Гуьрдлемей ветерангьой эн шегьер Махачкале фуьрсори пенжимуьн гумманитарни кумекире эри бэхшвегиргьой эн гъовхолуье операцие.

Э нуботномей юк дешенде омори гереклуь гьисдигьо эри лешгерчигьо ве одомигьо дермугьо, молгьой хуреки, герме партал, ве гьемчуьн маскировочни тургьо. Сернуьш эн Гуьрдлемей ветерангьой Махачкале Ферезулла Кахриманов  согъбоши гуфди эз одомигьо, жейле эз соводлуье идорегьо, эри желдлуье бэхшвегири э вечиреи кумекире ве эри омбаре дешендеи э и вожиблуье кор. У риз кеши, ки волонтерски кор гировунде оморени эз сер сал ве дураз кешире миев.

«Иму э гъирогъ не поисдейм эз сергуьрдеи СВО, кумеки дореи дураз кешире миев. Воисдени руй бире эки гьемме зигьисдегоргьой республике: э и четине дэгъдэгъэгьо куьнде одомигьой иму, гъэлхэнд сохденуьтгьо секонесуьзи имуре, деруьт э гIэтошлуье жигегьо. Гьэгъигъэт эзу товун иму гъэрхундим доре гьер кумекире э минкингьой иму гуьре. И лап кеми, чуь иму дануьсденим сохде эри кумеки сохдеи э гъэхэндчигьой иму ве ералуь бирегоргьо»,- гуфди Ф.Кахриманов.

Э хьисоб бэхшвегиргьой эн гумманитарни кор дебу капитан эн Дербентски лешгерие комиссариат Ших Алиев – бэхшвегир эн жирелуье гъовхолуье операцие.

Эз хуьшде у фуьрсори молгьой хурекире ве молгьо эри темизи инсон, гьемчуьн когьозгьой гъувот дореи эз чуькле бирор ве хэгьер, деноре оморигьо э посылкегьо.

«Кейки ме винирем, чуьтам келете одомигьо – бэхшвегиргьой эн Шегьерлуье гуьрдлемей ветерангьо – э десгьой хуьшдеревоз бофденуьт маскировочни тургьоре, чуьтам хьэрекети сохденуьт кумеки сохде, э гъирогъ не мунденки, и расири э дорун дуьлме. Ижире дэгъдэгъэгьо екиреш бигIор нидануь гьишде. Денишире оморени ки э поизи фуьрсоре миев нуботлуье кумеки. Ме дануьсденуьм, чуь лап вожиблуьни э гъовхо – мэхьсгьо, герме партал ве молгьой хуреки. Мере гьисди гъовхолуье синогъи, ме хуьшдени эз гьеммей эни гирошдем ве варасиренуьм, чуь гереки лешгерчигьоре. Хьэрекети мисохум вечире ве доре гьемме лап гереклуьире»,- гуфдирени капитан Алиев. Гьемчуьн уре воисдени кумеки сохде э гуьнжо овурдеи гуманитарни десдегьре э военкомат эн Дербенд, эри кумеки сохде э лешгерчигьо бежид ве хэйрлуь.