16-муьн мая э Муниципальни татски (жугьургьо – догъи) э театр э нум Манахимов Л.Я. бири суьфдеи нушудореи возире «Шогьир-Ашуг».
Э тозе бирмунуши э театр (норегор верзуьшлуье корсох мэгIрифет РД Джамбулат Габибов), бодо дореи эки 155-муьн сали хэлгъие шогьир Догъисту Сулеймана Стальского, эзуш бэгъэй достонгьо мэгIлуьмлуье литераторе бири дешенде ве эну нуьвуьсде оморе хэт. Э литературни-музыкеи гуьнжуьндеи эз хуьшде «Шогьир-Ашуг» шогьири Сулеймане Стальски ек бири э мэгIнигьо э гъовумлуье зугьун шогьире – лезгии. Э веровундеи возирегорево театре Каира Балахишиева хунде мегIнигьо э достон Стальски.
Назуьшмендлуье хьол дегиш бире э могъбуллуье, бире гурунде корисохи. Етиме гIэильети, гурунде жофо, войге дузгуне, назуьшмендлуье дивэгI жун эки зен, муьгъбет эки Ватан – гъосуьт музыкальни – литературни гуьнжуьндеи эз хуьшде, чуьтам э ноти, дегиш бире хьол эн спектакле. Э суьфдеи бирмунуши возири возирегоргьо эн театр Лиана Нагдимунова, Христина Абдуллаева, Наргиля Агаларова ве Джамиля Ибрагимова.
Э гофгьо серворе МЕТ Борис Юдаев, тозе спектакль «шогьир-Ашуг» эри лап фирегь гиргине одомигьо – эз хундегор те дениширегор вегирлуье гIуьмуьрлугъи.
«Лап омбор тозе гIэмел миёв вегуьрде эри хуьшде эз вози сохде э сегьне зиндегуни шогьир. Художественни гофевоз Стальски нуьвуьсде э товун гурунде гъозие вэхд эн хуьшде. Унегуьре бирмунуши гIэмел миёв винире ве чуьтам чуькле сафари э торих»,- гуфдире э варасдеи бирмунуши Б.Юдаев.
Омборекбу сохде корсохгьо эн театре э суьфдеи бирмунуширево, рэхьберисох культуре, жовоние политике ве спорте шегьери хьуькуьм эн серкори Смиля Наджафова э ёр овурде, чуьки лап келе бирмунде э 155-муьн сали хэлгъи шогьир норе э пушо сервор РД Сергей Меликов.
«Сервор республике нум доре эну очугъэ одоми догъистоние шогьири, э товун комики э сер зиндегуни гьейрон нуьвуьсди Максим Горький, Борис Пастернак, Николай Тихонов ве омборе еккейгегьо. Хьохомлуье мэгIнигьо эн шогьир э хуьшде ошугь сохде дуьлгьо одомигьоре. Э угьо сес сохде муьгьбет эки Ватан ве нэгIэлети э гьемме, чуьки гъэриш сохдеи верзуьшлуье зиндегуни одомигьо. Лап дуьлхоши зигьисде э республике, кейки э мейдун еки миллетлуье театре норе бирмунуши ве гIуьзет сохде очугълуье одоми еккейге миллети. Гье у гьэгъигъэтлуье интермиллетлуьи!»- гуфдири С.Наджафова.
