Корлуье вохурдеи эн президент Уруссиет В.В. Путин э сервор Догъистуревоз Сергей Меликовевоз, гирошдигьо 6-муьн март 2026-муьн сал, бири еки эз лап пуьруьшсохие политически гъозиегьо э Софун Кавказ.
Гуйге, и бу гIэдотлуье гофсохдеи– доклад эн рэхьбер регион э товун социальни-экономически овхьолет. Оммо э пура тегьеревоз фегьм сохденки серномей гофсохире ве жугьоб эн федеральни структурегьоре веди бирени: и гофсохдеи ведарафди эз гIэрегьой эн гIэдотлуье эхире хьисоб ве бирмунди тарафгьой параменд сохдеи республикере э ченд салгьо э пушово.
Жирелуье гъэножогъи эки Догъисту
Сер гуьрденки гофсохдеире, Сергей Меликов бирмунди бинере, э сер комики вокурде оморени гъэножогъигьй Кремль ве эн Махачкале.
«Гьеммей иму дануьсденим, чуьтам мэгIнолуьни эри президент Догъисту. Уре э республикей имуревоз ологълуь сохдени гъозиегьой эн 1999-муьн сал – жэгIмие торих иму ве жэгIмие бесгъуни иму»,- гуфди сервор регион.
И неки гIуьзет сохдеи еровурдиреи. И бирмундени э у, чуьни Догъисту эри В.В.Путин – неки еки эз 89 субъектгьои, оммо и мескени, комики гьееки э уревоз гирошди фегьмсохире э муьхькемлуьи 25 сал пушоте. Жейлее тигъэт гереки доре гъозиере, э товун комики гьебелки гуфдире ниомо, оммо гъэгъигъэт у эз гьемме хубте бирмундени хэйрлуьи гофсохире э суьфдеи одоми хьуькуьметевоз. Суьфде Сергей Меликов э президент э товун экономике ве вокурдеи ихдилот не сохдебу, у ихдилот сохдебу э товун беди эн догъистоние гьйсохгьо эн келе мошингьо мундетгьо э серхьэд Иран. Овхьолет, гереки э ер овурде, лап зобу бу. Чуьтам мэгIэлуьм сохдембу СМИ, Азербайджан бэгъдовой зереи беспилотникгьо э Нахчыван сэхд сохди рэхьэ эри келе мошингьо э сэрхьэд э Ираневоз. Ведиремореире эз Иран гузет сохдебируьт экуьнди гьозор мошингьо, дарафдеире – экуьнди 150, омбаре мошингьо эн догъистонлуье бердегоргьо бу. Шофиргьо э желе демундет: пулгьо ве сухунденигьо молгьой энугьо эдембу варасде, оммо юкгьо э емишгьо ве хьэвуьжгьоревоз, берде оморембугьо э Уруссиет, мидануьст пуч бире.
Э гофгьой эн С.Меликов гуьре, президент гье бирден жугьоб доребу. Э нуботлуье руз екем мошингьо сер гуьрдуьт гирошде э мескен Азербайджан, ве песде хьуькуьм эн Азербайджан гъобул сохди гъэрорноме вокурде серхьэде э Ираневоз эри молгьоребердегоргьо. Министерство эн мошингьой Догъисту тогIин сохди вокурдеи рэхьэ эз серхьэдлуье рэхь Астара.
Экономически блок: дуьруьжде барасигьо ве келе проектгьо
Бинелуье бэхш доклад эн Сергей Меликов гIуьзет сохде оморебу э барасигьо эн пенжсали. Э песини пенж салгьо э Догъисту э кор венгесде омори 12 гьеймогьине молведешенденигьо корхонегьо, вокурде омори 111 школегьо ве 97 богъчегьой гIэили, гъуьч сохде омори 374 школегьо ве 63 богъчегьой гIэили. Э сферей дошдеи жунсогъире вокурде омори 121 фельдшерски-акушерски жигегьо, гъуьч сохде омори 329 объектгьо, медицински идорегьо вегуьрдет эз 3 гьозор тек тозе оборудование омбарте.
