Э конференц-зол эн муниципалитет гировунде оморебу гуьрдлеме эн гъэршуйтеррористически комиссие эн Дербенд, комиреки гировундебу сервор шегьер Ханлар Пашабеков. Э гуьрдлеме пуьруьш сохде оморебу пуьрсуьшгьой расундеи секонесуьзире, те биреи нисд сохдеи экстремизме ве парменд сохдеи инфраструктурей шегьере.

Э пушой сергуьрдеи гуьрдлеме сервор Дербенд тигъэт дори э овхьолет зевербиреи газе. Х.Пашабеков гуш дошди андуьрмиши эн нушудорегор эн шегьерлуье отделение «Горгаз». Э сереботи зевер биреи газ э е жерге хунегьо бири пожар. Гьемкоркигьой эн «Горгаз» э гъуллугъ эн рэхьбергьоревоз хьозуьруьт доре пул эри зере оморигьо зарали одомигьоре.

Сер гуьрденки гуьрдлемере Х.Пашабеков бэхшвегиргьоре шинох сохди э план рузевоз. Суьфде гировунде миев артгьой кор эн АТК шегьер эри 2025-муьн сал, норе миев везифегьо эри 2026-муьн сал ве фегьм сохде миев барасигьой веровундеи муниципальни программере «Еклуье программе кори сохдеи э гъэршуй эн хэелгьой терроризм эри 2025-муьн сал».

Дуьимуьн гьемчуьн вожиблуье пуьрсуьш, бири пуьруьшсохи планирование, барасигьой веровундеи Комплексни плане кори сохдеи э гъэршуй терроризм э Уруссиетлуье Федерацие эри 2024-муьн-2025-муьн салгьо. Жейлее тигъэт доре оморебу зуте мэгIлуьм сохденигьо коре э одомигьо, э сер комигьоки корисохдени хэелгьой терроризм.

Песде бэхшвегиргьой комиссие фегьм сохдет чорегьоре э товун нисд сохдеи очугъ сохде оморигьо кемсуьгигьоре э гъэршуйтеррористически гъэлхэнди объектгьоре,

Э пуьруьшсохи пуьрсуьшгьорей план рузе нушу доребируьт жигегир сервор эн администрацией шегьер А.Агамирзоев, сервор эн Дербентски отделение ФСБ РФ Н.Аскольский, сервор эн ГУО Ч.Алиеве, сервор эн УКМПиС С.Наджафове, сервор эн отдел АТК А.Ханмагомедов, ве гьемчуьн нушудорегоргьой эн назарие ве ихдергъэлхэндлуье органгьо.

Э товун гьемме фегьм сохде оморигьо пуьрсуьшгьо гъобул сохде оморебу гъэрорномегьо, фуьрсоре оморигьо эри муьхькемлуь сохдеи гъэршуйтеррористически секонесуьзире ве социальни-экономически параменд сохдеи «шегьер Дербенде».