Гировунде омори вохурдеи сервор Догъисту Сергея Меликова ве жигегир сернуьш Госдума Виктория Абрамченко, гьисдигьо э регион э гъуллугъие омореиревоз.
Угьо пуьруьш сохдет пуьрсуьшгьо параменди миглеи сенигlэткорлуье соводи ве сферегьой сафари.
Шолум гуфдиреи э гъуногъ, С.Меликов гlуьзет сохди: «Сафарчигьо Догъисту бежид той сохде Дербенд, э комининиге гъэдер э дерьёгьевоз, оммо э песини салгьо хьэрекети веноре параменд сохде сафари ве э догъгьо. Гьелбетте, сафарчие инфраструктуре э у жире, э комини иму хьэрекети сохденим, мунди гьелелуьге э пушо норе везифегьо, оммо, гье генешки имисал гузет сохде зиёдсохи сафарчигьоре».
Эз гофгьой рэхьбер регион, параменд сохдеи сафарире ми бу кумекии доре э гуьнжолуьи тозе сафарие жигегьо.
Э гье у гуьро Сергей Меликов риз кешири гереки хьозуьрлугъи сенигlэткор эри сафарие корисохи: «Сафари – у гьисди жире корисохи, оммо эри гьер кор сенигlэткор миё бу хьозуьр э гьемме зевер биреи риз».
Гьечуь, Догъисту гьисди бэхшвегир э проект «Сенигlэткорлуь»: бердет чор заявке, э гъэд коминигьо гуьнжо омори 2 соводие кластер миглее сенигlэтлуье данани – «Хозяйствой дигьбони» ве «Сафари». Э 2026-муьн сал миё бу вокурде оморе гене «Мошиневокурдеи» ве «Хэбер дорение технологиегьо». Эзуш бэгъэй, э бинелуье мескен Хоригъуллугъсохие колледж гуьнжо овурди соводи-мол ведешендение бинелуье мескен «Хозяйствой дигьбони», оммо э бинелуье мескен Догъистухьуькуьмуниверситет хэлгъи хозяйство – соводие кластер «Сафари ве сфера гъуллугъ». Гье и проектгьоре гуьрд сохденуьт соводие идорегьо ве корхонегьо, игърол бесде омори, э гуьнжо овурди корисохи жейлее мескен.
Зуте Виктория Абрамченко сер кешири Колледж сафари ве сервис ве Сенигlэткорлуь-тербиедорение колледж ве шинох бири э параменди Каспийски экуьнди гъирогъи кластер.
«Ишму э десдеревоз лап омборе кор сохдейт. Ишмуревоз вегуьрде омори лап гурунде рэхькори. Э товней имбурузине повестке, корсохгьо гьэгъигъэтиш гъэрор норе э гьемме. Иму сер кеширейм дуь колледже. Гlэмел миёв игидлуь гуфдире, чуьки угьо, ки гьерчуь бисдо сохдени э у рэхь кори, хуб кор сохдени,- гlуьзет сохди у.
Э гъэд екиге гъосуьтгьой пуьруьшсохи – веровунде эксперимент э товней э ихдиёри дореи гъуногъхонегьи гъуллугъгьо э гъуногъи хунегьо. Догъисту дарафди э рэгъэм пилотни регионгьо, эксперимент гировунде оморени эз 1-муьн сентябрь гирошденигьо сал те эхир 2027-муьн сал.
Хьэвес миё бу дануьсде расунде секонеисуьзи ве ихдиёри гъуногъгьоре гъуллугъи гъуногъхонегьоре, зевер сохде налогови вечиреи э гьемшегьери бюджетгьо.
Гъонун э товун гировундеи эксперимент э Догъисту фегьм сохде миёв э Хэлгъи Гуьрдлеме э октябрь.
Сергей Меликов согъбоши гуфдири э жигегир рэхьбер Госдума э доре тигъэти э республике ве уре гьисди имид э барасилуье кор э товней дуь эекиревоз гъэрорномегьо.
