Жигегир серворе Догъисту фегьм сохди буланмиш кеширеие эз батмиш биригьо кучегьоре, фегьм сохди корисохире тозеден э хуьшде дировундеие коргьоре ве гоф сохди э зигьисдегоргьоревоз.

Э рафдеи уре рэхь сохди жигегир серворие прокуроре Уруссиете Сергей Бажутов, премьер-министр Магомед Рамазанов ве еккейгегьо вожиблуье одомигьо.

Э Мамедкале Фёдор Щукин ве Магомед Рамазанов сер кешири бинегьоре кумекии дореигьо буланмиши кеширегоргьоре эз батмишигьо зигьисдегоргьоре.

У поисди э гьемшегьерие школе мэгIрифете. Инжо сенигIэткоргьо дори кумекии зигьисдегоргьоре, комикигьо буланмиши кешири эз беди, э у гъэдер эсер пуьрсуьшгьо дореи гъимете бедхэржире ве гировундеи угьоре э тозе жиге эри зигьисдеи.

Зуте э Мамедкале бири э гуьнжо овурде жиге эсер гъобулсохи когъозгьоре эри э гуьнжо овурдеи муьзде дореигьоре.

Фёдор Щукин согъбоши гуфдиреи сенигIэткоргьоре э песой гировунде оморе коргьо.

«Дореи гъимете бедхэржире – бинелуье везифе, гъэрорноме уре иму мисохим диеш зуте. Дуьлхоши, чуьки гьемме гье у э гуьнжо овурде омори э муниципальни риз гъэдерлуьи. Согъ боши э песой кор. Те эхир бегьем гереки сохде. ЖэгIмие везифе эн иму – бежид нисд сохде эзуновлейге бире гъозиере и бедире»,- гуфдири жигегир серворе Догъисту.

Жигегир серворе республике фегьм сохди корисохи нисдсохире эзуновлейге бире гъозие воруш-верфигьоре. У сер кешири кучере Красноармейски – еки эз омборте буланмиш кеширеие э вэхд батмиши.

Чуьтам гуфдири сервор Дербендски районе Эльман Аллахвердиев, гIове эз хунегьо ведекуьрде омори, гьейсэгIэт инжо хубте сохде е гъэдер мескене. Гировунде оморе коргьо эсер тозеден э хуьшде дировундеи инфраструктурере: гъуьчсохи инженерни тургьоре ве канализационни системегьоре.

Э жиге жигегир серворе регионе гоф сохди э зигьисдегоргьоревоз, вегуьрди э фегьм сохи хогьишигьоре. «Кумекии мидим гьеркире. Екиш нисе мунде тигъэтисуьз!»- эрзо нуьвуьсди Фёдор Щукин.

Э ёр овурденим, зуте сенигIэткоргьо гировунди еклуье фегьм сохдеи хунегьоре ве гъиметдии гъэдере бедхэржире. Э гуьнжо овурде нуботномегьоре одомигьоре, комикигьо михьтож бире э гирошдеи эз е э де жигейге.

Э гуьнжо овурде оморе герекие когъозгьо ве э пушо норе теке жейлее кумекиире.

Везифе нори кучмиш сохде э тозе хунегьо дегьигьо хунее сэхьиблугъигьоре. Эри гье у войгегьо уже доре омори е гъэдер мескен 10 гектаргьо. Э гъэд корие омореи э район Фёдор Щукин фегьм сохди хориие муьлке.

Эзуновлейге, рэхьбер республике гировунди гуьрдлемере зурие бинере эсер нисдсохи эзуновлейге бире гъозиере ЧС. Э у пуьрсуьш сохди артигьоре корие омореире.

Э гуьрдлеме гъобул сохди бэхшвегири жигегир серворие прокуроре Уруссиете Сергей Бажутов, премьер-министр Магомед Рамазанов, рэхьбергьо идорегьой хьуькуьме.

«Имбурузине омореи дори имуре лап хубе жугьоб эз зигьисдегоргьо ве нушудорегоргьой гьемшегьерие хуьшден рэхьберисохире. Лугъонде эз дорун гирошдеи ве омборе хэбергьо эсер гьемме рэхьгьо. Гьисди очугъэтегьере варасиреигьо, комини корисохигьоре гереки диеш зуте сохде»,- гуфдири рэхьбер регионе.

У бирмунди хубе коре идорегьоре хьуькуьме.

«Вожиблуь, чуьки гъобули эрзогьоре ве э кор венгесдеи угьоре гирошде э у жиге. Э имбурузине руз э кор венгесде омори 14 гьозор эрзогьо. Э и коргьо Мамедкале веди сохде меселене, чуьтам гье у кор биё бу э гуьнжо овурде ве еккейгегьо муниципальни соводигьо»,- риз кешири Щукин.

Гьемме зиёдгъувотлуьигьо, э гофгьой эн уревоз, биё бу фуьрсоре э зурие тозеден э хуьшде дировундеи хубе зиндегунире: вокурдеи хунегьоре, дореи гъимете бедхэржире, гъуьчсохи рэхьгьоре ве объектгьоре социальни-культурни э кор венгесдеире.

Жигегир серворе регионе бирмунди, чуьки вохурдеи э гьемшегьерие зигьисдегоргьоревоз бирмунди хьозуьрлугъи угьоре гирошде э тозе жиге.

Лап вожиблуьи, чуьки одомигьоре гьисди войге кучмиш бире, везифе хьуькуьмгьоре – диеш зуте сохде гъэрорномегьоре гьемме э гуьнжо овурдеие пуьрсуьшгьоре»,- гуфдири Фёдор Щукин.

Бэгъдовой гуьрдлеме рэхьбер республике жугьоб дори э пуьрсуьшгьо журналистгьо федеральни ве региональни СМИ.