Э вохурдеие бедел Лешгерие комиссариате шегьерие жигере Дербенд, шегьере Дагестанские Огни ве Дербендски районе бири межлуьслуье рэхь сохдеи оголзерегоргьоре, комикигьо рвфденут эри гирошде зурие гъуллугъсохире э Ерэгъленмишие гъувотгьо Уруссиете. Э вэхдгирошди се руз – 15, 17 ве 18 ноябрь – э гъуллугъсохи рафди омборте чуьл оголзерегоргьо.

Э андуьрмишие гофгьоревоз э вэхд корисохи эки жовоне одомигьо руй бири лешгерие комиссар Фарид Мусаев. «Гъуллугъсохи – гье у школеи, комики талаб сохде жугьобдорлуьире ве хосиете. Боворини, чуьки ишму миданит веровунде гьемме норе оморе везифегьоре»,- гуфдири у, хосдеи эри оголзерегоргьоре тоблуьи ве боворини э хуьшде.

Э межлуьслуье корисохигьо гъобул сохди бэхшвегири нушудорегоргьой хьуькуьме ве жэгIметие идорегьо. Жигегир серворе Дербенде Видади Зейналов риз кешири, чуьки лешгерие сал мибу вожиблуье е гъэдер вэгIэдоревоз келете биреи, э гуьнжо овурде гуьнжолуьире ве гъисе гъэрхундире.

«Кифлет, шегьер ве республике имид э верзирение гъуллугъсохи гIэилгьоре»,- бирмунди у.

Э лой оголзерегоргьо гуфдире омори хубе гофгьо ве эз жигегир серворе шегьере Дагестанские Огни Эльдара Велиеве.

Капитан Ших Алиев, нушудорегор республикански программе «Вегири догъгьоре», овурди бирмунушире: «95 % фикиргьо, комики омори э товун оголзерегоргьой эн иму, лап хуби. Гье у номуси ве сикеи эри гьеммей республике. Гъуллугъ сохид ве ишму верзуьши, эри чуь ишмуревоз сикеи мисоху гъовумгьо, эри чуь ишмуревоз сикеи мисоху гьеммей хэлгъ эн иму».

Жирелуье вожиблуьи рэхьсохдеире дори э жиге биреи келетере СВО Арсене Султанове, комики войге сохди оголзерегоргьоре ветовусдеи э гьеммей э пушо дерие синемишигьо.

Депутат шегьерие Гуьрдлемере Дербенде Заур Искандеров дори оголзерегоргьоре овгъотгьо хуьшдение темизи инсонире, гуфдири боворини, чуьки гьер эз угьо «шинох мисоху гъовумлуье шегьере э номусевоз».

Межлуьслуье рэхьсохдеи гирошди э иловле дуь э еки кумеки сохдеи ве сикеи э песой жовоние гъэлхэндчигьо Ватане.