Сернуьш Хьуькуьм Республике Догъисту Абдулмуслим Абдулмуслимов гировунди гуьрдлеме, гIуьзет сохде гешдеи веровундеи «вожиблуье» проектгьо э регион.
Э ёр овурде, э мескен Республике Догъисту э гъэд экономически жире параменди веровундеи 5 «вожиблуье» проектгьо: «Параменди шишеи промышлени десде», «Параменди мейво-хьэвуьжлуье десде э Догъисту», «Параменди Касписки десде», «Веровундеи стратегически проекте «Шегьер пойвокусохдегоргьо», Параменди транспортни-логистически десде».
Фегьм сохдегоргьо веровундеи проектгьоре рэхьбер министерстве эхире хьисобе сохде и корхонегьоре.
Жигегир министре сафари ве хъэлгъие художественни ветэгъэгьо РД Абдула Магомедов гуфдире э товун проекте «Параменди Каспийски десде», комики берде сафарлуье рэхь.
Проект веровундеи э гъирогъ Касписки дерьёгь э серхьэд шегьер Махачкале ве э мескен десде
Э еки эз чуькле проегтгьо «Э гуьнжолуьи сафарие – рекреационни гуьрдноме «Инчхе Марине Каспий» пулдорегор гировунди коргьо э дорундарафдеи, муьхькем сохдеи, доре пулгьо 110 млн. монет. Проектно-сметни когъозгьо э вокурдеи гъуногъхоне э кор венгесде э 100%. Сохде бэхшсохдеи мескене эри вокурдеи 7-тебэгъэ гьуногъхонее гуьрдноме ве куьнде инфраструктуре.
Э чуькле проектгьо «Гуьнжолуьи сафарие-рекрациони гуьрдноме «Суьрхине гъум», «Гуьнжолуьи сафарие-рекреационни гуьрдноме «Эколенд», «Гуьнжолуьи сафарие-рекреационни гуьрдноме «Каспий» пулдорегоргьо сохде коргьо э вокурдеи сафарие инфраструктуре.
Министр промышленности ве фурухдеи РД Низам Халилов ихдилот сохде э товун вожиблуье проектгьо «Параменди шишеи промышлени десде ве «Веровундеи стратегически проект «Шегьер пойвокусохдегоргьо».
Бире бирмунде, чуьки э вожиблуье проект «Веровундеи стратегически проекте «Шегьер пойвокусохдегоргьо» пушоки дире дануьсдеи вокурдеи ве тозе сохдеи пойвокуе корхоне, дуьдуь уже э кор венгесде, гье у ООО «Бофф» ве ИП Гусейнов С.С., гене чор корхоне денишире э вегуьрдеи хорие муьлкгьо.
Э гъэд вожиблуье проект «Параменди шишеие промышлени десде» э жиге овурде веровундеи 5 чуькле проектгьо: э корхоне шишеие пуфдеди эри хьозур сохде шишеиерусму, шишеиеволокно, шишеиегъобгьо, керамогранитни плитке. Пушоки дире дануьсдеи э кор венгесде гуьрдноме корхоне вокурдение молгьо.
Министр хозяйствой дигьбони ве хурек Республике Догъисту Мухтарбий Аджеков ихдилот сохде э товун вожиблуье проект «Параменди мейвохьэвуьжлуье десде». Э гъэд корисохи «вожиблуье» прект ООО «Риз» э Сулейман-Стальски улке кошде 600 га богъгьо, э гуьнжо овурде лап келе э Европе богъ фундуке э 2,2 гьозор га. Э везифе мол эз де вилеетиге дегиш сохде шивлей дори э гуьнжо овурде питомник фундуке э 40 га. Коргьо зиёд сохде. Э хьисобсохи зевер сохде доруние гъэдер корхоне мейвогьо ООО «Риз» э жиге овурде э 4 нубот вокурдеи дуьруьжде э республике мейвоегъомборгьо гъувотлуьи 50 гьозор тонн евэхдине дошдеи. Э кор венгесде проектно-сметни когъозгьо э проектгьо, комики вегуьрде хубе гъиметдии хьуькуьмэкспертизе. Э суьфдеи нубот гьомборгьо гъувотлуьи 12,5 гьозор тонн бегьем сохде коргьоре пуьдуьрлуье е гъэдер, гировунде вокурдеи каркасе.
