16-муьн октябрь сервор Догъисту Сергей Меликов гъобул сохди бэхшвегири э гуьрдлеме несиете Хьуькуьмлуье комиссие эсер региональни параменди э РФ, комики гирошди э зир рэхьберисохиревоз вице-премьере вилеете Марате Хуснулине.
Э гуьрдлеме э у гъэдер бири пуьруьшсохи веровундеи миллетлуье проекте «Инфраструктуре эри зиндегуни». Э 1-муьн октябрь э вилеет дешенде омори омборте 76 млн кв.м хуне. Бирмунди хубе параменди ве э рэхьие вокурдеи.
«Хосденум регионгьоре нисе вир сохде хубе желдилуьире!»- руй бири эки гьемкоркигьо Марат Хуснуллин.
Эзуш бэгъэй, э бине бири бегенмиш сохде тозе проектгьо, комики мибу веровунде э песой хьисоб казначейски инфраструктурни гъэрхундигьо э жергей регионгьо вилеет. Омборте 15 млрд монет мирав э тозе сохдеи ЖКХ, проектгьо э коргьой транспортни инфраструктуре ве гуьнжолуьигьо.
Э сергири октябрь Догъисту гьемчуьн мивегину бегенмиши э руйбиреи э гъэдер 3,04 млрд монет. Э гъэд вожиблуье проектгьо и овгъотгьо мибу фуьрсоре э бегьем сохдеи вокурдеире бинелуье гIовебердеире Чиркей-Махачкале – Каспийск ве напорни русму эз бинелуье канализационни насосни станцие-6 Махачкале те канализационни темизие дуьруьжде вокурдеигьо Каспийске. Э омбортее бедел гIовебердеире Чиркей-Махачкале-Каспийске товгьо уже норе омори, сер гуьрди вокурдеи технически дуьруьжде вокурдеигьо эри дореи гIове. Бегьем сохдеи объекте э пушо нори э эхир 2026-муьн сале.
Гузет сохде, чуьки и келе проектгьо зевер сохде хубире гIоведореире ве гIовеведебердеире эри омборте 900 гьозор зигьисдегоргьой республике.
Бэшгъэ э регионгьоревоз-серворгьоревоз, э гъэдер комикигьо ве Догъисту, бири пуьруьш сохде гъосуьт тозеден вокурдеи инфраструктурере э ек биреие регионгьо. ГЬемметарафлуье коре берде оморе э гьеммей рэхьгьо.
Вице-премьер гъэдэгъэ зери вэхде бегьем сохдеи коргьоре э объектгьо ОЗП ве соводире гуьрде э жирелуье фегьмсохи.
Бирмунде, э Догъисту желди берде оморе веровундеи миллетлуье проекте «Инфраструктуре эри зиндегуни» э бедел региональни ве жигее рэхьие тургьо. Э 2025-муьн сал э республике овурде миёв э гъэдерлуье овхьолет 142,2 км автомобильни рэхьгьо – гьемме 24 объектгьо. Коргьо уже бегьемини э 16 эз угьо.
Келе тозе сохдеигьо рафде э федеральни рэхьгьо э зиёд фирегьсохи угьоре те чори ризгьо. Жирелуье тигъэти доре омори парамендире гIэрейхэлгъие транспортни сироре «Софун-Дорум». Вокурде оморе гъирогъгешдеигьо дуьруьжде шегьергьоре – Хасавюрте ве Дербенде. Э жирей корисохи фегьмсохи гьисди проект гъирогъгешдеи Махачкалере.
Имбуруз э гъэд миллетлуье проекте э Кизлярски улке вокурде омори авторэхь «Ставрополь – Прохладный – Моздок – Кизляр — Крайновке» э муьлке км 35 — км 39. Инжо муьхькем сохдеи рэхье, гировунде омори гъуьчсохи гIовеведебердеире, норе омори гъир ве тозеден вокурдеи гъирогъгьой рэхьгьоре. Эзуш бэгъэй, норе омори мэгIлуьмсохие гъитгьо, рэхьие бирмундеигьо ве бегьем шекуьл кешири рэхьие ризгьоре эри зевер биреи секонеисуьзире.
