Сернуьш Хьуькуьм РД А.Абдулмуслимов 26-муьн август гировунди гуьрдлеме. Э гуьрдлеме пуьруьш сохде оморебу хьозуьрлуьгъи корхонегьой энергетике, эн газерасундеи ве ЖКХ эки поизи-зимисдуне вэгlэдо 2024-мьун-2025-мьн салгьо.
Нушудорегоргьой эн овгьотгьоре расунденигьо корхонегьо ихдилот сохдет э товун гировунде оморенигьо кор. Премьер-министр гуфди э товун вожиблуьи веровундеи коргьоре э вэгlэдо ю. Э песини салгьо электроэнергие хэржи сохде оморени э се гиле омбарте, эзу товун хьэсуьл оморени зиедие коргьо.
Эз чор гьозор омбаратебэгъэе хунегьоре омбарте ве омбаре социальни объектгьоре э республике гереки хьозуьр сохде эки зимисду.
Хьукуьметлуье хунелуье инспекцие сер гуьрди фегьмсохире, бешпуртгьой хьзуьрлуьгъи мие хьозуьр сохде биев те 15-муьн сентябрь. Премьер Догъисту А.Абдулмуслимов гуфди, ки вожиблуьни гъувот доре пул доренигьо коргьоре ве дуь э екиревоз кор сохдеи эн гьемме тарафгьо эри нисд сохде зиед биреи гъэрхундире эри энергоовгъотгьо. Бинелуье везифе, чуьнки системегьой овгъотгьо герек гьисдигьо эри зиндегуни гьеммише кор соху.
Э гlэрей хьозуьрлуьгъи эки зимисду э Догъисту дегиш сохде омори 47,7 км. кугьне биригьо телгьой гьови. Министр вокурдеи Б.Уллаев мэгlлуьм сохди э товун э гуьнжо овурдеи муниципальни штабгьоре эри назари сохдеи ве фегьм сохдеи. Хьозуьр сохде омори 4,5 млн.кв.м. хунегьо, 202 котельнигьо ве 8 герми доренигьо жигегьо. Гъуьч сохде омори 87 км. герми доренигьо сетьгьо, 969 км. телгьой гlови ве 364 канализационни сетьгьо. Э гуьнжо овурде омори аварийни гъуллугъсохигьо, чуьнки коргьой ЖКХ гьеммише гировунде биев.
Министр энергетике М.Шихалиев ихдилот сохди э товун плангьой эн Уруссиетлуье сетьгьо э 1,2 млрд монетгьо эри хьозуьр сохдеи электросетевой оборудованиере. Э план гуьре денишире оморени ки те эхир сал э 25 подстанциегьо гъувотгьо зиед сохде миев. Эри зевер сохде муьхькемлуьи электросетевой комплексе денишире оморени ки доре миев 11,7 млрд монетгьо, эз комигьоки гьонине вэгlэдо доре омори 1,9 млрд монетгьо. Э план гуьре денишире оморени, ки еклуье корхоне э сферей гlоврасундеи эри 400 коргьо миду 1,16 млрд монетгьо э шегьергьо Махачкале, Избербаш, Кизилюрт ве Догъистонлуье Огни эри хьозуьр биреи эки зимисду.
Э Избербаш дегиш сохде миев 2,7 герми доренигьо сетьгьо ве гъуьч сохде миев котельнигьо, э Догъистонлуье Огни тозеден сохде миев системей гермирасундеи, э Кизилюрт вокурде оморени котельнигьо ве тозеден сохде оморенуьт сетьгьо. Э план гуьре денишире оморени ки э Махачкале синемиш сохде миев товгьо ве гъуьч сохде миев герми доренигьо котелгьо.
Жигегир сервор эн «Газпром межрегионгаз Махачкала» М.Алибеков ихдилот сохди, ки газови объектгьо хьозуьр сохде омори э 60%.
Веровундегор гъэрхундигьой серворе эн «Уруссиетлуье сетьгьо Софун Кавказ» А.Гаджиев мэгlлуьм сохди э товун хьозуьрлуьгъи электрорасундеи. Эри восдоре оборудованиере ве молгьоре, ве гьемчуьн эри хэребеире нисд сохденигьо коргьо доре миев 2,7 млрд монетгьо.
Эри те биреи нисд сохдеи хэребеигьоре хьозуьр сохде омори 238 десдегьо ве 1201 одоми. Э план гуьре денишире оморени ки э сентябрь гировунде миев хундеигьо э товун нисд сохдеи хьэсуьл оморенигьо хэребеигьоре э электросетевой комплекс.
Э гlэрегьой программе кем сохдеи жэхитгьой хэржисохдегоргьоре Дагэнерго нори 15 тозе трансформаторгьо 281,8 МВА.
ПАО «Уруссиетлуье сетьгьо Софун Кавказ» хьозуьр сохди программере эри зевер сохде муьхькемлуьи энергосистемере эри 2024-муьн сал. Эз сер салевоз диеш норе омори зиедие 6 трансформаторгьо.
Э гуьрдлемей хьуькуьм РД гуфдире оморебу э товун хьозуьр не биреи эки зимисду. Премьер-министр А.Абдулмуслимов гуфди, ки гьемме коргьоре гереки сохде э вэгlэдо ю. А.Гаджиев андуьрмиш сохди э товун дир восдореи молгьоре, оммо идорегьоре нисд сохденуьт овхьолете. Суьфдеи вице-премьер М.Мажонц гуфди, ки эри технически гъуллугъсохи ве гъуьчсохи доре омори 1,2 млрд монетгьо ве эгенер коргьо э вэгlэдо ю веровунде не омоге пулгьо вегуьрде миев. А.Абдулмуслимов гъуллугъ дори фегьм сохде зевер биреи хэржи сохдеи электрорасундеире, комиким зевер бири э 7,8% эри 7 мегьгьо эн 2024-муьн сал.
Премьер-министр М.Мажонце дори гъуллугъ бирмунде хэржи сохдеи электрорасундеире эн гьемме муниципалитетгьоре. Дагэнерго дори гъуллугъ хьозуьр сохде зиедие молгьо эри гъуьч сохденигьо коргьо. Гьемчуьн серворгьой шегьергьоре ве районгьоре доре омори гъуллугъ вечире корсоххьоре ве расунде секонесуьзи объектгьой гермирасундеире эки герми доренигьо вэгlэдо.
