Э пушой Руз Уруссиет э редакцие эн республикански гозит «Ватан» гировунде омори вожиблуье ве шоре вохурдеи э сернуьш Гуьрдномей эн ветерангьой СВО ве ДРОО «Еровурди догъгьо» э Ренат Ханмагомедовевоз ве э ветерангьой эн жирелуье гъовхолуье операциеревоз. И игидгьо, гъозиегьой комигьоки е ченд гиле дофус зере оморебу э верэгъгьой гозит, оморет эри ихдилот сохде еровурдигьой хуьшдере ве пуьруьш сохде песдение еклуье корисохире э десдей гозитевоз.
Эз нуминей эн жэгIметлуье идоре «Еровурди догъгьо» редакцией «Ватане» доре оморебу согъбоши нуьвуьсде оморигьо когьоз эри хэйрлуье жугьобдорлуье кор э товун гьеммишуьг э ергири гьишдеи ергири эн бэхшвегиргьой СВО. Жейле согъбоши гуфдире оморебу эз корреспондент эз Джамиля Ибрагимова, комики хьозуьр сохди омборе молгьо, гIуьзет сохде оморигьо э мердьети ве игидьети эн догъистонигьо.бирмундетгьо хуьшдере э гъовхо ве биретгьо гьэгъигъэтлуье нишон эри нишоне.
Э нубот хуьшде серворлуье редактор эн гозит «Ватан» Моисей Аврумов Ренат Ханмагомедове дори согъбоши нуьвуьсде оморигьо когъоз ве хунди серномей энуре:
«Республикански гозит «Ватан» согъбоши гуфдирени эз ЖэгIметлуье идоре «Еровурди догъгьо» эри хэйрлуье еклуье корисохи э мэгIлуьм сохдеи игидигьой игидгьоре, бэхш вегуьрденуьтгьо э жирелуье гъовхолуье операцие.
Э хотур еклуье кор сохдеи э идорей Ишмуревоз э верэгъгьой гозит дофус зере оморебу молгьо, гIуьзет сохде оморигьо э гъисметгьой эн игидлуье гьемватанигьо, э мердьети энугьо ве хуьшдере гьими несохгьо. И дофусзереигьо бирени вожиблуье бэхш эн жэгIмие кор – несигIэтдоре хьуьрметлуьире эки игиди, э гуьнжо овурдеи граждански жугьобдорлуьире ве муьхькем сохдеи несигIэтие верзуьшигьоре.
Иму буьлуьнде гъимет дореним хьэвес Ишмуре, бибигIорире ве хьэрекетире ихдилот сохде э могьлугъ дузире э товун гьэгъигъэтлуье игидгьо эн вэхд иму.
Хосденуьм эри ишму песдеине барасигьоре э корисохи, фуьрсоре оморигьо эри дошдеи еровурдире муьхькемлуь сохдеи ватахогье гIэдотгьоре э жэгIмет».
Руй биренки эки ветерангьо М.Аврумов гуфдири:
«Игидьети ишму, гъувотлуьи гъондуьрмиш сохдени э иму хьуьрметлуьире. Согъбоши эри эну, чуьки гъэлхэнд сохденит вилеет имуре ве дошденит верзуьшлуьи хэлгъэ. Эри десде гозиткеле гIуьзете кор сохде э ишмуревоз ве ихдилот сохде э товун игидьетигьой ишму».
Вохурдеи гирошди э герме ве боворинлуье овхьолет. Э вохурдеи бэхш вегуьрдебируьт неки корреспондентгьо, оммо ве гьеммей десдей редакцие – корректоргьо ве тержуьмсохгьо. Угьо желдлуь доребу пуьрсуьшгьо ветерангьоре, ерэгълуь биренки э гъозиегьой энугьоревоз ве еровурдигьой энугьоревоз. Ижире тигъэти бири гьэгъигъэтлуье бирмундеи хьуьрмете эки энугьо, ки гъэлхэнд сохдени Ватане.
