Э гуьнжо овурдеи э Догъисту меркезгьоре эри соводи ве нисигIэтдореи пуьруьш сохде оморебу э зир рэхьберьети эн Сергей Меликов.
Сервор Догъисту гуфди э товун мэгIэнолуьи эн ижире идорегьоре эри несигIэтдореи биевгьо эрхэгьоре. «Юнармейцгьо, бэхшвегиргьой эн проект «Зарница 2.0» ве угьониге десдегьой гIэилгьо эз Догъисту барасилуь бирмундет хуьшдере э гьеммеуруссиетие риз ве угьоре мие бу жигей хуьшде. Ижире объектгьо кумеки мисохут гъэрор сохде омбаре везифегьоре э соводие ве лешгерие-ватанхогье сферегьо, эзу товун ижире проектгьо эри иму вожиблуьни», — гуфди у.
Региональни меркез офдеи ве параменд сохдеи мэгIрифетгьоре э гIэрей гIэилгьо ве жовонгьо «Альтаир»:
Рэхьбер эн Министерствой вокурдеи РД Бахтияр Уллаев мэгIлуьм сохди, ки гировунде миев зиедие офдеигьо эже мерэгълуь сохде миев гIилмчигьо, эри гъимет доре секонесуьзи вокурдеире э вихде оморигьо жиге ве энжэгъ бэгъдовой эну бесде игъролномегьо эри хьозуьр сохдеи проектгьоре.
С.Меликов гуфди, ки бинелуье везифе – секонесуьзе вокурдеи. Э и куьнде вэгIэдо гереки хьозуьр сохде проекте, ве у боворини дори: меркез э республике егъин вокурде миев.
Соводие идоре «Юнармия» э Махачкале:
Сервор эн министерствой соводи ве гIилми эн Республикей Догъисту Яхья Бучаев ихдилот сохди, ки э сер сал вегуьрде омори хубе барасигьой фегьмсохи. Э план гуьре денишире оморени ки э гуьнжо овурде миев омбаретарафлуье соводие жиге э дуь хунденигьо беногьоревоз. Э унжо норе миев идмонлуье мейдун, жиге эри хуте сохдеи лешгерие хьозуьрлугъире ве жиге эри форигъэти вегуьрдеи.
Меркез «Авангард» э Карабудахкентски район:
ГьейсэгIэт корсохгьо хьозуьр сохденуьт жиге: оводу сохденуьт мескене эри дошдеи молгьоре ве гировунденуьт электрически сутунгьо. Э план гуьре денишире оморени, ки э меркез гировунде миев хунденигьо вохурдеигьо, дегишигьо, мероприятиегьо ве боржберигьо. Ве э инжо хьозуьр сохде миев э гуьнжоовурдегоргьо эн ватанхогье коргьо.
С.Меликов суьфдеи вице-премьере М.Мажонце гъуллугъ дори гировунде гуьрдлеме э вокурденигьо идорегьоревоз ве пуьруьш сохде вэхд э кор венгесдеи ире ве унигее социальни объектгьоре.
Лешгерие-ватанхогье меркез э Хасавюртовски район:
Вице-премьер эн республике Муслим Телякавов ихдилот сохди, фегьм сохденки мескен эн мибугьо лагеря «Радуга» очугъ бири, ки кугьне вокурдеигьо дошде ниев. Гъобул сохде омори гъэрорноме имисал норе гьеймогьине палаточни лагерь: технически тапшуьрмиши разилуь сохде омори, ведешендегоргьо эн гереклуье конструкциегьо офде омори. Э инжо хьэсуьл миев административни-хунденигьо беногьо, зигьисденигьо жигегьо, хурекхоне, медицински ве идмонлуье комплексгьо. Жейлее тигъэт доре миев гьеймогьине тарафгьоре: хьозуьр сохдеи операторгьой БПЛА, рэхьбери сохдеи э мтоциклегьоревоз ве квадроциклегьоревоз ве «рэхь эн суре гешдегоргьо».
Сервор республике гуфди ки гереки жугьобдорлуь вихде административни корсохгьоре ве жейле рэхьбер меркезе – и мие бу одоми, комиреки гьисди гъовхолуье синогъи ве варасиренигьо жирелуьи хьозуьрлугъи.
