Веровунде гъуллугъ эз эхирлуье гуьрдлеме Хьуькуьмнесиет пуьруьш сохдет э зир рэхьбери Сергея Меликова.
Гуьрдлеме э рэхьбергьоревоз органгьо хьуькуьм ве сенигlэткори вице-премьергьо гирошди имбуруз. Серворлуье пуьрсуьш – хьозуьрлугъи корсохгьоре эри экономике регион, очугъ сохдеи минкине ве бинелуье рэхькори.
Сергей Меликов риз кешири, чуьки жирелуье тигъэти э гье и пуьрсуьш дори Владимир Путин. Э гъуллугъ президент гереки очугъ сохде э регион жугьобдорлуье органгьо ве сенигlэт корсох, угьо гъэрор норе э республике пуьрсуьшгьо хьозуьрлугъи сенигlэт корсох эри экономике э кори сохдеи дуь э екиревоз э федеральни бинеревоз.
«Сал бегьемини вожиблуье гъозиеревоз – гуьрдлемей Хьуькуьмнесиет э товней пуьрсуьшгьо хьозуьрлугъи корсохгьоре. Разилуьи э регламентевоз иму вегуьрдейм нуботноме гъуллугъгьо.
Гье и четини ведарафде эз гъэдер вилеет иму.
Гlуьлом желдлуь параменд бире, параменди тозе технологиегьо, пуьрсуьшгьо, гьисдигьо э технически гъэрорномегьо. Кейки гlуьлом ве вилеет гирошдени э тозе технологиегьо, гье и технологиеревоз миё бу рэхьберде. Пуьрсуьш: ки?» — гуфдири сервор регион.
Сергей Меликов овурди э меселен рэхькори экономике республике, коминигьоре гереки лап хубе сэнигlэткорсох – э сфере ТКО, сафари, молведешендеи ве екигегьо. Эзуш бэгъэй, сервор республике гlуьзет сохди тебиети ве географие минкини регион, эри кор венгесдеи комини гереки гlилмлуье ве технологие гъэрорномегьо.
«Божеренемэгlрифет догъистуни жовонгьо еки эз гьемме омбор имид доренигьо э вилеет. Э республике иму кор сохде эз гьемме жовоне духдир физико-математике гlилм э Уруссиет – Заур Алисултанов. У вегуьрди гье и степень э 27 сал. Ве ижире мэгlрифетлуье одомигьо имуре омбори. Имбуруз гьер одоми мидануь хуьшдере нушу доре, оммо эри эну гереки э гуьнжо овурде гъозие-гъэдер иловлеире», — гуфдири у.
Бэхшвегиргьо гуьрдлеме нушу дори фикир хуьшдере э товней гъэрорноме четинигьо хьозуьрлугъи сенигlэткор республике – гереки гировунде фегьмсохи гьисдигьо программагьо, овгъотгьо, сер гуьрде сенигlэткорлуье рэхькори гьеле эз школе, э у хьисоб э хотур чуьки э кор венгесдеи ве э гуьнжо овурдеи сенигlэткори классгьо э школегьо республике. Э гъэд фикиргьо – гуьнжолуьи инженерни бинелуье мескенгьо э молведешендеи мейдонгьоревоз, бинелуье мескен э дебердеи технологиегьо техникеи эгъуьл. Омбор гъэрор норе четини хьозуьрлугъи сенигlэткор мидануь доре вокурдеи э республике «Школе 21».
Жирелуье тигъэти – хьэвес тербиедорегоргьо. Сергей Меликов гъуллугъ дори жугьобдорлуьегоргьоре фегьм сохде минкин зиёдте верзуьнде тербиедорегоргьоре э гуьнжо овурдеи эри гье у фонд.
Сервор республике э ёр овурди, чуьки те эхир январь гереки э гуьнжо овурде корисохи орган э веровундеи гъуллугъ Хьуькуьмнесиет. Инжо, эз гофгьой эну, гереки желдлуь дарафде э кор гlилми жэмигlэт ве нушудорегоргьо сенигlэткор органгьо. Суьфдеи гуьрдлеме миё бу гировунде э эхир мегь.
«Ме тевэгъэ сохденуьм эки и торих тигъэтлуь бошит. Гье у гъэрор норе биёвгьоре. Эри чендгъэдери желдлуь ве дузини иму кор сохденим, эри унгъэде э вэхд ю иму ми вегирим барасире. Имуре имбуруз миё бу сенигlэткор, ве хьозуьр сохде оморе сенигlэткор. Э кор не венгесде сенигlэткори политике параменди не доре», — гуфдири Сергей Меликов.
