18-19-муьн август 2024-муьн сал бири дуьрузинее сер кеширеи серворе Уруссиете Владимире Путине. Пуьруьш сохде пуьрсуьшгьо гьемкоркии гlэрей Уруссиет ве Азербайджановоз. Гье у сеимуьн вохурдеи серворгьоре э гьонине сал, чуьки риз кешире куьнде гьемкоркие гъножогъие вилеет.
Суьфдеи руз сер кеширеи Путине э Баку сер гуьрде эз азадлуье вохурдеи э серворевоз Азербайджане Ильхаме Алиевоз ве э зен энуревоз Мехрибан Алиевоз. Овхьолет иловлеи бири дусдлуьи, чуьки риз кешире вожиблуьи хьуькуьмлуье сер кеширеи. Путин веноре гуьлгьо эки гъоврей Гейдаре Алиеве ве э сенгь ёровурди «Гьеммишеи гlэтош» бирмунде хьуьрметлуьи эки культуре Азербайджане.
Э нуботлуье игъролбесдеи э хуней Загульба серворгьо пуьруьш сохде омборесалине имидлуьи гьемкоркии.
Вожиблуье пуьрсуьш бири армяно-азербайджански бэхьсе-бэхьс, эже Путин гъувот доре хьозуьрлугъи Уруссиете эки гьемкоркии э дореи хэтосуьзи ве кумекии э серхьэднореи серхьэде.
Экономически бесдеи гьемчуьн бири э биней пуьруьш сохдеи.
Вилеетгьо хэрекети сохде параменди гьемкоркии э миллетлуье валюте ве дешендеи пулдорение системе «Мир» э Азербайджан. Эзуш бэгъэй, пуьруьш сохде гlэрейхэлгъие транспортни сиро «Софун-Дорум», э жирелуье гъэйгъуи э тозе вокурдеи рэхьгьой гъовуни эри зиёд сохде шелебердеире.
Ильхам Алиев бирмунде, чуьки веровунде 20 рэхь э руз ю гlэрей Уруссиет ве Азербайджановоз, чуьки шогьоди доре э товун зевер биреи кори сохдеи дуь э екиревоз.
Вожиблуье е гъэдер вэгlэдо сер кеширеи Путине бири гъул кеширеи разименди э гlэрей Уруссиетие фонде пулдореи ве Идоре верзуьши моле э де вилеетиге бердеи пулдореи Азербайджане. Серворе рэхьбер РФПИ Кирилл Дмитртев бирмунде мерэгъ азербайджански пулдорегоргьо эки уруссиетие инфраструктуре ве хозяйствой дигьбони.
Э коргьой Азербайджан ведиреморе омборте 1300 уруссиетие компании, дешенде ижире марке чуьтам «Лукойл» ве «Камаз».
Экологически гъозие э Каспий мунде четин, ве лойгьо игърол бесде э товун дуь эекиревоз фегьм сохдеи эри те биреи нисд сохдеи бигlэдотие хэребеи. Алиев согъбоши гуфдиреи Уруссиете э песой кумеки дореи Азербайджане э климатически конференции СОР-29.
Вожиблуье веди сер кеширеи бири гуманитарни гьемкоркии, дешенде лов сохдеи уруссиетие зугьуне э вилеет эже гьисди омборе школегьо ве вузгьо. Сервор сер кешире «Сипре шегьер» э Баку ве Собор святыгьо Зенгьо-шолумиовурдегоргьо, эже Путин дори иконе э руз православни мигlид.
Э бараси хьуькуьмлуье сер кеширеи Серворе Уруссиетие Федераци Владимире Путине э Азербайджан бири гъул кешире жергей когъозгьо.
Сер кеширеи Путине бири кор омборе вэхде гьемкоркии ве муьхькем сохдеи дуь лоие гъэножогъи.
Азербайджан бирмунде хьозуьрлугъи эки хуьшденкордание гъэрорноме э игъролгьо гlэрейхэлгъие мэгlлуьмсуьзи, чуь вокурде тозе имидгьо эри гьемкоркии э Уруссиетевоз.
