентябрь С.Меликов гировунди гуьрдлеме э товун вожиблуье пуьрсуьшгьо. Пуьруьш сохде омори хьозуьрлугъи эки еклуье руз сесдореи э Догъисту; хьозуьр сохдеи объектгьой ЖКХре эки поизи-зимисдуне вэхд; дешендеи мэгIлуьметигьоре э Еклуье хьуькуьметлуье хьисоб эн хунегьо; чорегьо эри гъонунлуь сохдеи кор эн гешдеофдегоргьо тебиетлуье овгъотгьоре э мескен Догъисту.

Сервор регион сер гуьрди эз корлуье гъэрорномегьо, Сергей Мликов мэгIлуьм сохди э товун нореи Игид Уруссиете, бэхшвегире эн суьфдеи презедентски программе «Вэхд игидгьо» Темирлан Абулатимове веровундегор гъэрхундигьой министре эн миллетлуье политике ве коргьой дингьой эн Республикей Догъисту.

Т.Абуталимов эз е сал омбарте хунди дануьсди синогъи эн хьуькуьметлуье рэхьберисохире, синогъи вегуьрдебу э органгьой хьуькуьм, бэхш вегуьрдебу э вохурдеигьо э гъовумгьой лешгерчигьоревоз, дуь э екиревоз э жэгIметлуье идорегьоревоз рафдембу э муницапальни соводигьо.

Кор сохдембугьо э жигей министр Энрик Муслимов норе омори меслэхьэтчи эн Сервор РД. Чуьтам гуфди 29-муьн август сервор Догъисту гъобул сохде омори гъэрорноме э товун нореи Арсен Гаджиеве веровундегор гъэрхундигьой рэхьбере эн Хьуькуьмлуье хунелуье инспекциере.

Э товун хьозуьр биреи эки еклуье руз сесдореи э Догъисту э гуьрдлеме э товун вожиблуье пуьрсуьшгьо ихдилот сохди рэхьбер Администрацие эн Сервор ве Хьуькуьм РД Махач Омаров.

Э еклуье руз сесдореи эз 12-муьн те 14-муьн сентябрь э мескен Догъисту гировунде омори 609 муниципальни вихденигьо коргьо.

Эз 205 бэхшвегиргьой эн жирелуье гъовхолуье операцие омбарте воисдени бэхш вегуьрде э вихдеигьо.

Вихденигьо компание мигирору э шеш шегьергьо ве э 38 муниципальни районгьо. Э е жерге муниципалитетгьо вихде миев серворгьой дигьгьо – ижире компаниегьо мибу 21.

Эри кумеки сохде э вихденигьо комиссиегьо э гуьнжо овурде омори республикански корлуье десде, э комики дешенде омори гьемме мерэгълуье органгьо. Э гуьнжо овурде омори ухшешие муниципальни штабгьо.

Э вихденигьо мейдун э остров Чечень эн Кировски район эн Махачкале 31-муьн август эз вэхд зуте гировунде омори сесдореи депутатгьо эн шегьер Махачкале.

Э вихденигьо мейдунгьо норе омори гьемме гереклуье оборудование.

Э гуьнжо овурде омори корпус эз 1700 хуте сохде оморигьо жэгIметлуье фегьмсохгьо.

Сергей Меликов гъуллугъ дори 10-муьн сентябрь ихдилот сохде э товун бегьем хьозуьр сохдеи муниципалитетгьоре эки гировундеи еклуье руз сесдореире.

Э товун хьозуьрлуьгъи эки гермидоренигьо вэхд ихдилот сохди министр вокурдеи ве ЖКХ эн республике Бахтияр Уллаев.

Гъуьч сохде миев хунегьо, 481 котельнигьо, 17 меркезлуье гермидоренигьо жигегьо ве дегиш сохде миев кугьне инженерни сетьгьо.

Гъуьч сохде омори 370 котельнигьо ве 12 меркезлуье гермидоренигьо жигегьо. Гъуьч сохде омори эз 160 км. товгьой гIови ве гъуьч сохде омори эз 29 км. канализационни сетьгьо омбарте, гьемчуьн 27 км. гермидоренигьо сетьгьо.

