Мирьян Асаилова хьэсуьл омори 4-муьн ноябрь 1950-муьн сал э Дербенд э кифлет Асаил ве Гевгид (Гегей). Бебей эну, Асаил Агиваевич, хьэсуьл омори э 1923-муьн сал. Э кифлет Асаиловгьо бири 17 гlэилгьо, оммо зуьнде мунди энжэгъ сесе. Те довгlо у варасди 7 класс ве бухгалтери курсгьо, кор сохди бухгалтери э ЖКХ. Э 1943-муьн сал огол зере омори э Гъирмизине Гъушун, гъуллугъ сохди чуьклеи сержант э жейлее пулемётни-артеллерийски десде. Вогошди энжэгъ э 1947-муьн сал, эзуновлейге кор сохди нуьвуьсдегор э Грозненский военкомат. Деде, Гевгид (э духдери Осипова), - духдер Миши ве Хибо Осиповгьо. Гъовумгьой келедеде Хибо веровунди кор шоробчилугъи.

Кифлет Асаиловгьо зигьисди э мэхьэлей жугьургьо э Дербенд те 1930-муьн салгьо, песде кучмиш бирет э куче Ленина №80. Инжо гирошди жогьиле салгьо Мирьян, коминире э шегьер дануьсденуьт чуьтам Мина. У тербие вегуьрди э школе №3, оммо песини класс хунди э школе №8.

Э 1967-муьн сал Мирьян дарафди э хундеи э Дербенди педагогически училище. Варасди бегьем сохди э 1971-муьн сал ве кор сохди пионервожатеи, песде тербиедорегор серсуьфдеи классгьо э школе №18.

Э 1972-муьн сал э оголзереи сернуьш интернат №2 Юрий Матвеевича Рафилова у гирошди э кор несигlэтдорегор. Гье и бу имидлуь: Юрий Матвеевиче бу келе хьуьрмет.

Кор несигlэтдорегор бу лап жугьобдорлуь. Герек бу себэхьмунде вэхуьзунде гlэилгьоре, хьозуьр сохде угьоре эки школе, рэхь сохде э дерсгьо, песде – э гуьнжо овурде вэхд форигъэти: э гешдео рафдеи, книгхуни, шекулькеши, меслэхьэтгьо. Э интернат зигьисди 600 хундегоргьо, тербие дорегоргьо бири кем. Э 1978-муьн сал Мирьян бисдо тербиедорегор серсуьфдеи классгьо.

У гьеммишелуьг тербиевегуьрди: э 1992-муьн сал дарафди э заочное отделение Догъистуни педагогически университет ве варасунде бегьем сохди уре эз шеш салиге, евэхдие дуь эекиревоз тербие вегуьрдеи ве кор сохди. Мирьян Асаилова те имогьоиш бофолуьи э сенигlэт хуьшде ве интернат. У хьисоб сохде, чуьки суьфдеи тербиедорегор миё бу неки хутесохдегор нуьвуьсде ве книг хунде, оммо ве кумекии доре г1эилгьоре бовор сохде э хуьшде. Хундегоргьой эну э ёр гуьрде вомухундегор хуьшдере: вохурденуьт э куче, омборекбу сохденуьт э мигlидгьоревоз. Бешгъэ герм у э ёр овурде Энвера Наджафова, духдире-офтальмологе.

Дегиш бире зиндегуни, дегиш бире ве жирей хундегоргьо: гьевел э интернат зигьисдет гlэилгьо эз омборегlэили кифлетгьо, имогьой – угьо, деде-бебе коминигьо э гурунде овхьолет дебирет.

Кифлет хуьшдере Мирьян не гуьнжуьнди, оммо желдлуь бэхшвегири сохде э зиндегуни бирорзерегьо, ве гlэилгьой угьо. Э зиндегуни эну бири гурунде вэгlэдогьо, вирсохигьо: зу рафди эз зиндегуни бироргьо Агиво ве Ильдот, бедбэхди телеф бири бирорзере Анатолий. Гье и дерд дери э дуьл ю. Эз деде Гевгид у мироси вегуьрди гирьесохи эри муьрдегор.

Э келе муьгьбетевоз Мирьян дошде ёргири э товун келетегьо ве кифлети торихлуье мироси - меселен, гьер чигьоре эн келедеде Кистомон Авроом Азарья. Эну кифлети альбом пурлуь гьисдигьо жирелуье сиротгьоревоз: гьисди сиротгьо эз вэхд Суьфдеи гlуьломлуье довгlо, довгlои сиротгьо гъовумгьо ве дурине гъовумгьо. У хьозуьр нисди доре гье и жовогьилетгьоре э музей – угьо гьисди бедел зиндегуни эну.

Мирьян – желдлуье одоми жэгlмиет дин-догlоти, уре дуьлпесои доре гьонине вэхд ве биёвгьо гьемватанигьо. У вокоширени вожиблуье пуьрсуьшгьо, меселен, э товней вес не биреи митошур ве гирьёсохгьо э динлуьигьо гуьро. Э гъувот ю гуьро у хуьшден ю кумекии доре: хьозуьр сохди куьндлуье зенгьоре э гъовре сохдеи, э битехьэим сохдеи гирье сохдени э товней муьрдегьо.

Гlуьмуьрлугъи дорени э товун хуьшде дануьсде, оммо Мирьян Асаилова не винире зиндегуни хуьшдере корсуьз ве бэхшвегирисуьз э дербенди жэгlмиет дин-догlоти.

Воисдени хосде эри эну муьхькемлуье жунсогъи, омборе сал ве гъувот!

СОБКОР

Тержуьмесох Ильканаева И.