Одомигьо, э товун комигьоки имбуруз гуфдире миев, зу рафдет эз гIэрей зиндегуни. Оммо еровурдире э товун хуьшде гьишдет. Э товун энугьо э гермиревоз э ер овурденуьт угьо, ки шинох бируьт э брирор ве хэгьер Абаевгьоревоз эз Дербенд.
Милько Даниловне Абаеве хьэсуьл омори э октябрь 1923-муьн сал э Дербенд э кифлет шишечи. Те гъолхмиши бебей эну, Данил Абаевич, бу гъошире одоми, комиреки бу тукунгьой хуьшде ве онгурбогъгьо. Бэгъдовой гъолхмиши э пушой эну поисд вихдеи: енебуге гьеммере доре советски хьуькуьме, енебуге рафде э Сибирь. Данил Абаев вихди: дори гьеммере ве бири шишечи. Э хотур эни, гIэилгьой эну дануьсдет вегуьрде буьлуьнде соводи.
Милько бу суьфдеи зинде мундигьо гIэил э кифлет Данил ве Шифро Абаевгьо, пенжимуьн, те у гьемме гIэилгьо муьрдембируьт. У хунди варасди дербентски школере №1. Бэгъдовой выпускной, 21-июнь 1941-муьн сал, гьеммей класс рафди вохурде бур себэхьире, ве э нуботлуье руз мэгIлуьм сохде оморебу э товун сергуьрдеи довгIо. Оммо, гье генешки, э 1943-муьн сал Миля (гьечуь уре бежид огол зерембируьт э кифлет) дарафди э Догъистонлуье медицински зеверие идоре ве хунди варасди уре э 1948-муьн сал. Духдиргьо бирет ве дуь э уревоз э е класс хундегьоргьо: Яффе Абрамове ве Тамаре Сасунове. Милько Дагиловнере огол зери эки хуьшде э кор профессор Витковский, комиреки бу клинике э Махачкале. Гье э унжо Милько э шуьвер ведарафди э Борис Мусаханов. Э и зуригьо, оммо, у тологъ вегуьрди ве вогошди эки деде-бебе э Дербенд. Сер гуьрди кор сохде э шегьерлуье больнице духдир-терапевт. Кор сохденки э унжо е ченд салгьо, гирошди э поликлинике. Э 1966-муьн сал гирошди курсгьой зевер сохдеи сенигIэтлуьире э Москов. Уре доре оморебу нум Верзуьшлуье духдир ДАССР. Е ченд салгьо мунде те ведарафдеи э пенсие М.Абаеве бири духдир-терапевт эн ВТЭК. Омбаре салгьо э уревоз кор сохдембу э жигей хирург эн ВТЭК Нарунж (Нина) Гавриловне Шатилове.
Э шегьер Абаеве хьисоб сохде оморембу хубе терапевт, омбаргьо эки эну руй бирембируьт эри медицински кумеки. Милько Даниловне гъэйгъукеше деде ве духдер бу, омбаре вэгIэдоре ве гъувоте гIуьзет сохдембу э гъовумгьо ве куьнде одомигьо. Эз гIэрей зиндегуни рафди э Исроил э 2004-муьн сал.
Жирелуье дерд э кифлет Абаевгьо бу зу эз гIуьлом рафдеи бирор Борис (Абэи). Борис Данилович хьэсуьл омори э 1926-муьн сал. Барасилуь хунди варасди школере э Дербенд, дарафди э махачкалински медицински миенее идоре, ве бэгъдовой е сал – э Догъистонлуье медицински зеверие идоре, комиреки гьемчуьн барасилуь хунде варасди. Бэгъдовой эну у фуьрсоре оморебу кор сохде хирург э дигь Усухчай эн Докузпарински район. Бэгъдовой эну у екем вэхд кор сохдебу э рэхьгьовуние больнице эн Дербенд. Эз вэхд довгIо зулоте лешгере вес нисе сохдембу лешгерие духдиргьо, ве э оголзереи вилеет гуьре Борис Абаев вокурди погонгьо. Гъуллугъире сер гуьрди э летни миенее соводие идоре э Азербайджан, э станцие «Насосная», чуь э 20 км. эз Баку. Оммо э унжо у не дануьсди бирмунде хутеигьой хуьшдере чуьн духдир-хирург. Эхи летчикгьо жунсогълуье одомигьои, нечогъгьоре э авиацие нисе вегуьрденуьт. Ве Борис Данилович дори эрзо э Бакински ПВО э хогьишевоз э товун гировундеи уре э лешгерие госпиталь. Э и зуригьо у гировунде оморебу э тюркменски шегьер Небитдаг.
Э лешгерие госпиталь у зу дануьсди офде хуьшдере чуьн духдир ве неки. Уре бу мэгIрифет эн духдир-хирург, ве гьемчуьн у бу хубе рэхьбер, ве у норе оморебу сервор эн госпиталь. Борис желдлуь бэхш вегуьрдембу э вокурдеи корпусе, эже дебу хирургически отделение, э восдореи оборудованиере эри эну. У дануьсди вокурде жиге эри форигъэти, молгъэредорие фермере эри хубте сохдеи хурек эн нечогъгьой госпитале. И энжэгъ кеме бэхш энуни, чуь у сохди эри 42-сале зиндегуни хуьшде. Серворгьо гъэдур энуре дануьсдембируьт, ве варасирембируьт, ки уре гузет сохди келе биевгьо. Оммо гъисмет гъэрор сохди е жирейге. Э 1968-муьн сал у ве диеш се одоми э уревоз э мошин офдерет э аварие. Энжэгъ уре биребу гурунде шуькести. Кор сохдембу энжэгъ сер, ве у хешдени ю нори эри хуьшде диагноз: «Э пой вэхуьзуьннде мере мнкинзуьзи». Бэгъдовой е ченд рузгьо э реанимацие у муьрди. Омбаргьо эз вожиблуье одомигьоре воисдембу, чуьнки у соху операцие. Еки эз гъовумгьой Абаев, бирорзерей эн зен эну, Эдуард Кукулиев, офди одомигьоре, комигьоки хундет э школе э кук энуревоз.
