Сервор Догъисту Сергей Меликов вохурди э сервор Михайловски округевоз эн Запорожски область э Вячеслав Бедняковевоз. Угьо пуьруьш сохдет кор эн сенигIэткоргьой Догъистьуре э подшефни район, плангьо ве тарафгьой песдеине кумеки дореире.
Вячеслав Бедняк омори э командировке э Догъисту эри пуьруьш сохде э кор венгесдеи жирелуье инфраструктурни проекте э и ве э оморенигьо салгьо.
Сергей Меликов гуфди: республике ве песдеш кумеки мисоху э одомигьой эн тозе регионгьо вокурде зиндегунире э хори хуьшде.
«Имуре гуьнжуьнде омори гъэножогъи э район-хьовир имуревоз чуьтам э 53 муниципалитетгьой эн республикей имуревоз. ГIэилгьой иму, комитгьоки гъуллугъ сохденуьт э унжо, э келе мугьбетевоз ве разилуьиревоз гъэножогъи биренуьт эки эни хори. Имуре лап хьэз оморе, кейки эки иму эз унжо оморенуьт гIэилгьо, келетегьо. И жирей корисохи э кор венгесде омори ве гирошдени би бэхшвегири иму»,- гуфди Сергей Меликов.
Вячеслав Бедняк согьбоши гуфди эз республике эри гьеммишеине кумеки дореи.
«Эри иму Догъисту неки регион-шефи, у регион-хьовири. Э хотур бирорие кумеки дореи иму дануьсденим омбарте сохде, иму эркуль биреним э уревоз, ки имуре гьисди ижире хьовиргьо. Э ижире везифегьо, комигьореки иму норебирим эз сер суьфде, фикир сохденуьм, иму мирасим»,- гуфди у.
Гереки э ер овурде, э 2023-муьн-2024-муьн салгьо Догъисту гъуьч сохди 38 объектой эн социальни ве инженерни инфраструктурере э Михайловски округ, чуь минкин дори хубте сохде гьоимлуьи зиндегуни одомигьой эн муниципалитете. Гъуьч сохде омори школегьо, больницегьо, омбаретебэгъэе хунегьо, вокурде омори офис МФЦ, гировунде омори товгьой гIови, векенде омори артезиански буругъгьо, норе оморени газови котлы ве диеш.
Имисал денишире оморени ки гировунде миев коргьо э 21 объектгьой эн социальни-инженерни инфраструктуре ве э се объектгьо, сохде оморенигьо эз 2024-муьн салевоз. Гьемчуьн э плангьо дери гъуьчсохи гIовенапорни гъэлечегьоре, бунгьой эн омбаретебэгъэе хунегьоре, хунегьой базургендире ве форигъти вегуьрдеире. Гьемчуьн оводу сохде миев мескенгьой эн е жерге школегьо. Э 18 объектгьо сер гуьрде омори вокурденигьо-монтажни коргьо. Угьо гировунде оморенуьт э график гуьре.
Эзуш бэгъэй, э Михайловски муниципальни округ гьеммише гьисди хэеребеигьоре гъуьч сохденигьо десдегьо, комики гьеммише веровундени кор эн коммунальни комплексе. Эри хьозуьр биреи эки зимисду э 2025-муьн-2026-муьн салгьо э план гуьре денишире оморени ки норе миев енебуге дегиш сохде миев 8 дуьруьжде тиенгьо э чор объектгьо.
Э товун мэгIнолуьи эн жэгIмие гъэдергьой коре Сергей Меликов гуфдиребу ве э вэхд эн фуьрсореи хуьшде э парламент. Эри гьеммишеине кумеки дореи Михайловски округе Сергей Меликове доре омори орден «Эри верзуьшигьо э пушой Запорожски область» эн 1-муьн риз. Буьлунде хьуькуьметлуье бэхш уре дори Вячеслав Бедняк.
Сервор регионе гьемчуьн доре омори бэхшгьо эри желдлуье граждански позицие, мэгIэнолуье дешендеи хуьшде э тозеден сохдеи социальни инфраструктурей Михайловски округе эн Запорожски областе ве эри дошдеи торихлуье еровурдире э товун пуч биретгьо э салгьой эн Буьзуьрге довгIой Ватани. Эзуш бэгъэй, медальгьо «Эри верзуьшигьо э пушой Михайловски округ эн Запорожски область» эри желдлуье жэгIмиетлуь корисохи, эри хубе гъэножогъи эки михьтожигьой одомигьо ве эри хубте сохдеи хошлуье зиндегуни одомигьой эн Михайловски муниципальни округе, доре оморебу сервор эн Министерствой вокурдеи РД Бахтияр Уллаеве ве гьемкоркигьой эн Администрцие Серворе ве Хьуькуьм РД, назари сохденуьтгьо пуьрсуьшгьой кумеки сохдеи э тозе мескенгьой Уруссиет.
Эри хэйрлуье еклуье корисохи ве эри сенигIэтлуьи Вячеслав Бедняке доре омори сэгIэт эн Сервор РД.