Жейле жиге доре оморебу дуьруьжде барасигьой эн хоригъуллугъсохгьо. Э 2025-муьн сал Догъисту эз 1980-муьн салевоз расири э буьлуьнде бирмунушигьой вечиреи онгуре – 302 гьозор тонн, ве бегьер вечире омори экуьнди 295 гьозор тонн.
Оммо вожиблуье тигъэт эки гирошдигьо верзуьшигьо доре не оморбу, доре оморебу эки биевгьо проектгьо. Сергей Меликов ихдилот сохди э товун шеш дуьруьжде хьэвесгьо, э кор венгесде оморенигьо э гъувотдореи эн федеральни меркезевоз:
— Каспийски гъирогъдерьегьлуье кластер;
— вокурдеи комплексгьоре эри кор сохдеи э хокоруревоз;
— гIовбердеи «Чиркей – Махачкале – Каспийск»;
— темиз сохдение дуьруьжде вокурдеигьо э Махачкале;
— вокурдеи рэхьэ э гъирогъ Дербенд, Хасавюрт ве Махачкале;
— программе параменд сохдеи Дербенде.
Э гIэрей вохурдеи С.Меликов руй бири эки президент э хогьиширевоз э товун зиедие пулдореи и проектгьоре экуьнди 20 млрд монетгьо.
Э и зуригьо мибу бараси
Э гофсохдеи э президентевоз С.Меликов гьемчуьн ихдилот сохди э товун четинигьо э энергорасундеиревоз э ремпублике.
«Гьееки э гъуьчсохдеи кугьне биригьо сетьгьоре, иму параменд сохденим тозе тарафгьоре – республике э гIэрей пушобергьои э Уруссиет э товун э кор венгесдеи «савзе» энергетикере, вокурденим офтолуье ве кулуклуье станциегьо, инвесторгьо эки иму оморенуьт»,- ихдилот сохди сервор регион.
Президент и плане бегенмиш сохди ве имиди дорени эри хубте биреи.
Э гофсохдеи гьемчуьн гуфдире оморебу э товун базургенди ве эн гIэрейхэлгъие гъэножогъигьо. С.Меликов э ер овурди, ки э эхир март э Дербенд бэгъдовой тозеден вокурдеи вокурде миев Азербайджански хьуькуьметлуье музыклуье-драматически театр. Бено э 150-сале торихевоз, деригьо э мэгIлуьмлуье куче «Куче эн мозоллуье одомигьо», тозеден сохде омори. Проект э кор венгесде омори э гIэрей хьуькуьметлуье программе «Еклуье мескенлуье параменд сохдеи шегьер Дербенде».
Гьемчуьн гуфдире оморбу э товун гъувотдореи бэхшвегиргьой эн жирелуье гъовхолуье операциере. Э инжо рэгъэмгьо гуфдиренуьт хуьшденишу: эз 41 гьозор тонн омбарте гуманитарни молгьо фуьрсоре оморебу э жирелуье гъовхолуье операцие, восдоре омори технике ве снаряжение. Оммо вожиблуьи – и кор э одомигьоревоз.
Программе «Вегирлуьи догъгьо», э товун комики ихдилот сохди С.Меликов и жирелуье тегьер эри Уруссиет мерэгълуь сохдеи ветерангьоре э шолуме зиндегуни. Хьофд бэхшвегиргьой эн жирелуье гъовхолуье операцие норе оморет э жире-бе-жирее жигегьо э органгьой хьуькуьм ве рэхьберисохи.
Бинелуьи, чуь гуфдири С.Меликов: «Омбаре пуьрсуьшгьо, комигьореки иму гьово гуьрдебирим омбаре салгьо, эхирдеш эз жиге жуьмуьсди ве и зуригьо миду бараси, комиреки э хуьшде микешуьт гьер кифлет э Догъисту» И имиддореи имогьой бирени бинелуье везифей кор эн гьеммей республикански хьуькуьм.
Вохурдеи гировунде омори. Гофгьо гуфдире омори. Кумекии вегуьрде омори. Имогьой гоф э песой коргьои.
