Омборте 6 млрд монет доре омори э кумекии дореи догъистуние хоригъуллугъсохие корсохгьо. Э товун эну мэгIлуьм сохди сернуьш Комитете Хэлгъие Гуьрдлемере РД э хориие политике Асият Алиеве, бирмунде э республикански гIилмие-синогъие гуьрдлеме «Параменди агропромышленни комплексе Республике Догъисту: пушолуье корисохигьо ве сенигIэткорлуье э гуьнжо овурдеи».
Чуьтам бирмунди Асият Алиеве, э песини салгьо хьуькуьмлуье кумекии гьишди Догъистуре вегуьрде суьфдеи жигегьо э молведешендеи жергей хоригъуллугъсохие культуре ве молгьо.
Желди параменд бире ве инфраструктуре дигьбоние жигегьо.Эри песдеине кумекии дореи хориие корсохгьоре э республикански бюджете э 2026-муьн сал пушоки дире дануьсдеи омборте 6 млрд монет.
«Гье у гуфдире э товун зевербиреи тигъэти федеральни министерстве ве рэхьбергьой республике эки АПК. Бэхш сохдеие овгъотгьо – гье у неки гъэдергьо, гье у гьэгъигъэтише кумекии хориие корсохгьой эн имуре, комики гьишдени угьоре тозе сохдеи корхонегьоре, дешенде тозе технлогигьоре ве зевер сохде хьовуетие божеренемэгIрифете».
Жейлее тигъэти доре оморе гъэрорномере четинигьоре корсохие овурде расундеире. Э гъэд гьисдигьо гъонуне э товун параменди хозяйствой дигьбони веровунде оморе хьуькуьмлуье политике, комики фуьрсоре оморе э параменди системере хьозуьрлугъи корсохгьоре ве гене сэнигIэткорлуье соводире эри хориие беделе.
Э гъэд тозе миллетлуье проекте «Технологически овурде расундеи хуреклуье секонеисуьзире» э кор венгесде омори федеральни проект, комики фуьрсоре э хьозуьрлугъи корсохгьоре эри АПК. Еки эз бинелуье рэхьгьо и проекте гьисди гьунжолуьи агротехнологически классгьоре э школгьо республике, чуь гьишдени эз зуинее гIуьмуьрлугъи э гуьнжо овурде мерегъ жовонгьоре эки хоригъуллугъсохие сенигIэткоригьо ве хьозуьр сохдеи биёвгьо сенигIэткоргьоре корхонегьоре.
Иму виниреним, чуьки кор эн иму овурдени бгьергьой эн хуьшдере. Зиёдсохи пуледореире ве параменд сохдеи жергей гъонунгьоре – гье у эдеби эри эну, эри чуь хориие бедел Догъисту зиёд сохдеи параменд бире ве муьхькем сохде фикиргьой эн хуьшдере»,- риз кешири Асият Алиеве.
