26-муьн сентябрь сервор Догъисту Сергей Меликов гъобул сохди бэхшвегири э гъонуне сэхд сохдеи Жовоне соводие форум «Каспий-2025».
Имисал форум, коминики гировунде омори э Избербаш, 500 бэхшвегиргьо эз регионгьой Уруссиет ве де вилеетигегьо. Бэшгъэ тематечески рэхь кори «Гезиши суьфдеигьо» еклуьг бири омборте 200 желдлуьегьоре.
Бинелуье рэхь кори форуме бисдо: Г1эрейхэлгъие мескен 80-сали Бараси, ватанхогьи несиг1этдори жовонгьоре, э войгей хуьшде гуьре, жовонгьо э цифровой жэг1мет.
Сергей Меликов ве рэхьбер хьуькуьмлуье агенство э коргьой жовонгьо Григорий Гуров, оморигьо э Догъисту э гъуллугъ кори, шинох бирет э хьэвесгьой догъистуни жовонгьоревоз э фирегьэ мейдон форуме Аллее проектгьо.
Э сервор республике нушу дори сиротбирмундеи объектгьоре, э гуьнжо овурде оморигьо э рамке Гьеммеуруссиетие боржбери программгьо «Регион эри жовонгьо». Э хотур гье у проект э республике гъуьч сохде омори жовонгьоине бинелуье мескенгьо э Махачкале, Дербенд, Кизилюрт ве екиге хьуькуьмлуье мескенгьо.
Э форум бу нушу дореи ве гьеймогьоине спортивни проектгьо: дронбаскет – ухшешие баскетбол, эже туп э гъэрзинке дешенденуьт рэхьберисохе дронгьо; фиджитал-спорт – жире, гуьнжуьнденигьо гъувот жендеке э угьо виртуальни ухшешигьоревоз э видегьовозиреигьо.
Э гъэд екиге мейдонгьо форуме: стендгьо э жовонгьоине тозе проектгьо, кумекии доренигьо э рамке проект «Урусжовонгьо. Бизнес»; мейдон ОАО «Денеб»; Гьеммеуруссиетие довг1ои-ватанхогьи возиреи «Зарница 2.0»; тематически бирмундеи ёргири Игиде Союз Совети, лётчике-нисд сохдегор Валентин Эмиров; бирмундеи э войгей хуьшде гуьре (ВСКС, тебиет дошдегор, медикгьо); «Гъовхои кинотеатр» э бирмундеи проект «Вэхдсуьз зутеине».
Э еки эз мейдонгьо «Каспия» э Сергей Меликов бирмундет лап келе довг1ои-торихлуье тозевокурдеи, дуь э еки гъэножэгъи эки 80-сали Бараси э Келе довг1ой Ватани. Э у бэхшвегиргьо гешдеигьо десде «Кавказ» дуь эеки э клубевоз торихлуье тозевокурдеи гуьнжуьндет кесег еки эз бинелуье гъовхогьо – Гъовхо эри Кавказ. Томошесохдегоргьо винирет пурлуье шекуьл гъовхоре: вокурдение партал, ерэгъ ве техника бу лап ухшеши э угьо, коминигьо бири э у довг1ои салгьо.
Э рамке форум сервор Догъисту вохурди э желдлуье гешдеигьо десде «Кавказ». Бэхшвегиргьо бежид рафденуьт э экспедицие э жигегьой гъовхогьо Келе довг1ой Ватани э жире-бе-жирее регионгьой Уруссиет, бэхшвегири сохденуьт э лап келе ватанхогьи акциегьо. Жирелуье мэг1эно гьисди кор э жигею нореи гъисмет довг1оигъуллугъсохгьоре, битехьэим сохде оморигьо э мескен Догъисту э салгьой Келе довг1ой Ватани. Сергей Меликов буьлуьнд гъиметдори бараси кор гешдеигоргьоре ве гъуллугъ дори эри корисохи э идоре кумекии дореи. Эзуновлейге Сергей Меликов ве Григорий Гуров гоф сохдет э бэхшвегиргьоревоз форуме. Жугьоб дореи э пуьрсуьшгьо э товун рол бэхшвегиргьо жирелуье довг1ои операцие э параменди республике, Сергей Меликов гуфдири, чуьки омборте 13,5 гьозор догъистуни довг1оигъуллугъсох бэхшире омори хьуькуьмлуье бэхшгьоревоз, 15 эз угьо – Игид Уруссиет.
Бегьем сохде омори вохурдеи э г1уьзете овхьолет дореи сертификатгьо бараси бердегоргьо Гьеммеуруссиетие боржбери жовонгьоине проектгьоре. Г1эилгьо вегуьрдет бэхш те 1 млн монет эри э кор венгесде социальни проектгьоре.
Гьемме гуьрд сохде омори 15 проектгьо э гъэдер омборте 6,7 млн монет.
Э ёр овурденим, форум «Каспий» гировунде омори э республике 12-муьн гиле. Э салгьо корисохи бэхшвегиргьо бисдо омборте 7,5 гьозор жогьиле одомигьо.
