3-муьн сентябрь, сервор Догъисту Сергей Меликов гировунди гуьрдлеме э товун вожиблуье пуьрсуьшгьо. Э план руз гlэдотлуье эхирлуье хьисоб э товун жугьоб дореи органгьой хьуькуьм э руйбиреигьой одомигьо. Гьемчуьн пуьрсуьшгьо, ологълуь гьисдигьо э хубте сохдеи муниципальни ве корхонегьой хьуькуьмете, хубте сохдеи жунсогьи дошдеире ве системей ЖКХре.
Э суьфдеи нубот, Сергей Меликов ихдилот сохди э товун песини дегишигьо сохде оморигьо э органгьой эн хьуькуьм Догъисту.
Гереки э ер овурде, э август э жигей Рэхьбер Администрацие эн Сервор ве Хьуькуьм эн Республикей Догъисту норе оморебу Махач Омаров ве эз жигей министр жунсогьи дошдеи э войгей хуьшде рафдебу Татьяне Беляеве.
Э гуьрдлеме сервор республике гуфди, чуьки соводие идорегьо кор сохденуьт лап хуб – республике э вилеет э пушои э товун вокурдеи ве э кор венгесдеи школегьоре.
Сергей Меликов диеш гуфди, чуьки э пушо гьеле омбаре кори. Э республике гереки вокурде эз 200 школегьо омбарте.
Чуьтам мэгlлуьм сохди рэхьбер Администрацие эн Сервор ве эн Хьуькуьм Республикей Догъисту Махач Омаров, имисал э август ЦУР Догъисту э хьисоб венори эз 8 гьозор руфбиреигьо омбарте. И гъэдер руйбиреигьо э 31% кемтеи, эз пушотеине сал. Э суьфдеи нубот, и ологълуьни э кем сохдеи хьисоб шуькеетгьоре эри куьшдеи товуше э Махачкале. Гьемчуьн кем бири гъозие-гъэдергьо э товун э вэгlэдо ю не шендеи хокоруре.
Э органгьой веровунденигьо хьуькуьм фуьрсоре омори 2263 руйбиреигьо, э муниципальни соводигьо – 4311, э жире-бе-жирее овгъогьо расунденигьо идорегьо – 1758.
Одомигьой Махачкале мэгlлуьм сохдет э товун вокурденигьо коргьо э мейдунгьо эри гlэилгьо э кучей э нум Гамидов, 15-д. Администрацией шегьер гуфдири, чуьки ихдиери эри вокурдеи доре не омори ве пуьрсуьш дошдеи мейдуне эри гlэилгьо назари сохде оморени.
Э Дербент маршрутка №9 э график гуьре нисе рафде. Администрацие идорере гъуллугъ дори зиед сохде гъэдер автобусгьоре.
Одомигьой эн дигьбон Кривая Балка шуькеет сохденуьт, чуьки автобусгьо вес нисе сохде. Администрацией Махачкале мэгlлуьм сохди конкурс эри гировундеи одомигьоре э маршрутгьо №№ 107 ве 108. Э план гуьре денишире оморени чуьки э январь 2025-муьн сал овурде миев 17 тозе келе ве 44 миенее автобусгьо. Гьемчуьн норе миев 94 жигей дениширеи автобусгьоре.
Сервор регион тигъэте чарунди э сер гъозие-гъэдергьо э гъонуне пузмиш сохденигьо одомигьоревоз э рэхьгьо. Угьоре гереки томошелуь дивун бурра, гуфди фикир хуьшдере Сергей Меликов. Гьемчуьн Сергей Меликов эз Жэгlмиетлуье Палате гуфди, чуьки и пуьрсуьш лап вожиблуьни ве хьуькуьме дори гъуллугъ гировунде гуьрдлеме э ихдиергъэлхэндлуье органгьоревоз ве э жэгlмиетлуье корсохгьоревоз эри вихде егъинлуье чорегьоре э товун расундеи секонесуьзире э рэхьгьо. Гереки гуфдире, Догъисту э хьисоб суьфдеи регионгьои э товун гъэдер авариегьо эже муьрдени омбаре одомигьо. Гьечуь, меселен, пор э республике э хьисоб веноре оморебу 1677 авариегьо э рэхьгьой мошингьо, эже муьрдебу 348 ве ералуь биребу 2450 одомигьо.
