Буйругъевоз Серворе Республике Догъисту Сергее Меликове э песой верзуьшигьо э пушой республике, келе омонети э ватанхогьие несиг1этдори жовонгьоре, комикигьо рафде расире жофолуье барасигьо ве рэхьменомуслуье коре Людмила Хизгиловна Авшалумова бэхшире Орденовоз Г1ьзете Республике Догъисту II гъэдере.

Людмила Хизгиловна, татски жэг1миет ве гьемкоркигьо республикански жэг1миетие-политически гозите «Ватан» дорундуьли омборекбу сохде Ишмуре э и г1уьзетлуье хьуькуьмлуье бэхшевоз.

Дуразе рэхь бири гирошде, кем нисдие гъэдер дешенде гъувотгьо ве вэг1эдо, оммо гьинор ве ветрони дузгунлуь гьемме хьэрекетигьоре. Э лап келе сикелуьревоз э дуьл омборекбу сохденим э вегуьрдеи бэхше, комики Ишму верзуьшлу!Бигьил у зиёд сохде боворини э барасигьо биёвгьо коргьо, бинелуьи, гьишде сикеи сохдеи ве верзуьшигьой эн хуьшдере.

Эн Ишму жофо ве мэг1рифет дузгунлуье вегуьрди гьуьндуьре э гердевегири, Ишмуре дануьсде ве гъэдуьрдан неки э республике, оммо ве э песой Догъисту.

Ижире одомигьо чуьтам Ишму гьисди меселеневоз сикеи республике ве гьэгъигъэте гъувот Уруссиете.

Эн Ишму хьохомлуьи, жунлуье рачи ве гьуьндуьре культуре гьисди нишоне эри вогогьруши, доруние чэхьи ве г1эжоиблуье зиндегуние желди огол зере хьэйрон сохдеире.

Гьелбетте, Ишмуре гьисди хубтее чигьрет догъистуние зене.

«Гъуллугъи сохдеи Ватане, муьхькем сохде бинелуье гъонуне республике, несиг1этдори вероморение эрхэгьо э беин ватанхогьи г1уьзет сохди зиндегуни хуьшдере Людмила Хизгиловна.

Боворини, чуьки Ишмуре гьисди фирегьутегьерлуье дананигьо, г1ошире синогъи, гуьнжуьндеие энергие ве песде мибу кумекии доре гуьлишонлуь бире республикере»,- бирмунди С.Меликов.

Войге сохденим Ишмуре жунсогъи, барасигьо ве хьэвес э песдеине коргьо э хушхьоли гъовумлуье Догъистуре ве гьеммей Уруссиете!

Бигьиил эн Ишму барасигьо зиёд сохде, бэхдевери рэхь сохде Ишмуре э зиндегуни.