Э товун эну мегIлуьм сохди Сернуьш Хьуькуьме Догъисту э меслэхьэт э журналистгьоревоз Абдулмуслим Абдулмуслимов э артгьоревоз шинох биреи э корисохиревоз вокурдеи се школгьо э Карабудахкентски улке.

Гье у, э и гъэдер, 3 тозе бохчей гIэили ве омборте дегьи школгьо. Тозе школгьо, комикигьо дешенде оморе э везиферевоз те эхир сал, ниет сохди э омборте 5 гьозор хундегоре жигегьо.

Чуьтам мэгiлуьм сохди Абдулмуслим Абдулмуслимов, э гъэдэгъэ зереи Серворе РД Сергее Меликове э республике э 2021-муьн сал бири гировунде хьисобсохи гьеммей вокурде оморигьо жэгIмисоводлуье идорегьо ве объектгьо тешколеие соводире э везиферевоз дануьсде гереклуьигьоре э тозе сохдеи инфраструктурере. Э песой песини салгьо дануьсде э жиге оморе овурде э вожиблуье овхьолет эки 60% гьисдигьо школгьо – гье у вокурдеи тозе школгьоре ве дуьруьжде гъучсохи куьгьне школгьоре, комикигьо гьисди э зобуне овхьолет.

«Э песой песини салгьо вокурде омори омборте 100 социальни объектгьо, коре зиёд сохде. Иму уре гировунденим э гъэд веровундеи миллетлуье проектгьоре. Имбуруз иму шинох бирейм э корисохиревоз вокурдеире э 3 школгьо э е гъэдер мескен Карабудахкентски улке. Имидлуьи вокурдеире гъимете норе гьуьндуьр. Гьисди кимигьо «гъэлетигьо», комикигьо мибу дуз сохде э куьндлуье вэхд. Имбуруз имуре гьисди пуре гьеймогьоине хэбер, эже, ве э комини могьлугълуье жиге, э коми овхьолет гьисди соводие идоре. Эз и нуботноме иму бирмундеи тигъэте у идорегьоре, комикигьо вожиби э суьфдеи нубот гъуьч сохде енебуге вокурде э жигей эну тозере.

Вокурдеи тозе школгьоре – вожиблуье дешендеи э биёвгьо республике. Гье у неки хубте биреи соводие иловлере, оммо ве зевербиреи риз гъэдерлуьи зиндегуни могьлугъэ, муьхькем сохдеи минкинигьоре жовоне эрхэгьоре ве дореи тен-бе-тение минкинигьоре эри гьеммей гIэилгьо. Тозе гьеймогьоине хундение идорегьо кумекии доре э гуьнжо овурде синогълуье корсохгьоре, комикигьо кумекии доре параменди экономикере ве культурере регион эн имуре»,- гуфдири Абдулмуслим Абдулмуслимов.