7-муьн апрель, гировунде омори келе гуьрдлеме э зир рэхьберьети эн В.В.Путин э товун овхьолет э Догъисту.
Президент иму гъуллугъ дори э гуьнжо овурде жирелуье хьуькуьметлуье комиссиере э товун ниссохи эзуновлейге бире гъозиегьой эн сайловгьоре э республике, комики гъэрор мисоху гьемме хьэсуьл оморенигьо пуьрсуьшгьоре.
Кейки хэребеигьой тебиет вегуьрдени эз одомигьо лап бугьолуире, вожиблуьни гьис сохде гьеммише герме ве дорундуьлие гъэножогъи эн сервор хьуькумете эки догъистонигьо. Ве гьеммей иму гьис сохденим – э гьер зутее гъэрорноме, э гьер чорей кумеки сохдеи. В.В.Путин хуьшдени ю гъэрор сохдени и четинире.
Иму эз гьемме мигирорим. Э хуьшде мидировуним гIэдотлуье зиндегунире ве э одомигьо мивогордуним хунегьой энугьоре ве боворинире э себэхьине руз.
Эз суьфдеи рузгьо гьемме идорегьой эн Хьукуьм Уруссиет гьемтарафлуь кумеки сохденуьт. Иму гьис сохденим имидлуье душ эн куьнде гъуншигьоре ве эн униге районгьой эн келе вилеет имуре. Оммо четине овхьолет мундени. Э пушо – келе кори э товун ниссохи эзуновлейге бире гъозиегьой ЧС ве кумеки дореи э зараливегуьрде одомигьо.
Э президент ихдилот сохдем э товун гирошденигьо овхьолет э омбар зарали зере оморигьо муниципалитетгьо, эже дешенде омори режим ЧС. Бэгъдовой суьфдеи шар хэребеи иму дануьсдейм хуб сохде овхьолете, оммо дуьборее келе ворушгьо гье гене овурди эки четинигьо. Хэйф, гьисди пуч бирегоргьо. Гье гене хэйфбери сохденуьм э гъовумгьо ве одомигьой эн пуч бирегоргьо. Гьемме гереклуье кумеки э угьо доре оморени, ме гъуллугъигьо дорем.
Гъуьчсохие коргьо гировунде оморени, кор сохдени комиссие эри гъиметдии заралире, э кор венгесде омори омбаре овгъотгьо – эз 1,3 гьозор одомигьо омбарте ве 241 тек технике, э и хьисоб вертолет эн МЧС Уруссиет.
Лап вожиблуьи – и мерэгъгьой одомигьои, Ме э Сервор хьуькуьмет мэгIлуьм сохдем, ки кимигьо зараливегуьрдегоргьо э вэхд ю э гуьнжо не овурдет ихдиери сэхьиблуьре эри хуней хуьшде. Имогьой иму гешденим минкин кумеки сохде э и одомигьо эз бюджетсуьзе жигегьо – тип-тек э четинигьой хуьшдеревоз угьо нимунуьт.
Владимир Владимирович гъувот дори гьемме чорегьой имуре ве дори зиедие гъуллугъигьо федеральни органгьой хьуькуьме – эри чуь келе согъбоши эзу.
Жейлее тигъэт Сервор хьуькуьмет дори э хьозуьрлугъи эн гьемме гъуллугъигьоре эки тозе шар эн гьово дегуьрдеигьо, э товун комики гуфдиренуьт синоптикгьо. Гьемме республикански органгьой хьуькьм кор сохденуьт лап хуб.
Е бойгеш эз нуминей догъистонигьо согъбоши гуфдиренуьм эз Владимир Владимирович эри гъувотдореи э и четине вэхд. Иму бовор сохденим, ки эз гьемме четинигьо иму мигирорим.