Чуьнки гьеммише кор соху котельнигьоре э план гуьре денишире оморени ки хьозуьр сохде миев зиедие сухунденигьо молгьо: экуьнди 14,4 гьозор тонн куьмуьр ве 196 тонн мазут.

Э гьемме шегьергьо ве районгьо тогIин сохде омори плангьой коргьо э товун хьозуьр биреи эки поизи зимисдуне вэхд.

Эри зу жугьобдореи э белкине мибугьо хэребегио э муниципалитетгьо э гуьнжо овурде омори 57 десдегьо эз 285 одомигьо э 80 тек жирелуье техникеревоз эри нисд сохдеи хэребеигьоре.

Рэхьбер республике гъуллугъ дори мэгIлуьм сохде э товун хьозуьрлуьгъи эки гермидоренигьо вэхд те 15-муьн сентябрь.

Сервор министерствой тебиет эн регион Ратмил Расулов бирмунди доклад э товун чорегьой гъонунлуь сохдеи гешде офдеи тебиетлуье овгъотгьоре ве поисдеи э гършуй гъонунсьзе гешде офдеи тебиетлуье овгъотгьоре э регион.

Гьееки э министерство тебиет РД ве УФНС э Республикей Догъисту э 2024-муьн сал эз гешде офдеи тебиетлуье овгъотгьоре э бюджет республике диремори 50,8 млн монетгьо налоггьо, э 2025-муьн сал и бирмунуши зевер бири те 72,8 млн монетгьо. Эри песдеине зиед сохдеи налогови бинере министерство гировундени кор э товун гъонунлуь сохдеи гьисдигьо гъэдергьой гешде офдеире.

Э гIэрей фегьмсохие коргьо, гировунде оморенигьо гьееки э корсохгьой МВДревоз, административни жугьобдорлуьи доре омори 1468 гъонунепузмишсохдегоргьоре, эз 7 млн монетгьо омбарете норе омори штрафгьо. Эри нисд сохдеи гъозиегьой гъонунсуьзе гешде офдеи тебиетлуье овгъотгьоре э республике э гуьнжо овурде омори гIэрейведомственни корлуье десде гьееки э ихдиергъэлхэндлуье органгьоревоз.

Диеш е вожиблуье гъосуьт – вишелуье пожаргьо.

Э республике э рузгьой форигъэти борж берде оморембу э вишелуье пожаргьоревоз. Лап четине овхьолет гьисди экуьнди дигь Гимры э Унцукульски район, эже пожар, э песини даннигьо гуьре, бири э 21 гектар омбарте.

Сергей Меликов гъуллугъ дори расире э дорун кор э товун те бирени нисд сохде вишелуье пожаргьоре ве дори гъуллугъ хьозуьр сохде пуьрсуьш восдореи беспилотникгьоре эри куьшде пожаргьоре э сер догъгьо.

Э гуьрдлеме сервор Догъисту талаб сохди расире э дорун кор эн гъонунсуьзе вокурдеигьо э тебиетлуье богъче «Зеверие Гуниб».

Гуфдире оморени э товун омбаретебэгъэе бено, комики вокурде оморени э више э Гунибски район. Хори доре оморебу э киро эри вокурдеи муьхькемсуьзе вокурдеигьоре.

Оммо э жигей асанте вокурдеигьо э кировегуьрдегор сер гуьрди вокурде сетебегъэе бено э чордогъевоз ве гьомборевоз э монолитни каркасевоз. Мейдун эну – 960 кв.м. – э дуь гиле зевертеи эз э проект гуьре ихдиер доре оморигьо.

Сервор регион бирмунди э кор не сохдеи жугьобдорлуье органгьоре: не администрацие район, не назарлуье ведоствогьо тигъэтете не доребируьт э вокурдеи эз 2024-муьн салевоз.

Сервор регион дори е жерге гъуллугъгьо, э и хьисоб – гировунде фегьмсохи кор човушгьой администрациере эн Гунибски районе ве диеш фегьм сохде Комитете э товун вишелуье хозяйство: очугъ сохде, чуьтам хоригьой эн вишелуье фонд доре омори э киро эри вокурдеи.