Э Догъисту имисал гузет сохде оморени бегьер эн бахчевойгьо э жэгIмие гъэдер 215 тонн, чуь э 4,4% омбарте мибу эз 2024-муьн сал, мэгIлуьм сохде омори э Министерствой дигьлуье хозяйство эн регион.

Э мэгIлуьмети ведомство гуьре, бегьер зиед бири э сереботи зиед сохдеи тум шенденигьо хорире: эри кошде бахчевойгьоре имисал доре оморебу 7,6 гьозор га, чуь э 10% омбартеи эз порине сал.

Бинелуье хозяйствогьо, кошде веровунденуьтгьо бахчевойгьоре, деруьт э Ногайски, Кизлярски, Хасавьюртовски ве э Бабаюртовски районгьо. Молгьой энугьо фуьрсоре оморени э дуьруьжде шегьергьой Уруссиет, э и хьисб э Москов ве Санкт-Петербург.

Гьер сал э Догъисту кошде веровунде оморени те екиним миллион тонн хьэвуьжгьо. Э овхьолет эри минжи август хоригъуллугъсохгьой Догъисту вечирет 528 т. хьэвуьжгьо эз 16,5 га.

«Хушлуье гьово ве гьеймогьине технологиегьо минкин доренуьт имуре вечире те се бегьер э е сал эз е зими, расунденки согъсалине «хьэвуьжлуье контейнер». И сохдени мол Догъистуре жейле гереклуьи э гIэрейвэди»,- мэгIлуьм сохди суьфдеи жигегир эн министр дигьлуье хозяйство ве хуреки эн Республикей Догъисту Шарип Шарипов.