Сернуьш Хьуькуьм эн Республикей Догъисту А.Абдулмуслимов э мейдун корхоне ООО «Дербент Агро» э дигь Джалган эн Дербентски район гировунди гуьрдлеме, гIуьзет сохде оморигьо хьозуьрлуьгъи дигьлуье хозяйственни молведешендегоргьой Догъистуре эки вэхд вечиреи ве тозеден э кор венгесдеи онгуре э 2025-муьн сал.
Э пушой эну А.Абдулмуслимов э гIэрей корлуье омореи э Дербентски район рафди э автосафарлуье комплекс «Анжелина».
Корхоне кор сохдени эз 2016-муьн салевоз ве у кошде веровундени сиб, домбул ве элуьче.
И пушогьо компание сер гуьрди параменд сохде – автосафарире, э бараси комики вокурде оморебу комплекс э гъуногъхорегьоревоз ве э мейволуье богъгьоревоз э хориревоз 200 га.
Коттеджни дигьбон «Экопарк Анжелина», вокурде оморигьо э бэхш доре оморигьо пулгьоревоз э гIэрегьой миллетлуье проект «Сафари ве индустрия гъуногълугъи», дери э раче жиге, экуьнди више, дерьегьче, герме мэгIидон ве дерьегь.Э унжо дери коттеджгьо, хьэвуьз, хурекхоне ве жигей форигъэти вегуьрдеи. Гъуногъгьо мидануьт софо вегуьрде эз тебиет ве э жирелуье синогъи вечиреи бегьере.
Сернуьш эн Хьуькуьм Догъисту гьемчуьн винири чуьтам э кор венгесде оморени дуьруьжде инвестиционни проект «Кошдеи онгуре э дугълуье гIовдореиревоз» э 572 га э дигь Митаги-Казмаляр, эже сергуьрдегор проект бири ООО «Каспийская Лоза».
Везифей проект – кошде технически жинсгьой онгуре гъэлхэнд сохде нисе оморенигьо жире э 420 га. Эри э кор венгесдеи сергуьрдере фуьрсоре омори экуьнди 300 млн монетгьо.
Э имбурузине руз э 150 га кошде омори онгурдоргьо жинсгьой Мерло. Суьфдеи эн Магарач, эн Сеперави, Совиьон блан, Рислинг рейнски Каберне совиньон ве Шардоне. Э гьонине вэхд бегьем сохде оморени вокурдеи гIов доренигьо сете эри дугълуье гIовдореи.
Гузет сохде оморени, ки проект ведиреморенки эри пуре молведешенденигьо гъувот э 2027-муьн сал налогови дешендеигьо э бюджет регион эз 2 млн монетгьо омбарте мибу.
Э гуьрдлеме э дигь Джалган гьово гуьрде оморебу пуьрсуьшгьой гьемтарафлуь параменд сохдеи онгур кошде веровундеире ве шоробчилугъире э Догъисту, э гуьнжо овурдеи вечиреире ве тозеден э кор венгесдеи онгуре эн 2025-муьн сале, мэгIэногьой эн тозе технологиегьо параменд сохдеи кор онгурире ве диеш.
Доренки ихдиери сер гуьрде вечире бегьере э Догъисту, премьер-министр регион А.Абдулмуслимов эз нуминей эн Сервор Догъисту эн Сергей Меликов ве эз нуминей эн гьемме рэхьбергьой республике шолом гуфди эз кура биретгьо корсохгьо.
А.Абдулмуслимов риз кеши, ки э гъувотдореи федеральни министерствой эн дигьлуье хозяйстворевоз дануьсденим зиед сохде жэгIмие гъэдергьой эн хьуькуьметлуье гъувотдореи нушудорегоргьой отрасле, е песини салгьо – экуьнди чор гиле. Имбуруз республикере бегьем вес сохдени кошде оморенигьо молгьой эн онгур хуьшде, оммо гьемчуьн у мидануь фурухде шивлей доргьоре э де регионгьойге. Меселен, э 2024-муьн сал э Республике Крым фуьрсоре омори – 840 гьозор тек ве э Краснодарски улке – 500 гьозор тек.
