Сервор Догъисту С.Меликов гировунди гуьрдлемей зутее штабе э товун нисдсохи ЧС. 5-муьн апрель хэребеи тебиет э тозе гъувотевоз зери э Догъисту. Одомигьо зури-зури гировунде оморебу э де мескениге. Энжэгъ э Дербентски район эз жигегьой секонеи э гьелелуьгее жигегьо ведеберде оморебу экуьнди чор гьозор одомигьо.
Зу кумеки сохденигьо гъуллуьгъигьо нисд сохденуьт эзуновлейге бире гъозиегьоре ве фегьм сохденуьт мескене эри варасире жэхитгьоре.
Рэхьгьоре темизсохдегоргьо темиз сохденуьт рэхьгьоре эз офдоре оморигьо сенгъгьо, эз хори лов бире фурамореигьо ве эз унигее хэребеигьо.
Э хэребе биригьо дигьгьо ве шегьергьо энергетикгьо э кор венгесденуьт электрорасундеире ве мобильни ологъире.
Э зарали зере оморигьо мескенгьо кор сохденуьт духдиргьо, волонтергьо, овурде оморени гIов ве доре оморени герекие кумеки.
Кифлетгьой муьрдегоргьоре э сереботи сайловгьо кумеки доре миев эз жейлее фонд эн республике.
«Эзуновлейге бире гъозиегьо эн диине сайловгьо зобутеи эз суьфдеине шаргьо. Хэйф, гьисди муьрдегоргьо. Э кифлетгьой энугьо мие кумеки сохде биев эз жейлее фонд республике. Дир не кешире!», — гъуллугъ дори С.Меликов э гуьрдлемей эн зутее штаб э товун нисдсохи эзуновлейге бире гъозиегьой ЧС.
Гьееки э уревоз фегьм сохде миев вокурде оморигьо хунегьо э дуьразевуней нуькере. «Хунегьо поисди э дуьразевуней нуькере. Э гьисдигьо мэгIлуьмети гуьре, и хунегьоре э товун комигьоки иму имбуруз гуфдиреним, назарлуье органгьо дори разименди. Фегьм сохде оморени гъозиегьой гушесури, оммо мере воисдени руй бире эки гьекоркигьо. Мере воисдени, чуьнки фегьм сохде биев угьош, ки дори ихдиери эри вокурдеи и хунегьоре э дуьразевуней нуькере», — руй бири эки курабирегоргьо сервор Догъисту.
Чуьтам гуфди сервор Махачкале Д.Салавов, бено э кучей Айвазовски вокурде омори э омбаре гъонунепузмишигьоревоз.
«Эз вэхд зуте одомигьо эз сетебэгъэе хуне гировунде оморебу э де мескениге ве эзу товун э екиш зарали зере не омори. Иму дануьсдейм гье бирден э де мескениге гировунде гьемме зигьисдегоргьоре – зкуьнди 100 утогъгьоре, эз 300 одомигьо омбарте, 115 гIэилгьо ги ровунде омори э гьнлелуьгее жигегьо»,- гуфди у.
Бэгъдовой фегьмсохигьо гъобул сохде миев гъэрорномегьо э товун песдеине гъисмет эн хунегьо.
Э товун овхьолет э Догъисту бэгъдовой нуботлуье сайловгьо ихдилот сохди вице-премьер Р.Джафаров.
Энергорасундеи:
Товушсуьз мундебу экуьнди 220 могьлугълуье жигегьо, э и хьисоб экуьнди 48 гьозор одомигьо э сереботи омбаре гIов э подстанциегьо «Восточная» ве «Приморская» э Махачкале. «Восточная» тозеден э кор венгесде омори ди шев, э дуьимуьн гIов ведешенде оморени, гузет сохде оморени, ки имбуруз шев энергетикгьо мидануьт сер гуьрде коре ве э кор венгесде ризгьоре. Э Махачкале э кучей Айвазовски вечаруьсде омори омбаретебегъэе хуне. Имбуруз фегьм сохде миев мескен эри гъобул сохде песдеине гъэрорномегьоре.
Рэхьгьо ве мошингьо:
Ди э сереботи сайловгьо омбаре поездгьо э вэхд ю не рафди, согъ руз поездгьо рафдембу эз жуьфдлуье рэхьгьовуние риз.
