Сернуьш Хьуькуьм РД Абдулмуслим Абдулмуслимов гъобул сохди бэхшвегири э межлуьслуье вохурдеи гъуногъгьоре эз Белгородии область, оморе расиригьо поездогьо э махачкалеи рэхьговуние вокзал.

Э гъэд оморигьо – гьисди экуьнди 600 одоми, гье э у хьисоб 536 гIэилгьо, угьонигейге – рэхьсохдегоргьо, тербиедорегоргьо, деде-бебе.

Э гъэдэгъэ зере Сервор Догъисту Сергее Меликове гIэилгьоре жиге доре мибу э приморские гIэили лагерь «Офтоини гъирогъ», Гьемиге э школегьо-интернатгьо Махачкале ве Дербенд. Э вэхд зуте идорегьо бири хьозуьр сохде оморе э гъобулсохи гIэилгьо.

Э вокзал бири гъэгъигъэтлуье гьово мигIид: кумекии сохдегоргьо ве желдилуье одомигьо рэхь «Суьфдеигьо» хьозуьр сохди шолуми нуьвуьсдигьо баннергьо, пуфдеди ве бэхшгьо эри гIэилгьо. Угьо хьэрой сохди эри белгородигьо «Гьеммише оморемун ишму э Догъисту!», гьемиге кумекии сохди берде расунде чейтенгьоре те автобус. Гъуногъгьо оморе расиреки А.Абулмуслимов гоф сохди э оморигьо гIэилгьоревоз ве эн угьо рэхьсохдегоргьоревоз.

«ДивэгI жун хуьшдере чуь э хуне хуьшде!»,- гуфдири сервор-министр дорумие республике, ихдилот сохди э сернуьш школе – келеи рэхьсохдегор десде Людмиле Тарасове э товун, чуь республике хьозуьрлугъи гъобулсохи гъуногъгьо.

Э жугьоб дореи Людмиле Тарасове гуфдири, чуьки э суьфдеи нубот гузет сохде эз омореи динжи.

«Э ён имуре гьисди экуьнди 287 гIэилгьо, комигьоки гьейсэгIэт рафдени э «Офтоини гъирогъ». Угьонигейге бедел гIэилгьо мибу доре жиге э Махачкале ве э Дербенд. Иму рафдейм э гузети гьэгъигъэти динжи, э суьфдеи нубот. Э хубиревоз пушо норе фикир имуре воисде не энжэгъвегуьрде хоши эз форигъэти, оммо ве тербиевегирие коре не поюнде. ГIэилгьоре герек мибу бегьем сохде те эхир чоримуьн чорек, екем имуревоз у бири егIэлмиши э сереботи э уревоз, чуь согъэ чорек иму кор сохдейм дистанционни. Оммо иму хьозуьрим геммере инжо бегьем сохде!»,- хэбер дори келеи рэхьсохдегор десде, сервор Комсомольске СОШ Белгородски областе Людмиле Тарасове.

Э меслэхьэт э нуьвуьсдегоргьоревоз Сернуьш Хьуькуьм РД Абдулмуслим Абдулмуслимов ихдилот сохди, чуьки гьемме оморигьо гIэилгьо эз Белгородски область гьис сохде хуьшдере хуб, хьол эн угьо – лап хуби. Э рэхь гешдеи эри эн угьо бири гуьрд сохде хорундеи.

«Э сереботи мэгIлуьмлуьи гъозие-гъэдер эн иму бирорьети Белгородии область, эже неинсонгьо сергуьрди туьфенгшени шолуме мескенгьо, э у вэхд, кейки беди э ён бирорьгьо имугьо, иму – эки эн угьо.

Сернуьш Догъисту Сергей Алимович Меликов гье бирден вегуьрди гье у пуьрсуьш э фегьемгери, э гуьнжо овурди зутее штаб, эже дарафди рэхьберсохгьо гьемме хьуькуьмлуье гъуллугъсох, гьемиге содогъолуье тегьер кумекисохдегор ве э войгей хуьшде гуьре.

Эри жиге дореи гIэилгьоре имуре гьемме хьозуьр сохде омори, угьоре мибу жиге доре э се мескен. Э бюджет Догъисту иму пушоки дире дануьсде герек гьисдигьо овгъотгьо эри э гуьнжо овурде жиге гIэилгьоре, хьозуьри кумекии сохде содогъолуье тегьере фондгьо. Иму меслэхьэт сохдейм э рэхьсохдегоре одомигьоревоз – гьемме гIэилгьо хьушдере гьис сохде хуб, хьол, ведини – хуби!»,- мэгIлуьм сохди Абдулмуслимов.

А.Абдулмуслимов бэшгъэ согъбоши гуфдиреи э войгей хуьшде гуьре кумекисохдегор республике э товун хьозуьр биреи кумекии сохде:

«Согъбоши эн имугьо кумекисохдегор ве жовонгьо, комигьоки жугьоб дори ве э гуьнжо овурди у вохурдеире». Поезд э одомигьоревоз эз бирорьетии Белгородии область гьеммееки э Сернуьш Хьуькуьм РД вохурде омори ве жигегир Сернуьш ЖэгIмиетие Гуьрдлеме РД Юрий Левицкий, Сервор Махачкале Юсуп Умамов, рэхьберсохгьо органгьо хьуькуьм, желдилуь «Рэхь Суьфдеигьо», корсохгьо МЧС ве МВД, Урусгвардии, психологгьо ве медицине корсохгьо.