«Эри республике Догъисту кор онгури – еки эз лап вожиблуье тарафгьой АПК ве эн экономикеи, у гьер сал э региональни бюджет овурдени экуьнди 7 млрд монетгьо, чуь лап вожиблуьни эри дотационни республикей иму. Э гъэдер ве хори гуьре иму э пушой эн регионгьой Уруссиетим, э и хьисоб эн хьовиргьой имур краснодаригьо. Имуре гьемчуьн гьисди хубе барасигьо э товун агротехникей гъиребир сохдеи дошденки гьемме тегьергьоре. Ве имбуруз иму пушобергьоим э Уруссиетлуье Федерацие. Э вохурдеи э Президент Уруссиетевоз э В.В.Путиневоз Сервор Догъисту С.Меликов ихдилот сохди, ки 42% онгур Уруссиет вечире оморени э Догъисту, ве Сервор хьуькуьмет мехьтел бири э бирмушигьой имуревоз. Ме, чуьн сернуьш Хьуькуьм, чуьн сэхьибхори, хьовир ишму ве гьемкорки эрклуь биренуьм э барасигьой ишмуревоз»,- гуфди А.Абдулмуслимов.
Э гIэрей вечиреи ве тозеден э кор венгесдеи онгуре э премьер-министр ихдилот сохди сернуьш Комитет э товун кор онгури ве мол ичкуире жэгIм сохдеи РД А.Ахмедов. Чуьтам ихдилот сохди А.Ахмедов, хубе тебиет-гьоволуье овхьолет, гьемчуьн э вэхди ю ве гъоимлуь гировундеи гьемме агротехнически коргьоре, химически гъиребир сохдеигьо э гъэршуй молихьгьо э сер онгурбогъгьо минкин дорени гузет сохде хубе бирмунушигьоре. Корхонере гьисди тракторгьо, прицепгьо, кутонгьо, культиваторгьо ве дермушенгьой хуьшде. Мегьине муьзд жофои эн корсогьо – 60 гьозор монетгьои э хьисоб вегуьрденки вэхдие корлуье жигегьоре. Э региональни бюджет налоггьо дешенде оморени эз 36 млн монетгьо омбарте.
«Э гIэрей районгьой республике гIэдотлуь пушобергьо э товун валови вечиреи гьисдуьт:Дербентски, Каякентски, Карабудахкентски, Табасарански, Магарамкентски ве Сулейман-Стальски районгьо. Хозяйствогьой онгури республикере эри вечиреи онгуре технике вес сохдени»,- мэгIлуьм сохди А.Ахмедов.
У гьемчуьн ихдилот сохди, ки имисал онгурчигьой республике кошдет жовоне онгурдоргьо э 772 га.
Гьемчуьн гуфдире оморебу, ки э Догъисту э 2025-муьн сал гузет сохде оморени ки э план гуьре ведешенде миев экуьнди 3 млн тек гъэлем зере оморигьо шивлей доргьой эн онгур, комигьореки ведешендет ООО «Планта» эн Сулейман-Стальскоги район. Гьемме э район э кохонегьо ведешенде оморени 38 жинсгьй онгур: 12 столовигьо ве 26 технически жинсгьо.
Э гIэрей корисохи хуьшде ве зиед сохдеи хоригьоре ООО «Дербент Агро» э кор венгесдени тозе дуьруьжде проекте э 331,8 га э дигь Джалган эн Дербентски район. Кошде омори 106,8 га онгурдоргьо. Те эхир эн 2025-муьн сал кошде миев диеш 50 га.
Гереки гуфдире, ки онгурдоргьо эн компание «Дербент Агро» деруьт э мескен эн се районгьо: э Сулейман-Стальски(196,5 га), э Магарамкентски (545 га) ве э Дербентски (215,8 га). ЖэгIмие гъэдер онгурбогъгьо — 957, 6 га, э и хьисоб бегьер доренигьо 555 га.
Сернуьш Хьуькуьм фегьм сохди бирмундеи хубтее жинсгьой онгур республикере, бирмунде оморенигьо э мейдун корхоне «Дербент Агро», э гIэрей энугьо: «Августин», Первенец Магарача», «Ркацители», «Бианка», «Совиньон белый», «Рислинг Рейнский», «Шардоне», «Пино белый», «Цитронный Магарача», «Молдова», «Мерло» ве диеш.
Гировунденки артгьой пуьруьшсохире премьер-министр е гилейгеш согъбоши гуфди эз корсохгьо, вечиренуьтгьо онгуре.
