12 июнь, сервор Догъисту Сергей Меликов доре э г1уьзете овхьолет хьуькуьмлуье бэхшгьо сеч биреи дуь эз еки догъистунигьо.
Э гъэд бэхширегоргьо – верзуьшлуье корсохгьо культуре, г1илме, тербиедорегоргьо, хьуькуьм гъуллгъсохгьо, бэхшвегиргьо СВО ве екейгегьо зигьисдегоргьо республике, комикигьо сохде дешендеи э параменди эну.
Сергей Меликов бирмунди хуьшдере гъимиш ние сохдение зигьисдегоргьой регионе, комикигьо садсалигьоревоз бегьем сохде игидьетигьоре ве зевер сохде гъувоте ве г1ьоширире вилеете.
«Догъистунигьо э хун дери диворевоз поисде э песой гъовумлуье хори. Жирелуье хубе гофгьо гуфдиреи имбуруз мэг1луьм сохди гьемватанигьо имуре – бэхшвегиргьоре СВО, комикигьо, э терсдии зиндегуни эн хуьшдеревоз, зиёд сохде веровунде лешгерие везифегьоре, э гъэлхэнд поисде ихдиёри уруссиетие хьуькуьме э секонесуьзе ве хушхьолие биёвгьо.Вожиблуьи бирмунде ггъэдуьрдане корисохи э лешгерие екбиреи эн иму беинлуье вомухундегоргьо»,- гуфдири сервор регионе. У бэхшири лешгерчигьоре ве имамгьоре, комикигьо хуьшдере гъимиш несохи гъуллугъ сохде э СВО. Э гъэд эн угьо – гвардие чуьклеи лешгери Юсуп Атохов, рэхьбер Беинлуье гуьрдлеме мисирмугьо Уруссиет э тозе е гъэдер мескенгьо Шарапудин Мустафаев, имам 25-муьн лешгери Дорумие лешгерие жиге Абдула Ибрагимханов, жугьобдорлуье э коревоз э лешгерие гъуллугъсохгьоревоз 177-муьн жейлее гвардейски лешгеригьо дерьёгьие лешгери Каспийски дерьёгьие десде Ислам Израилов, лешгери Расим Рамазанов, полковник Анзор Хабилов.
Э пуш-пушокие сениг1эткорлуье миг1иде Сергей Меликов доре э г1уьзете овхьолет бэхшгьо медицинеи корсохгьоре.
Нуме верзуьшлуье духдире Догъистуре вегуьрди духдир Республикански диагностически бине Умукусум Гаджиеве, верзуьшлуье корсох дошдеи жунсогъире регионе – Рите Омарове.
«Жейле воисде бирмунде коре духдиргьоре, кумеки дорегоргьой духдиргьоре, медициние хэгьергьоре, корсохгьой медицинеире, бердегоргьой ве рэхьбердегоргьой зурие кумекии гьеммей корсохгьой жунсогъи дошдеигьо республике.
Медицине гьисди корисохи игидгьо, комикигьо гирошде гьеррузи. Оммо одомигьоре э сипре парталгьоревоз нисди вэхд вегуьрде барасигьо – эхи э кумекии эн угьо гьеммише михьтож бире нечогъгьо. Ве гьечи – 24 э 7. Унегуьре бире гьэгъигъэтлуье духдиревоз мидану у, ки гьис сохде э хуьшде гье у гуьнжолуье сениг1эт, кире гьисди инсонехосдеи ве жунлуье дуьлфирегьуни», гуфдири сервор республике.
Верзуьши рэхьбере Догъистуние торихлуье бохче «Вилеет эн ме Торих эн ме» Асият Абакарове э коргьой соводи ве ватанхогьие несиг1этдори жовонгьоре бири бирмунде э гье у руз бэхшевоз э
нум дуь бо Игиде Союзе Совоти Амет-Хане Султане.
Бэхш Г1уьзете 11 гъэдере Сергее Меликове доре э г1уьзете овхьолет Людмиле Авшалумовой:
«Гъуллугъ сохдеи Ватане, муьхькем сохдеи конституционни бине республикере, несиг1этдори вереморее эрхэгьоре э беин ватанхогьи г1уьзет сохди зиндегуни эн хуьшдере Людмиле Хизгиловне.
Боворини, чуьки Эн ишму фирегьутегьерлуье дананигьо, г1ошире синогъи, гуьнжуьндеие энергие ве песде мибу кумекии доре гуьлишонлуь бире республикере».
