Омборте 46 гьозор гIэилгьо везифе норе жунсогъире венгесде э гъэд гьеминоние кампани э Догъисту э 2026-муьн сал. Вице-премьер Муслим Телякавов гъобул сохди бэхшвегири э гуьрдлеме эсер пуьрсуьшгьо хьозуьрлугъи эки гьеминоние жунсогъи венгесдеие кампани, гировундеи ГИА ве э товун корисохи вокурдеи объектгьоре соводи э 2026-муьн сал, гирошдигьо э зир рэхьберисохи зампреде РФ Дмитрие Чернышенко.
Дмитрий Чернышенко огол зери регионгьоре доре хьозуьрлугъи эки гьеминоние жунсогъи венгесдеие кампани ве э вэхд ю бегьем сохдеи дуьруьжде гъуьчсохигьоре э соводи.
Эсер гъэдэгъэи Серворе Владимире Владимировиче Путине веровунде оморе миллетлуье проект «Жовонгьо ве гIэилгьо», комики фуьрсоре оморе э параменди системе тербие дореи, тозе сохдеи инфраструктурере ве зевербиреи соводие барасигьоре. Э пуш-пушоки гьеминоние жунсогъи венгесдеие кампани 2026-муьн сале вожиблуье везифе – дореи секонеисуьзире, верасирение тегьере гIэилие форигъэтире. Э и сал э гьеминоние жунсогъи венгесдеие кампани мибу э хуьшде вогосунде оморе мборте 40 гьозор идорегьо. Гье у гьишдени вегуьрде экуьнди 6 млн гIэилгьо».
Муслим Теляков э ВКС гуфдири э товун хьозуьрлугъи эки гьеминоние жунсогъи венгесдеие кампани э овхьолет иловлеи ЧС э Догъисту. У бирмунди, республике хьозуьр бире эки гьеминоние жунсогъи венгесдеие кампани, комики везифе норе омори э вэхд эз 5-муьн июнь те 30-муьн августе.
Э гье у вэхд кор мисоху 377 лагергьо, эз угьо 22 – э бине эз гъирогъ шегер эулоие гьеммишеине жунсогъи венгесдеие идорегьо ве 355 лагергьо э рузине омореи гIэилгьоре э бине жэгIмисоводие идорегьо, э у гъэдер э бине вокурде оморе ве гъуьч сохде оморе школгьоре.
Э согъэвоз э гъэд гьеминоние кампани везифе норе жунсогъи венгесде омборте 46 гьозор гIэилгьо, чуь э 7 гьозор зевер сохдеи бирмунушигьо 2025-муьн сале. Э и войгегьо э республикански бюджет э 2026-муьн сал пушоки дире дануьсдеи 429,48 млн монет, чуь э 4% омборте, эз 2025-муьн сале.
Гьемчуьн э везиферевоз лап зеверие гъэдере фирегь мэгIлуьм сохдеи лешгери-ватанхогьие тербие дореи догъистуние жовонгьоре Хьуькуьмевоз Догъистуре гъобул сохде омори гъэрорноме э товун вокурдеи э и сал Лешгери-ватанхогьие бинере гIэилгьоре ве жовонгьоре «Бастион», комики э гье у э гьеминоние кампание гъобул мисоху 200 гIэилгьо.
ГIэилгьоре э гъэдерлуье тергевоз минкинигьоревоз жунсогъире э и сал гъобул мисоху 11 лагергьо (э се лагергьо зевер сохде омори гъэдере э бемзери э 2025-муьн салевоз).
Э 52 муниципальни соводигьо э гьеминоние вэхд кор мисоху гьемме 362 идорегьо кумеки сохдеие соводигьо, комикигьо миду кумекии э вегуьрдеи омборте 150 гьозор гIэилгьоре дуьлхоши дореие жигегьоревоз э жире-бе-жирее рэхьгьо. Э гIэилие жунсогъи венгесдеие лагергьо мигирору жейлее дегиши «Движение Первых», «Орлята России», «Знатоки правил дорожного движения», «Юнармеец». Э программегьо лагергьо рузине омореи дешенди э гуьнжо овурдеи сафаригьоре эсер Догъисту ве рафдеигьо э дерьёгьие гъирогъ.
