Эри одоми асанте кор нисди эри офде сенигIэт хуьшдере. Вихде оморе сенигIэт эгенер эз дуьли бири, одоми э кор рафдени э дуьлшориревоз, кор гирошдени хьэвеслуье. Александр Давидович Назаров гьисди еки эз ижире ки дануьсди э войге хуьшде вихде у сенигIэткори э комики бири э муьгьбетевоз ве бофолуьи те песини рузгьо зиндегуни хуьшде.
Э гуьнжо овурдени гьер одомире омборе мэгIэнолуьи гьисди кифлет, бинедор эну. Кифлет Назаровигьо хуб мэгIлуьми э Догъисту. Э 1913-муьн сал эз дигьбон Тарки э Махачкале гирошди гъумолет Назаровигьо. Угьо зигьисди э куче 26 Бакинских комиссаров, №3, э фасад хуне вебири хэтнуьвуьси: «Бироргьо Назарови». Бироргьо бири севдегоргьо, алверчи, угьоре бу омборе тукугьо. Еки эз бироргьо – Давид Назаров, омборе сал кор сохди экспедитори «Дагрыбтреста». Зен эну Софья кор не сохди, чуьнки бири сэхьиб келе кифлет, деде хьэшди гIэилгьо. Э сеимуьн январь 1942-муьн сал хьэсуьл омореи э келе кифлет чуьклеи гIэил Александр.
Гьемме гIэилгьо Давид ве Софье вегуьрди хубе данани. Келеи хэгьер Александр Берте хунде бегьем сохди сенигIэткори тербиедорегоре, Моисей варасди хоригъуллугъсохие институт кор сохди агрономи, дуь хэгьергьо, варасди мединститут.
Александр э 1970-муьн сал варасди математики факультет ДГУ. Песде сер гирдени гурунде рэхь жофои гIилмчи. СенигIэткорлуье корсох э вэхд гирошдигьо салгьо хьозуьрлуьгъи сохди омборе сенигIэткоркигьо, гьемиге эз студентгьо эну дуьдуь бири профессоргьо, чор нуьвуьсди кандидатски диссертаци.
Александр Давидович Назаров – «Верзуьшлуье корсох Уруссиети Федераци», гьисди кандидат физико-математикигьо гIилмгьо, доцент, омборе сал рэхьбери сохди э кафедре буьлуьнде математик э университет. Э Догъистони Хьуькуьмлуье Университет ЖэгIмиетлуье Сэхьиблуь Александр Назаров кор сохди эз бинеден, у бири гьеммише эри гьемме: ректорат, коллектив тербиедорегоргьо, студентгьо рэхьмедуьле одоми, ерашуьгълуье гIилмчи ве тербиедорегор-вомухундегор. Боворинлуьи Александре Давидовича э кор ю верзирени хьуьрметлуьи ве муьгьбети, чуьтам коллективе гьемиге ве студентгьо.
Александр Давидович бу не энжэгъ ерашуьгълуье гIилмчи, оммо гьемиге хубе кифлетлуь. Зен эну Дора Ханукаевне, э эз гъовум-гъэрдеш Дагаеви бири бофолуье хэгьергили эну.Гъумолет Дагаевигьо гьемигеш хуб мэгIлуьми э Догъисту. Дора Ханукаевне варасди ДГУ факультет физики, у бу еки эз суьфдеигьо сенигIэткор э информатике э гъэд республике, хьозуьрлуьи сохди омборе сенигIэткоркигьо э у гьосуьт. Александр Давидович ве Дора Ханукаевне дошде веровундет се гIэилгьо. Келеи кук Давид нум комики норе омори э хотур келе бебе, варасди МГУ механико-математики факультет, у гьисди кандидат гIилми зигьисдени э Москов. Духдер Мариетта варасди гьемиге МГУ зигьисдени гьем кор сохдени э Москов. Чуьклеи кук Назаровигьо зигьисдени э Исроил.
Ведилуье гIилмчи-математик Александр Назаров Давидович монухьо бири э 11-муьн февраль 2024-муьн сал э шегьер Махачкале оммо нум эну тевесер мидомунуь э ер эн гьемме ки э урегьо шинох бу, чуьнки Александр Давидович бу еки эз верзуьшлуье гIилмчигьо хэлгъ иму.
Ректорат ве гьемме коллектив тербиедорегоргьо ДГУНХ, корсохгьой редакцией гозит «Ватан» дорундуьли хьэйфбери сохде э гъовум ве куьндлуье Александре Давидовиче Назарове. «Ёргири э товун эну иму э гьемме вэгIэдогьо дошдеи э дуьлгьой хуьшде».