Сергей Меликов гьемчуьн гуфдири гофгьой согъбошии гьеммей тербиедорегоргьоре республике:
«Барасигьо вероморенигьо эрхэгьо – хубтее гъувот дореие вожиблуьи жофогьой эн ишмуре, зн ишму сэниг1эткорлуье хуьшдередореи ве жунлуье дуьлфирегьуни»,- гуьфдири сервор регионе.
У бирмунди, чуьки зиндегуние ве сениг1эткорлуье синогъи гьерки эз бэхшвегирдегоргьо жирелуь ве нисевогогъруши:
«Лап вожиблуьи, эри чуь э товун барасигьо эн ишму дануьсде гьемватанигьо, жейле вероморение эрхэгьо. Гьечи э ижире меселенгьо герек несиг1этдоре жовонгьоре, хунде , чуьтам ве эри чуь гереки коре сохде. Угьо биё дану, чуьки, энжегъ норе э пушой хуьшде гьундуьре войгегьо ве гьуьнери сохде угьоре, г1эмел миёв верзуьшлуь бире хьуьрметлуьи ве г1уьзет э жэг1мет»,- гуфдири сервор республике.
Гьемме э гье у руз бэхшгьо бири доре э г1уьзете овхьолет 35 догъистунигьоре.
Сергей Меликов согъбоши гуфдиреи кучмиш бирегоргьоре э песой номуслуье ве рэхьменомуслуье коре: «Ишму гьэгъигъэтлуье гъувот Уруссиете ве сикеи Догъистуре!»
Э межлуьс э Руз Уруссиет эз дес серворе регионе 11 догъистунигьо г1эилгьо вегуьрди бинелуье когъозгьой эн хуьшдере.
Сергей Меликов чуьтам бебе хуте сохде жовоне бэхшвегиргьой гьеммеуруссиетие программе «Иму одомигьой Уруссиете» «Жуьмуьсдеи суьфдеигьоре» Догъистуре, комики имбуруз вегуьрди паспортгьоре.
«Бинелуье везифе эн ишму – хунде, норе дузгунлуье войгегьоре. Ишму уже келе эгъуьлмендгьоит, оммо гене омбор гьемме э пушо ишмуре денишире, эри чуь бире чуьтам сэниг1эткор э коргьой эн хуьшде ве чуьтам одоми буьзуьрге вилеет. Гьеммише бошит э гьемме коргьо суьфдеи! Иму, келетегьо, эз дес вереморе песде хьэрекети веноре, эри чуь ишмуре э жэг1мет бире секонеисуьзе ве хубе хундеи кор сохдеи ве зигьисдеи»,- бирмунди сервор регионе.
Бегьем сохде, Сергей Меликов омборекбу сохди догъистунигьоре э Рузевоз Уруссиете.
«Гъувотлуье, гуьлишолуьие Ватан – бинелуье везифе эн имуни, у жэг1мие кори, э сереботи комики иму гьемме жофо кеширеним»,-риз кешири у.
У э ёр овурди, чуьки 35 сал песево, 12-муьн июнь 1990 сале, суьфдеи Гуьрдлеме хэлгъие депутатгьо РСФСР гъобул сохди Декларацие э товун бимихьтожи. Эз у вэхд э миллетлуье луьвэхь веди бири мэг1луьмлуье руз, комики гуьрд сохде э идоре одомигьоре э иловле буьзуьрге гуьнжуьндение везифегьо э хотур хилоси ве бимихьтожи Ватане.
«Чуьтам гуфдири Зеверие Серворекомандующий Владимир Владимирович Путин:
«Омборемиллетлуье вилеет эн иму бире эз сад культуре, зугьунгьо, дингьо, ве бирорети хэлгъгьо гьеммише мибу ве мунде бинелуье гъуьвот эну».Имбуруз иму жейле варасире гъэдуьр гье у гофгьоре. Гьеммишеине дингьо ватанхогьире ве гъуллугъ сохдеи Ватане – эн иму имидлуье беинлуье ве номуслуье бедел, комики кумекии доре эз гурунди гирошде четинигьой вэхде, гъэрор норе келе везифегьоре»,- бирмунди сервор республике.
У войге сохди эри гьеммейки шолуми, рэхьми ве хушхьоли, келе барасигьо э жофогьо.
