Гьовойтуь чуьтами? Нубогьойтуре сохдей? Дендугьойтуьре темиз сохдей? Гьечи омореники, иму омбаре пуьрсуьшгьо дореним гlэилгьоймурэ. Оммо чендгъэдериму э ишурово ихдилот сохденим? Эз зиндегуни, эз одомигьо, эз хосиетой одомигьо, эз дусди не муьгъбети? Оммо, не денишире э сал, ишу мидануь дузе фикиргьо сохде, гьеле сер иму мидануь неведарафде унгъэдер хуб эз вэхдсуьзиму …

Имбуруз ихдилотчиму бири Иосиф Нагдимунов – хундегор 4-муьн класс эз Дербенд. Иосиф э и зури мигировуни дегь сали хуьшдере. Чуь фикиргьо оморе э эгъуьл Йосю- хубхундегор, келе бирор хьофд сала Ганна, каратист, шахматист, гъоволзерегор, вежесдегор, программист, ененге чуьтам нум хуьшдере гуьрдиге «гlэдотлуье бала»?

— Йося, гуй, ки э и гlуьлом асанте зигьисде гъуллугъ енебуге келетегьо?

Гьелбетте, гlэилгьо. Чуьнки гlэилгьо эдет гировунде хубе вэхдгьо зиндегунире. Ишуре гьисди вэхд эри хундеш, эри вози сохдеш, эри гешдеш э гъовум-гъэрдешово. Ченд гъэдер мэгlлуьмети иму эдейм дануьсде гьер руз! Оммо келетегьоре вэхд кеми. Гьеммише вес нисе сохде. Ишуре эз кор песде гереки гlэилгьоре не хуьнере гъуллугъ сохде. Эришуь четин бире. Меш, келе биренки, асант нибу эриме. Гереки дошде кифлет хуьшдере, гъуллугъ сохде …

— Фикир сох, Иосиф туьре гьисди тилисимлуье чубугъ. Туь митай 3-доне метлеб хосде? Чуь михосди туь?

— Гlэильети омбар бу. Дураз кешуь … Одомигьо екире не куьшуь … Довгlо не бу …

— Туь чуь фикир сохде, зри чуь гереки хьовиргьо?

— Гьемме одомигьоре гереки хьовиргьо. Бегьем мибу хьовирсуьз зигьисде?! Хьовир – кумекчини. Ишу гьеммише кумек мибошуьт. Э четине мэхэл э ёнеки мибошуьт. Туь тэхьно нибоши. Хьэйф туь хуб мибу. Мере, меселен, омбаре хьовиргьои. Э и зури руз хьэсуьл омореимени. И меселеи: чуьтам гировуним?! Эхи мере омбаре хьовиргьои! Гьеммере войсте огол зеним. Гьебелки, гереки келе дуьруьжде утогъ …

— И мибу суьфдеи келе юбилей. Пушой дегь сали гьисди туре эз чуь сере тик бини э зиндегунитуь?

— Ме эдем сике сохдеки хундем омбаре китоб, иллогь эз хьэйвоно, омбар данустенуьм эз товун угьо. Бебе-дедейме гьемише гуфдиренуьт эз ме, гереки омбар дануьсде, омбар хунде. Меш эзиновле эдем хьэрекет сохде. Эриме гьербой мерэгълуьни хунде не дануьсде тозе кор. Иллогь эз товун хьэйвоно.

— Эгенер туь мидануьдиге чарусде э хьойвон, кире мивижири туь?

— Гlуьлом хьэйвони гlошири! Гьебелки, ме мибисторуьм сег жинс добермани. Гьерчуьге у эн соймише жинсмени? Эрчуь сег? Чуьнки у лап дуьруьсде хьойвони. Гьич вэхд ни шенуь туьре. Гьер мэхьэл э тараф одомигьои. Гьеле ишуьре лап раче жирей жендек вери.

— Оммо гьерчуь гьисди одомигьоре хош оморе эз сег не пишик?

— Чуьнки ишуре рэхьмедуьли. Эгенер одоми зигьисдениге тип-тэхьно, э сег енебуге пишиково нисе гьис сохде хуьшдере тэхьно. Э хьойвоново мибу рафде гешде не вози сохде. Юхсуьли нибу …

— Туьре эз чуь хьосиетойтуь хош оморе?

— Мэ гlэдотлуье гедеюм. Гье гедейгьоре хуно … Гьебелки, хош оморени эз муьгъбетлуь бирейме э хундеи. Мере э школе асант бире, чуьнки ме расиренуьм. Эри е кориге ме гьеммере хуноюм.Ме мидануьм эз чуьниге терсире, мидануьм не терсиреш.

— Фикир сохки, туьре гьисди мошин вэхди. Эже мирафди туь?

— Эслогъ биёвrьо вэхде нэг1. Уре меш миданум винире. Гьебелки, ме мирафдуьм э гирошдигьо вэхд. У мэхэлки гьелем небу одомигьо, оммо эдембру офуре оморе. Чуьтам хьэсуьл омори? Чуьтам у эз мейму чарусди э одоми? Гьире мере мивоисд винире не варасире …

— Чуь мэхьтеле кор бири э зиндегунитуь?

— Ме рафденки э Грузие. Мере хош омо эз культурейишу, эз зугьунишу, эз гъэножогъишу. Ме бирем э Азербайджан. Бирем э Краснодар, Москов. Оммо Грузие мере эз гьемме омбордеки хош омори. Гъозией шогьнишон эн Грузие мерэгълуьи. Экскурсовод эриму гьеммере ихдилот сохди не бирмунди. Лап рач бу. Э Тбилисиш, э Батумиш.

— Чуьтам гирошде эн бишерксуьзе рузтуь?

— Мэ хэбер биренуьм, дес-руй шушденуьм, нашдови сохденуьм, рафденуьм э школе, оморенуьм э хуне, сохденуьм нубогьоре, рафденуьм э кружок … оммо шохьонгум иму э кифлетово дениширеним фильм.

— И гlэдотие руз туьни? Оммо руз екшоббот?

— Руз екшоббот нисе сеч бирени эз е рузигьо, чуьнки ме рафденуьм э школей екшобботи, комики гьисди э «Келе-Нумаз». Уш школеи. Песде кружкини. Мере гьер рузме хош оморе. Гуйге э эзуни рузи, оммо иллогь-биллогь чуьниге тозе мерэгълуь гьисди.

— Чуьтами сверхспособность туьре воисде бире?

— Зури-зури жуьмуьсде! У э ме кумеки мибисто зу жуьмуьсде. Бирден ме эз нубегьо бэгъде эдем дир бире э кружок. Ме рафденум э омборе кружкегьо, э и rиро герек мибисто.

— Чуь туьре хош нисе оморе э зиндегунитуь? Чуьре мивоисд туьре дегиш сохде?

— Эз дулиме нисдики э гlуьлом унгъэде довгlои. И эде вохурде э гьер одоми. Э зиндегунимеш эде бире. Гьейсэгlэт, меселен, эз ме омбор пуьрсиренуьт чуь миллетуьм. Ме жогьоб доренуьмки и вожиблуьи нисди э дусди одомигьо. И бегьем вожиблуьи? Гьелем мере хош нисе оморе екире куьшденки. Оммо гедегьо гье бирден женг гуьрденуьт. Гьеебо ме винирем чуьтам э мерево хундегоро женг гирдетге э мэх1элей школе. Ме эдембрум терсире эри гьердуьшуь? Эри чуь гlэмел нисе оморе шерт бесде? Ме миданусдум эри уре сохде кумек бире …