Ини еки эз угьо.
Шолом! Угее бебейме Иванов Сергей Петрович у вэхд кор сохдембу серворлуье инженер эн вокурденигьо идоре. Угьо вокурдембируьт э госпиталь коминиге тозе объект, умогьой ве угьо дуьсд бирет. Нум эну бу Борис Данилович, егенер ме егIэлмиш биренуьмге, дуз сохит. Жигегир эну бу Макрон Петр Ильич (маркегьо вечирембу, хьэрекети сохдебу мереш мерэгълуь сохде), ве Багаутдинов хирург бу. Бежид кура бирембируьт э хуней иму енебуге э сер шуьлхьон энугьо, э ер ме кем мунди. Аварие бири, э ме гуьре, э 1968-муьн сал. Угьо рафдебируьт э мошин ГАЗ-69 (хьуькуьметлуье мошин эн угее бебе, эн серволуье инженер). Абаев, угее бебе, шофир, гье белки гье гене киниге, э ер ме не мунди. Э мошин офдоребу енебуге лов биребу пушои черх, ве угьо чаруьсдет. Омбаре зарали э екиш зере не оморебу, энжэгъ шидрегьой эну гъэд биребу. У дегешдебу э госпиталь, кут-кутурум, зигьисдембу энжэгъ сер. Огол зере оморебу сенигIэкоргьое эз Баку, эз Масков ве Махачкале, оммо гьичиш не дануьсдет сохде. У зигьисди (егенер гIэмел миевге ире гуфдире зиндегуни) лап кем, э ме гуьре эз е мегь кемте. Битехьэим сохде уре бердебируьт э Ватан, э Дербенд. Энжэг и мунди э ер ме.
Борис Абаев битехьэим сохде омори э Дербенд э лешгерие гIузетгьоревоз. У бу келе сенигIэткор э кор хуьшде. Кейки э угее бебейме аппендицит гим гуьрдебу, уре воисди хушдени ю сохде операциере, оммо гьеле у нисе сохдембу эзу товун ки у омбарте кор сохдембу чуьн сервор госпиталь. Операциере лап хуб сохди. И гьейсэгIт ижире операцие хьисоб сохде оморени лап асант, ве умогьой… У хуьшдере хуб дошдембу. Гьер рузгьой форигъэти кура сохдембу десде эз корсохгьой госпиталь, ве э идмонлуье зол эн школе №6 возирембируьт волейбол э сборни школеревоз, э комики меш возиребируьм. И гьемме чуь ме дануьсденуьм э ер овурде, чуьнки э и гъозиегьо ме хуьшдени бэхш вегуьрдебируьм.
Зофруте мере воисдени бирмунде ризгьоре диеш эз е когьоз – эн э е классхундегор эн Борис Абаев, Сергей.
Ме хундембируьм э е класс э кук Абаевоз. Эгенер ишму пуьрсиренит э товун Борис Данилович, ме энжэгъ дануьсденуьм, ки у екем вэхгIэдо бу сервор госпиталь, эже кор сохдембу дедей ме. Ме уре е ченд гиле винирем, кейки оморембируьм эки деде э кор. И бу раче офицер, кавказски бинуши. Кифлет энугьоре бу жейле поисдигьо хуней хьуькуьмети э чуькле богъчелеревоз э гIэрей госпиталь ве эн лешгерие шегьр. Э и хуно гIэдотлуь зигьисдембу кифлет эну, ки кор сохдембу сервор госпиталь. Кифлет иму зигьисдембу э лешгерие шегьер. Дирте эжеиге э 1968-муьн сал, Борис Данилович пуч бири э аварие э мошин хуьшде., чуьтам е гиле э ме мэгIлуьм сохди дедей ме.
Миле Даниловнере ве Абаи Даниловиче бу бирор Михаил. Духдир бири духдер эну Шуре (Шифра, э шуьвр гуьре Гаврилове). Шифра зигьисдени э Хадере, кор сохдембу кифлетлуье духдир, гьонине вэгIэдо сервори сохдени больнични кассере «Клалит».
Еровурдигьо эн Михаил Абаев э товун чуьклеи бирор:
У гьич текебур небу. Лап хосдембу омбарегъэдерлуье хьовиргьой гIэильети хуьшдере. Кейки э форигъэти оморембу, э суьфдеи нубот вохурдембу э у хьовиргьоревоз, комигьоки бируьт гIэдотлуье корсохгьо, ве песде э унигегьоревоз. У бу гьемметарафлуь соводлуье одоми. Мерэгълуь бирембу: ве э мэгIрифетевоз, ве идмоневоз, ве э зиндегуни вилеетевоз. Гьер норе оморигьо везифере, гьеле лап варасирени нисдигьо эри унигегьо, у веровундембу э зиндегуни.
Эри зиндегуни дураз кешире оморени. Абаевгьо зиндегуни хуьшдере негьогь не зигьисдет, кумеки сохденки э одомигьо, гьишдет нишоне э сер эни хори, ве бируьт хубе сенигIткорсохгьо. Очугъэ еровурди угьоре!
Нуьвуьсди Ирина Михайлова
Тержуме сохди Ильягуева А.
