Еки эз очугъэ ве омборте сер кеширение жигегьо э ПМЭФ бири дуьруьжде утогъ «ВиноГрад». Э и сал э дуьруьжде утогъ нушу доре омори жейлее жиге догъистуние шоробчилугъи «Дербенд Шороб».

Э вокурде оморе хуреклуье жиге, г1уьзетсохие онгурчигьире ве шоробчилугъире, нушу доре минкини дэг1эм чире дануьсде молгьоре мэг1луьмлуье шоробчилугъи Уруссиете.

Э товун эну, комини молгьо шнох сохде омори э гуьрдлеме, ве э товун параменди коргьой онгурчигьигьо э дорумие республике Уруссиет э журналистгьо ихдилот сохди Сернуьш Хьуькуьме Догъисту Абдулмуслим Абдулмуслимов.

Э меслэхьэт эн хуьшде премьер-министр э ёр овурди, чуьки Догъисту гьисди э рэхьбери Уруссиет эсер доруние гъэдеревоз корхонегьо – регион вечире 42% эз жэг1мие гьеммей вечиреигьо онгуре э Уруссиет ве 90% уруссиетие коньяке. Э бюджет республике гьер сал дарафде эз 5 те 7млрд монет эз сэхьиблугъи.

«Иму рафде расирейм торихие дуьруьжде барасире э бэгъдовой советие жиге ве вечири э гьевелие сал 301 гьозор тонн онгуре. Онгур эн иму герекии чуьтам э хуреклуьи, гьечи ве технологически фурухдение жиге, ве уже сеимуьн сал дуь э песой еки эз жигегьой ПМЭФ иму бирмунденим молгьой эн имуре. Имбуруз иму шинох бирейм э фурухдение жигегьоревоз. Гьемчуьн иму жейле чуьтам гъирогъдекие дениширегоргьо гоф сохдейм э дэг1эм чире дануьсдегоргьо, эри чуь очугъ сохде гъиметдии эн угьоре молгьоре: угьо хьэйрон бире хубиревоз молгьоревоз дербентски корхонегьоревоз. Имуре кумекии доре ве Минсельхоз РФ, эзу товвокурдейм ун ки эгенер нисе бире субсидирование, параменди ни еки хоригъуллугъсохие сэхьиблугъи нибу. Кейки иму вокурдейм Комитете Дагвино, иму вегуьрде 126 млн монет э субсидирование, имбуруз имуре дори субсидие уже 1 млрд монет. Гьееки имуре рафде вокурдеи зиёд кор сохдеие корхонегьо ве гьомборгьо»,-гуфдири Абдулмуслимов.