Сервор Догъисту Сергей Меликов гировунди дуь эекиревоз гуьрдлеме Республикани оголзерение фегьмсохи ве Зутеине штаб РД.
Бинелуье тигъэти – хьозуьрлугъи эки э пушо дерие поизи оголзереи, коминики сер гуьрде миёв э гьемме вилеет 1-муьн октябрь.
«Зевери Серворирехьбер гъул кешири буйругъ э товун гировундеи оголзереире ватандашгьоре э довгIои гъуллугъ, ве иму сер гуьрденим э кор венгесдеи угьоре. Э июль, кейки иму гировундейм эхирлуье фикир васалине оголзереи кампание, ме бирмундем тигъэти э у, чуьки поюнде э гуьнжо овурдеи оголзереире э довгIои гъуллугъ имуре нисе бу. Вэхд э гIэрей дуь кампаниегьо иму миё бу э кор венгесде эри э гуьнжо овурде коргьо довгIои-хьисобсохи ве оголзереи комиссие, эри ёгъини дануьсде зигьисдежиге ве хэбер доре оголзерегоргьоре. Унжо, эже жугьобдорлуье одомигьо э вэхдгирошдеи гьемме сал кор сохде э товун гье и пуьрсуьшгьо, четинигьо э оголзереиревоз нисди ве ни бу»,- риз кешири Сергей Меликов.
Э товун хьозуьрлугъи довгIои комиссариатгьо эки поизи оголзереи мэгIлуьм сохди врио довгIои комиссар республике Замирбек Курабеков.
Сер гуьрде эз себэхьине руз ве те 31-муьн декабрь догъистунигьо миё бу оголзере оморе эри гъуллугъсохи э Ерэгъленмише Гъувотгьо Уруссиет, погранични гъушунгьо, гьемиге екиге гъушунгьо ве лешгерие гуьнжуьндеигьо. Фуьрсореи лешгерие десдегьо сер гуьрде миё бу эз 15-муьн октябрь
Эз гофгьой Замирбек Курабеков, э гьонине вэхд хьозуьрлугъие жерге коргьо бегьем сохде мибу. Э у хьисоб овурдеи гьер чи овгъот, желдлуь кор сохде оморени э мэгIлуьмети ватандашгьоре.
Бинелуье жирелуье поизие оголзереи мибу э кор венгесде хьуькуьмлуье мэгIлуьметие система «Еклуье нубот лешгерчие хьисоб» (ГИС ЕРВУ). Э рамке эну минкини мибу гуьнжуьнде оморе электронни повесткегьо ве фуьрсореи хэбер э товун угьо оголзерегоргьоре эз интернет э хьуькуьмгъуллугъ.
ДовгIои комиссариат республике ве гуьрд сохде оморе пунктгьо эри гировунде оголзереи жерге коргьоре хьозуьри. Гьееки э уревоз бегьм веровундени тапшуьрмиши э хьозуьрлугъи сенигIэкор эри ДОСААФ.
Замирбек Курабеков гIуьзет сохди, чуьки бинелуье четини, эри веровунде кор оголзереи комиссиеревоз, мунди дузи не бирмундеи зигьисдение жиге оголзере одомигьо.
Сервор Догъисту гъуллугъ дори сернуьшгьой оголзеренигьо комиссиегьоре дуь эекиревоз э военкомгьоревоз гировунде методически тапшуьрмиши э корсохгьой довгIои-хьисоби гьемме хьуькуьмлуье идорегьоре э товун пуьрсуьшгьо хьисоб сохи ватандашгьоре оголзереи гIуьмуьрлугъи.
Жигегир Секретарь Совети Секонеисуьзи РД Дайтбег Мустафаев хэбер дори э товун хьозуьрлугъи хьуькуьмлуье идорегьоре эки гировундеи оголзереи.
У ихдилот сохди э товун хуте сохдеи гуьрдбиреи э сернуьшгьой оголзереи комиссиегьо, довгIои комиссаргьоревоз хьуькуьмлуье идорегьо, сернуьшгьоревоз жейлее жигегьой хьозуьрлугъи ве оголзереи ватандаш э довгIои гъуллугъ довгIои комиссариатгьо хьуькуьмлуье идорегьо, духдиргьоревоз, рэхьбергьой кор э медициние фегьмсохи оголзерегоргьо, ве сенигIэткоргьоревоз э сенигIэткорлуье психологи вихдеи гуьре. Э гуьрдбиреи бу нушу дореи эхирлуье фикир васалине оголзереи кампание ве норе омори везифе э хубте сохдеи кор лешгерчие хьисоб ве э гуьнжо овурде поизи оглзереи кампание.
Дайтбег Мустафаев гуфдири э товун гьисдигьо кемсуьги ве фикир дори рэхь эри угьо гъэрорноме.
Сервор республике гъуллугъ дори зиёд гъувотдореи вэхьзилуье кор э могьлугъэвоз ве э вэхд ю гереки вешенде мэгIлуьметие баннергьо, э товун гъуллугъсохи э ерэгъленмише гъувот.
Гьееки э уревоз Сергей Меликов согъбоши гуфдири э у рэхьбергьой хьуькуьм, комигьоки жугьбдорлуь биренуьт эки норе везифегьо, э у хьисоб серворгьо Карабудахкентски, Акушински дигьгьо, шегьер Махачкале.
«Кор тевэгъэ нисе поюнде. Мере нисди бибоворини, чуьки иму миверовуним везифегьоре, коминигьоре э пушой хуьшде норейм, э герек гьисдигьо вэхд»,- гуфдири э эхир Сергей Меликов.
