Э Дербендски районе гирошди аппаратни гуьрдлеме э зир сернуьширевоз Серворе муниципалитете Эльмане Аллахвердиеве.

Э кор гьобул сохди бэхшвегири сернуьш Гуьрдлемере депутатгьоре, жигегир серворе, серворие духдир рвйоне, рэхьбер гьемшегьерие бинере социальни гъуллугъсохи могьлугъе, гьемчуьн рэхьбергьо еклуье корхонегьо.

Бинелуье беделевоз везифере бири фегьмсохи веровундеи гъэдэгъэгьоре, комики доре омори э пушотеине вохурдеи.

Жирелуье тигъэти доре омори хьозуьрлугъире эки мигIид Руз Бараси. МэгIлуьм сохди э товун сергири гьероринеие субботникгьо э гьемме могьлугълуье жигегьо районе, комикигьоре дураз мисоху те мигIид. Э гъэд суьфдеи субботнике гьемкоркигьо идорегьой хьуькуьме мигировуну коргьоре э гуьнжолуьи э Богъ Ёргири.

Э иловле параменди инфраструктуре районе пуьруьш сохде омори корисохи хьозуьрлугъи проектно-сметни когъозгьоре эри богъе э нум Игиде РФ Муслиме Муслимове э дигьбон Белиджи.

Веровундеи и проекте гьишдени гьеммишелуьг э ёргири гьишдеи игиде ве э гуьнжо овурде тозе жиге форигъэти эри зигьисдегоргьо. Гьемчуьн бири фегьм сохде коргьо э сер гуьнжолуьи сафарие хабе, фуьрсоре оморие э зевербиреи сафарие э хуьшде вогосундеи Дербендски районе.

Вожиблуье социальни пуьрсуьшевоз бири мэгIлуьм сохдеи аукционе э восдореи хунегьоре эри гIэилгьо-етимгьо. Эзуш бэгъэй, бири гуш дошдеи мэгIлуьмети э товун омореи налогови ве налоговисуьзе гъэзенжгьоре.

Э бегьем сохдеи гуьрдлемере Эльман Аллахвердиев дори тозе протокольни гъэдэгъэгьоре э пушо дерие орине, норе ёгъинлуье вэхде веровундеи эн угьоре.