Жейлее тигъэт доре оморебу у ветерангьоре, гъозиегьой комигьоки дофус зере оморебу э гозит «Ватан» — Ренат Ханмагомедове, Григорий Газаряне, Гаджимурад Сеидове, Мухаммад Магомедове ве Айдын Пашабекове. Гьеммей энугьо гуфдиребируьт, чуьки молгьо дофус зере оморигьо э гозит лап хьэз оморе хундегоргьоре ве кумеки сохдени дошде еровурдире э товун игидгьо зинде ве мэгIэнолуь.
Э гофгьой эн корректор гозит «Ватан» эн Марият Сефербекове гуьре, омборе одомигьой Дербент ве эн Дербенди район, комигьоки гьеммише хунденуьт гозит «Ватане», оморенуьт э редакцие, эри вегуьрде тозе ведиреморе оморигьо нумиргьоре э дофусзереигьоревоз э товун игидгьой эн жирелуье гъовхолуье операцие. Э и гуьре угьо хосденуьт дошде эри энугьо и нумиргьо, эзу товун гьеи жире ведешендеигьо – неки гозити, оммо вожиблуье еровурдини, комигьореки угьоре воисдени чуьнки у бу э зир дес. И э угьо кумеки сохдени е ченд гиле вогошде эки хунде оморигьо, гье гене хунде гъозией игидгьоре, ихдилот сохде э гъовумгьо, шинохгьо ве хьовиргьо.
Хундегоргьо бежид оморенут э редакцие эри вегуьрде зиедие гозите – эхи гозит эри энугьо – кифлетлуье верзуьшини, комиреки воисдени дошде, гьишде эри эрхэгьой хуьшде ве э кор венгесде чуьн мол эри хьэвес ве эри ватанхогье несигIэтдореи. Омборгьо эз угьо и гозитгьоре овурденуьт э школегьо, вузгьо ве ссузгьо, эже гъозиегьой игидгьо бирени бедел эн несигIэт доренигьо кор ве жовоне одомигьо мерэгълуь биренуьт э угьоревоз. Эри омборгьо и неки дофус зере оморигьо велггьои – и гьэгъигъэтлуье еровурдини, комики кумеки сохдени варасире ве э хуьшде кешире мэгIэнолуьи гьер игидире, эн гьер гъэлхэндчи Ватане.
Корреспондент гозит Джамиля Ибрагимове гуфди: «Эри ме келе гIуьзети ихдилот сохде гъозиегьой эн ижире одомигьоре. Лап дуьлхьэзини винире, чуьтам хундегоргьо хосденуьт дошде гозитгьоре э дофусзереигьоревоз э товун игидгьо – эри энугьо и неки хэбергьои, оммо у гьемчуьн зинде еровурдини, жигей хьэвес дореини ве эн эрклуьни. Ижире молгьо бирени беден эн кифлетлуье торих, кумеки сохденуьт дошде ологъире э игидьетигьой эн гъэлхэндчигьой имуревоз».
Ветерангьо, э и хьисоб Ренат Ханмагомедов, риз кешири, чуьки угьоре хьэз оморе вохурде э одомигьоревоз, комигьоки эз дорун дуьли мерэгълуь биренуьтгьо э гъисметгьой энугьоревоз, ве э угьоревоз, ки нуьвуьсдени ве дошдени дузире э товун гъозиегьо. Ижире гъозиегьо муьхькемлуь сохдени руьхье ве хьэвеслуь сохдени э тозе барасигьо.
Гьемчуьн пуьруьш сохде оморебу ижире фикиргьо ве тегьергьой еклуье корисохи э гIэрей редакцие ве эн идоре «Еровурди догъгьо», фуьрсоре оморигьо эри зиед сохде мэгIлумлуье мейдуне ве зиед сохде ватанхогье несигIэтдореире э жэгIмет. Гьемме курабирегоргьо гуфдируьт, чуьки и хэйрлуье еклуье кор диеш гировунде миев.
Дуь екире хьуьрмет сохдеи, дуьллерзие гъоножогъи эки еровурди жэгIмие везифе гуьрд сохдени десдей гозит «Ватане» ве жэгIметлуье идорере «Еровурди догъгьо». Гьееки угьо мидоруьт торихе, ихдилот сохденки э товун энугьо, ки гъэлхэнд сохдени ве гъэлхэнд сохди Ватане.
Дж. Турабова