Гьевел поюнде оморебу рафдеи мошингьо э 14 рэхьгьо, пенж рэхьгьо гъуьч сохде омори, имбуруз коргьо гировунде оморени э хьофд рэхьгьо, себэхь – э мундегьо.
Овхьолет э Дербенд ве э Дербентски район:
Э Дербенд э зир гIов демунди район «Аэропорт», одомигьоре жиге доре омори э гьлелуьгее жигегьо. Лов биренки Геджухски гIовдон омбаре хунегьо э зир гIов демунди, одомигьо гировунде омори э де мескениге. Э федеральни рэхь э Мамедкале э зир гIов демунди куьрпи, батмиш бири се мошин, хилос сохде омори хьофд одоми.
МЧС Уруссиет эз сер вертолет назари сохденуьт овхьолет рафдеи гIове эз Геджухски гIовдон.
Э Кайтагски район э нуькере Уллучай зевер бири риз гIов, э дигь Кирки э сереботи хори лов бире фурамореи вечаруьсди дуь хуне. Фегьм сохденки вечаруьдеигьоре офде омори меит зен. Э Карабудахкентски район эз меркез гIэили «Солнечный берег», э вэхд ю э де мескениге гировунде омори экуьнди 240 гIэилгьо.
Мобильни ологъи:
Э е жерге могьлугълуье жигегьо бурра омори ологъи, лап четине овхьолет э Дорум Догъистуни. ГьейсэгIэт гьемме оводу сохде омори.
С.Меликов э серворгьой муниципалитетгьо гуфди, ки э товун ЧС гереки мэгIлуьм сохде э зутее штаб.
Сервор регион риз кеши: овхьолете э Догъисту назари сохденуьт гьемме органгьой хьуькуьм.
Гъобул сохде омори е жерге гъэрорномегьо э товун технически ве хозяйственни коргьо, э товун кумеки сохдеи э одомигьо, э товун гирошдеи гьемме коргьоре эри доре пуллуье кумекире э зараливегуьрдегоргьо ве мерэгълуь сохдеи пулгьой эн федеральни бюджете.
«Э иму желдлуь кумеки сохденуьт гьемкоркигьо эз органгьой эн федеральни хьуькуьм. Хьозуьр мисохим пуьрсуьш дешендеи э мескен Догъисту жирей зобуне овхьолете эн гIэрейрегиональни тегьер. И минкин миду имуре пул доре одомигьоре эри зере оморигьо зарали ве эри нисд сохдеи эзуновлейге бире гъозиегьой ЧС эри хэржи сохде неки региональни пулгьоре, оммо ве пулгьой эн федеральни бюджете», — гуфди сервор регион.
Гьемчуьн у гуфди, ки гьеминон темиз сохде миев нуькерегьо Черкес-Озень ве Тарнаирке.
Э гофгьой эн С.Меликов гуьре, э шегьер параменд сохдеи мескенгьоре ве вокурдеи, мие разилуь сохде биев э гьемме гъуллуьгъигьоревоз. «Эгенер дуьразевуней эн нуькерегьо Черкес-Озень ве Тарнаирке вокурде ниомоге сайловгьо ни бисдо –гIове жигей рафдеи нисди. Иму фегьм мисохим. Угьо, ки вокурди хунегьоре э унжо, эже угьо ние бу, ве одомигьо офиретгьо секонеире, мие жугьобе дуьт.
Гъуллугъ доре омори дузетмиш сохде бюджете: гьеминон, кейки секонеи сайловгьо зофруни, сер гуьрде миев темиз сохдеи гъирогъгьой нуькерегьоре», — гуфди у.
С.Меликов э В.В.Путин ихдилот сохди э товун овхьолет э Догъисту бэгъдовой эн бигIэдотлуье сайловгьо.
Сервор хьуькуьмет гуш дошди докладгьой эн сервор МЧС Уруссиете эн А.Куренкове ве эн рэхьбер регионе. В.В.Путин гъуллугъ дори 7-муьн апрель гировунде гуьрдлеме эри пуьруьш сохде овхьолете э республике ве гьемме гуьнжолуье ведомствегьоре дори вожиблуье гъуллугъгьо эри кумеки сохдеи э одомигьо.