Э товун э кор венгесдеи э Догъисту хьуькуьметлуье программере хубте сохдеи жунсогьи дошдеире ихдилот сохди рэхьбер министерство Ярослав Глазов. Э и тараф, э гофгьой веровундегор гъэрхундигьой министре гуьре, э 2021-муьн-2024-муьн салгьо гировунде оморебу ижире коргьо: гъуьч сохде оморебу 190 медицински идорегьо ве тозеден сохде оморебу 15 медицински идорегьо, 6 эз комигьоки – объектгьо эн 2024-муьн сал. Дуь объектгьо э и зуригьо бегьем сохде миев, чор объектгьо хьозуьри эз 45% те 90%.
Эзуш бэгъэй, восдоре омори 104 зу вокурде оморенигьо конструкциегьо (БМК), восдоре омори ве э кор венгесде омори 1791 тек тозе оборудование ве овурде омори 516 тек санитарни мошингьо.
Э 2025-муьн сал э и программе гуьре, тозеден сохде миев 2 ве гъуьч сохде миев 75 медицински идорегьо, вечире миев 36 БМК, эри медицински идорегьо восдоре миев 746 тек оборудование, комигьоки мисоху суьфдеи медицински кумеки; восдоре миев 171 жирелуье мошингьо. Те эхир сал гьемме игъролномегьо бесде миев.
Чуьтам гуфди веровундегор гъэрхундигьой министре, гьеммей эн угьо минкин дори кем сохде муьрдеире ве зевер сохде зиндегуни одомигьой республикере.
Э кор венгесдеи программере дураз кешире миев. Э план гуьре денишире оморени, чуьки э 2026-муьн-2030-муьн салгьо э гуьнжо овурде миев 270 объектгьой жунсогьи дошдеи восдоренки зу вокурде оморенигьо конструкциегьоре, э и хьисоб ФАПгьоре, больницегьоре, поликлиникгьоре ве стационарни корпусгьоре;
Тозеден сохде миев 5 ве гъуьч сохде миев 374 объектгьой жунсогьи дошдеи;
Восдоре миев 1180 тек медицински оборудование;
Восдоре миев 162 тек санитарни мошингьо.
Эри э вэгlэдо ю э кор венгесдеи жерге кор программере, серворгьой муниципальни соводигьоре доре омори гъуллугъ э гуьнжо овурде жигегьо эже норе миев зу вокурде оморенигьо объектгьой жунсогьи дошдеи, э сер хуьшде вегуьрде жугьобдорлуьире э товун оводу сохдеи мескенгьоре ве гировундеи инженерни коммуникациегьоре эки эни хоригьо. Министерствой мошингьой регионе доре омори гъуллугъ хьозуьр сохде рэхь эки тозе э гуьнжо овурде оморигьо объектгьой жунсогьи дошдеи.
Э гlэрей угьонигее гъосуьтгьой гуьрдлеме – хубте сохдеи хьуькуьметлуье ве муниципальни корхонегьоре, э товун комигьоки ихдилот сохди вице-премьер республике Заур Эминов, гьемчуьн – игърол бесдеи э муниципалитетгьо. Э товун энугьо ихдилот сохди сернуьш Комитет э товун хьуькуьметлуье восдореигьо эн Республикей Догъисту Азер Нифталиев. Эри гирошдигьо вэгlэдо бюджетни пулгьо хэржи сохде омори э 67 млн монетгьо кемте.
Э артгьой гуьрдлеме гуьре э товун гьемме вожиблуье пуьрсуьшгьо гъуллугъгьо доре омори. Веровундеи и гъуллугъгьоре назари мисохуьт рэхьбергьой эн органгьой веровунденигьо хьуькуьм ве хуьшдени сервор Догъисту.