Еккейге чуькле проект-ООО «Анжелина» веровунде э Дербентски улке э хорие муьлк, комики доре Республикой Догъисту алверсуьз эри веровундеи келе проекте. Инжо кошде суперинтенсивни богъ сибгьо ве домбулгьо э 100 га. Э эхир 2023-муьн сал бегьем сохде коргьо э 85 га. Э проект дешенде омборте 197 млн. монет. Гуьжолуьи 55 фэхьлее жиге. Э везифегьо эн «Анжелина» вокурдеи э 2 нубот гьомборгьо мейвогьо гъувотлуьи 8,8 гьозор тонн. Проекте дори хьуькуьмкумеки эри вогордунде хэржигьо.
Э товун веровундеи «вожиблуье проекте «Параменди транспортни-логистически гуьрдноме» гуфдире министр транспорте ве рэхьие сэхьиблугьи РД Джамбулат Салаватов. Э гъэд проект пушоки дире дануьсдеи веровундеи 8 чуькле проетгьо, э у гъэдер тозе вокурдеи аэропорте «Махачкеле», параменди рэхь гьовуни, зиёд фирегьсохи ве тозеден вокурдеи федеральни рэхье «Кавказ» э гьемме мескен республике э вокурдеирево гьей сохде э иловле шегьергьо Хасавюрт, Дербенд, Махачкале.
Э эхир пуьруьшсохи ве дори гъэдэгъэ рэхьбергьо хьуькуьм, Абдулмуслим Абдулмуслимов гене э ёр овурде э товун вожиби дениширеи э гешдеи веровундеи проектгьоре.
«Веровундеи и проекторе вокурде очугъ сохде минкини республике, э барасигьо социально-экономически параменди ве гъэрорноме э вэхд ю герек гьисдигьо четинигьо», – гуфдире премьер министр Догъисту.
Хуней хэлгъгьо Уруссиет бэхшире книг жугьури
Э гъэд Гьеммеуруссиетие конфиренци «Хэлгъгьо кумеки доре Владимире Путине», эз нумине Гуьрдноме жуьгьургьо догъи (ОГЕ) э Сокольниках Хуней хэлгъгьо Уруссиет бире доре книг зугьун жугьури.
Книгоре доре э дес рэхьбер Хуне хэлгъгьо Уруссиет Тимура Нурмухамедовича Мухамедова. Бэхш доре сернуьш Нисиете московски Фенка, корсох жэгIмиет дин-догIоти ОГЕ Спартак Якушев ве вице-президент ФЕНКА Игорь Дабакаров.
Книггьо жугьури пур сохде библиотеке Хуне хэлгъгьо Уруссиет. И пушогьо э бине и идоре вокурде Бине э хундеи миллетлуье зугьунгьо РФ, эже гьейсэгIэт гуьнжолуьи игърол эри коргьо экспертгьо ве тербиедорегоргьо гъовумлуье зугьунгьо.
Бине э пушо норе онлайн-проектгьо, школгьо, гиргинее шуьлхьон, гоф сохдеи дуь одоми ве дуьруьжде гъосуьтгьо. Корсохгьо эн угьо э гуьнжо овурде гIилмие библиотеке: «Зугьун жугьури-гъовумлуье эри жуьгьургьо догъи Мизрэхь Кавказе – Азербайджан, Догъисту, Кабардино-Балкарие. Э и зугьун дофусзере хундение ве художествени литературе, э Дербенд ведиреморе гозит «Ватан» Гъимиши, жугьури имбуруэ гьисди, чуьтам гъич биреи, сейреклуье зугьун ве гереки кумеки доре»,- гуфдире Спартак Якушев ве зиёд сохде, чуьки книг бире ведешенде бине Шолуми э кумеки Сервор гIэрейхэлгъие фонде СТМЭГИ Германа Захарьяеве.
